Mataio 16:1-28
16 ATI o mai ai e tau farasaio mo e tau satukaio, kua kamatamata a lautolu mo e tala age kia ia, ke fakakite kia lautolu taha fakamailoga mai he lagi.
2 Ati tala age ai a ia, kua pehe age kia lautolu, Ka hoko ke he afiafi, kua pehe ai a mutolu, To afua, nukua kula mai e lagi.
3 Ka pogipogi foki, kua pehe ai a mutolu, To uha e aho nai, nukua kula mai mo e malumalu hifo e lagi. Ko e tau tagata fakavai na e, kua iloa e mutolu ke fakafili e mahani he lagi, ka ko e tau fakamailoga he tau vaha nakai kia maeke e mutolu?
4 Ko e hau kelea mo e faivao kua kumi ha fakamailoga; ka e nakai ta atu ki ai ha fakamailoga, ka ko e fakamailoga hokoia a Iona ko e perofeta. Ati toka ai e ia a lautolu, ka e haele kehe.
5 Ati hohoko atu hana tau tutaki ke he fahi atu, kua nimo ia lautolu ke uta e tau areto.
6 Ati tala age ai a Iesu kia lautolu, A mutolu, kia kalo kehe a mo e mena fakaea he tau farasaio mo e tau satukaio.
7 Ati vagavagahau ai a lautolu, kua pehe, Kua pihia mai a ia he nakai ta mai e tautolu e tau areto.
8 Kua fioia e Iesu, ati pehe age ai a ia kia lautolu, Ko mutolu na ne tua fakatote, ko e ha ne vagavagahau ai a mutolu, he nakai ta mai e mutolu e tau areto?
9 Nakai kia la logona e mutolu, nakai kia manatu foki e mutolu ke he lima e areto mo e lima e afe, po ke fiha e kato ne fafao ai e mutolu?
10 Ko e fitu foki e areto mo e fa e afe, po ke fiha e kato ne fafao ai e mutolu?
11 Nakai logona fefe e mutolu, nakai ko e areto ne tala atu ai e au kia mutolu, kia kalo kehe a mutolu mo e mena fakaea he tau farasaio mo e tau satukaio?
12 Ati logona ai e lautolu, nakai ko e mena fakaea he areto ne tala atu e ia kia kalo kehe ai, ka ko e tau kupu he tau farasaio mo e tau satukaio.
13 Kua haele a Iesu ke he tau fahi a Kaisaria Filipi, ati hūhu age ai a ia ke he hana tau tutaki, kua pehe age, Po ke heigoa e kupu he tau tagata kia au ko e Tama he tagata, po ko hai?
14 Ti pehe mai ai a lautolu, Ko e kupu he falu ko koe ko Ioane ko e papatiso; ka ko e falu, ko Elia; ka ko e falu, ko Ieremia, po ke taha he tau perofeta.
15 Ti pehe age a ia kia lautolu, Ka ko mutolu, po ke heigoa e kupu ha mutolu kia au, po ko hai?
16 Ati tali mai ai a Simona Peteru, kua pehe, Ko koe ko e Keriso, ko e Tama he Atua moui.
17 Ati tala age ai a Iesu, kua pehe age kia ia, Uhoaki a koe ma Simona Pa-Iona, ha ko e mena nakai ko e tagata ne fakakite atu ai kia koe, ka ko e haku a Matua ha ha he lagi.
18 Kua tala atu nai e au kia koe, Ko Peteru a koe, to fakatu foki e au haku a ekalesia ki luga he maka nai; ti nakai kautu ki ai e gutuhala a hate.
19 To ta atu foki e au kia koe e tau kei he kautu he lagi; ko e mena foki ke lili e koe ke he lalolagi, to lili foki ia ke he lagi; ko e mena foki ke vevete e koe ke he lalolagi, to vevete foki ia ke he lagi.
20 Ati hataki age ai a ia ke he hana tau tutaki, aua neke talahau atu ni e lautolu kia taha, ko ia ko Iesu ko e Keriso.
21 Ko e vaha ia ne kamata ai e Iesu ke fakailoa atu ke he hana tau tutaki, ko e mena lata ke fano a ia ki Ierusalema, ke mamahi foki a ia he tau mena loga he tau patu, mo e tau ekepoa ne mua, mo e tau tohikupu, ke kelipopo foki a ia, ke fakatu hake foki a ia ke he aho tolu.
22 Ti takitaki age ai e Peteru a ia, kua kamata ke hataki a ia, kua pehe mai, Ko e Iki na e, kia mamao ia koe e mena ia; nakai ni hoko e mena ia kia koe.
23 Ati haga atu ai a ia, kua pehe atu kia Peteru, Ma Satani na e, kia fano a koe ki tua haku; kua eke a koe mo mena ke tupetupe ai au; ha ko e mena nakai ko e tau mena he Atua kua manamanatu a koe ki ai, ka ko e tau mena he tau tagata.
24 Ati tala age ai a Iesu ke he hana tau tutaki, Ko e tagata ka fia mui mai kia au, aua neke omaoma a ia kia ia, ka e nikiti a hana satauro, mo e mui mai ai kia au.
25 Ha ko ia ne fia kuku hana moui, to moumou ai kia ia; ka ko ia ke moumou hana moui ha ko au, to moua ai e ia.
26 Ha kua aoga ha ha ke he tagata kaeke ke moua e ia e lalolagi oti, ka e moumou ai hana moui? Ko heigoa foki e mena ke uta he tagata ke totogi aki hana moui?
27 Ha ko e mena to hau e Tama he tagata fakalataha mo e hana tau agelu mo e lilifu he hana Matua; ati taui ai e ia takitaha ke lata mo e hana gahua.
28 Ko e moli, ke tala atu e au kia mutolu, Ha ne tutu mai hinai e falu nakai hoko kia lautolu e mate, ato kitia e lautolu e Tama he tagata kua hau ke he hana kautu.