Mataio 19:1-30
19 KUA fakaoti e Iesu e tau kupu ia, ati toka ai e ia a Kalilaia, kua hoko atu ke he kelekele Iutaia ke he fahi atu a Ioritana.
2 Kua mumui atu kia ia e lanu tagata tokologa, ti fakamalolo e ia a lautolu ke he mena ia.
3 Ati o mai ai kia ia e tau farasaio, kua kamatamata mai kia ia, kua pehe mai kia ia, Kua lata nakai ke tiaki he tagata hana hoana ha ko e tau mena oti?
4 Ka e tali atu a ia, kua pehe atu kia lautolu, Nakai kia totou e mutolu, ko ia ne eke e tagata ke he kamataaga, ne eke e ia a laua ko e tane mo e fifine,
5 Mo e pehe mai a ia, Ko e mena ia ke toka ai he tane hana matua tane mo e hana matua fifine, ka e fakalataha mo e hana hoana; ati eke ai a laua mo tino taha?
6 Haia kua nakai tuai tokoua, ka kua tino taha na laua; hanai, ko ia kua fakalataha he Atua, aua neke vevehe he taha tagata.
7 Ti pehe mai a lautolu kia ia, Ti poaki mai ai he ha kia a Mose ke age e tohi vega, ti tiaki ai a ia?
8 Ati pehe a ia kia lautolu, Ha ko e mao he tau loto ha mutolu ne tuku mai ai kia mutolu e Mose ke tiaki ha mutolu a tau hoana; ka e nakai pihia ke he kamataaga.
9 Ke tala atu foki e au kia mutolu, ko ia kua tiaki hana hoana, ka e nakai faivao a ia, ti hoana ke he taha, kua faivao a ia; ko ia foki ka fai hoana kia ia kua tiaki kua faivao a ia.
10 Kua pehe mai hana tau tutaki kia ia, Kaeke ke pihia e mahani he tane mo e fifine, laukauka he nakai fai hoana.
11 Ka kua tala age a ia kia lautolu, Nakai maeke ke talia he tau tagata oti e mena na, hoko lautolu kua foaki atu ki ai;
12 Ha ko e ha ha i ai e falu a eunuka, mena pihia he fanau mai; ha ha i ai foki e falu a eunuka kua fakaeunuka a lautolu he tau tagata; ha ha i ai foki e falu a eunuka ne fakaeunuka a lautolu e lautolu ha ko e kautu he lagi; ko ia kua maeke ke talia, kia talia ai e ia.
13 Ti ta mai ai kia ia e tau tama ikiiki, kia fakalago hana tau lima kia lautolu, mo e liogi, ka e hataki hana tau tutaki a lautolu.
14 Ka kua tala age a Iesu, Tokai e tau tama ikiiki ke o mai kia au, ti ua hataki a lautolu; ha ko e mena tuga a lautolu nai e tau tagata ha ha he kautu he lagi.
15 Kua fakalago hana tau lima kia lautolu, ati haele kehe ai a ia he mena ia.
16 Kitiala, kua hau taha tagata, kua pehe mai kia ia, Ko e akoako mitaki na e, ko e heigoa e mena mitaki ke eke e au ke moua ai e au e moui tukulagi?
17 Ati tala age ai a ia kia ia, Kua totoku he ha e koe au kua mitaki; nakai mitaki taha, ka ko e tokotaha hokoia, ko e Atua haia. Ka fia hoko a koe ke he moui, kia omaoma e koe ke he tau poaki.
18 Kua tala age a ia kia ia, Ko e poaki fe? Ati pehe age ai a Iesu, Ua keli tagata a koe; ua faivao a koe; ua kaiha a koe; ua fatipiko a koe;
19 Kia fakalilifu a koe ke he hau a matua tane mo e hau a matua fifine; katoa mo ē, Kia fakaalofa atu a koe kia ia ne katofia mo koe, kia tuga na koe kia koe.
20 Kua pehe mai e fuata kia ia, Kua omaoma e au e tau mena oti na tali mai he tote au; ka ko heigoa e mena ne toe nakai eke e au?
21 Kua tala age a Iesu kia ia, Kaeke ke manako a koe kia katoatoa hau a mahani mitaki, kia fano a koe mo e fakafua atu hau a tau mena, ti age ke he tau nonofogati, ati moua ai e koe e tau koloa loga ke he lagi; ati hau a, mo e mui mai kia au.
22 Kua logona he fuata e kupu ia, ati fano kehe ai a ia mo e momoko, ha ko e tagata muhukoloa a ia.
23 Ati tala age ai a Iesu ke he hana tau tutaki, Ko e moli, ke tala atu e au kia mutolu, ko e mena uka ke hu atu e tagata muhukoloa ke he kautu he lagi.
24 Ke tala atu foki e au kia mutolu, kua maeke vave ke hu atu e kamela ke he pu he nila, ka e uka ke hu atu e tagata muhukoloa ke he kautu he Atua.
25 Kua logona ai he hana tau tutaki, ati ofomate lahi ai a lautolu, kua pehe age, Ka pihia to maeke ke fakamoui a hai?
26 Ti kua kitekite atu ai a Iesu, kua pehe atu kia lautolu, Nakai maeke ke he tau tagata e mena nai, ka e maeke e tau mena oti ke he Atua.
27 Ti tala age ai e Peteru, kua pehe age kia ia, Kitiala, kua toka e mautolu e tau mena oti, ka e mumui atu kia koe; ko heigoa e mena ke moua ai e mautolu?
28 Ati pehe atu ai a Iesu kia lautolu, Ko e moli, ke tala atu e au kia mutolu, ko mutolu kua mumui mai kia au, ka nofo e Tama he tagata ke he hana nofoaiki lilifu ke he fakafouaga, ti nonofo ai foki a mutolu ke he tau nofoaiki ne hogofulu ma ua, ke fakafili ai e tau faoa a Isaraela ne hogofulu ma ua.
29 Kaeke ke toka e taha e tau fale, po ke tau matakainaga, po ke lafu mahakitaga, po ke matua tane, po ke matua fifine, po ke hoana, po ke tau fanau, po ke tau kaina, ha ko e haku a higoa, to moua e ia takiteau māna, to eke foki māna e moui tukulagi.
30 Ka e tokologa a lautolu ne mumua ke uta ke fakamui, ko lautolu foki ne fakamui, to mumua a lautolu.