Mataio 2:1-23
2 NE fanau a Iesu i Petelehema i Iutaia ke he vaha ia Herota e patuiki, kitiala, ko e tau makoi mai he fahi uta kua hohoko mai ki Ierusalema,
2 Kua pehe mai, Po ko fe a ia ne fanau mai ko e patuiki he tau tagata Iutaia? ha ko e mena kitia e mautolu hana fetu ke he fahi uta, kua o mai ai a mautolu ke hufeilo kia ia.
3 Kua logona he patuiki ko Herota, ati fakaatukehe ai a ia katoa foki mo Ierusalema oti fakalataha mo ia.
4 Ati fakapotopoto ai e ia e tau ekepoa ne mua oti, mo e tau tohikupu he motu, kua hūhu age kia lautolu, po ko fe ka fanau ai e Keriso.
5 Ati tala age ai a lautolu kia ia, Ko Petelehema i Iutaia; ha ko e mena kua tohi mai pehe he perofeta,
6 Ko koe foki ko Petelehema ke he fahi ko Iuta, kua nakai fakai ke to a koe ki tua ke fakateaga ke he tau iki a Iuta; ko e mena tupu mai ia koe e Iki, ke leveki ne ia haku motu ko Isaraela.
7 Kua ahi fakatekiteki age e Herota ke he tau makoi, ti kumi fakamakutu ai kia lautolu e vaha ne kitia ai e fetu.
8 Ati fakafano atu ai e ia a lautolu ki Petelehema, kua pehe age, O atu a a mutolu ke kumikumi fakamakutu ai e tama tote; ka kitia e mutolu, ti fakailoa mai e mutolu kia au, kia fina atu au ni ke hufeilo atu kia ia.
9 Kua fanogonogo atu a lautolu ke he patuiki, ti o ai a lautolu; kitiala, ko e fetu ne kitia e lautolu ke he fahi uta, kua mua atu ia lautolu, ati oti ka e tu mai ki luga he mena ne nofo ai e tama tote.
10 Kua kitia e lautolu e fetu, ati fiafia lahi ai a lautolu.
11 Kua huhū atu a lautolu ki fale; kua kitia ai e lautolu e tama tote fakalataha mo Maria hana matua fifine, ati fakaveveli fakafohifo ai a lautolu, mo e hufeilo atu kia ia, kua vetevete ai foki ha lautolu a tau taoga, ti age ai e lautolu kia ia e tau mena fakaalofa, ko e auro, mo e lipano, mo e muro.
12 Kua fakailoa kia lautolu ke he miti, aua neke liliu atu kia Herota, ati o atu ai a lautolu ke he taha hala ke he motu ha lautolu.
13 Kua o a lautolu, kitiala, ko e agelu he Iki kua fakakite mai kia Iosefa ke he miti, kua pehe mai, Matike a, ti uta e tama tote mo e hana matua fifine, mo e fehola ki Aikupito ke nonofo ai ato tala atu e au kia koe; ha ko e kumi ha ne fai e Herota e tama tote ke kelipopo a ia.
14 Kua matike a ia, kua uta e tama tote mo e hana matua fifine he po, ati o ai ki Aikupito.
15 Kua nonofo ai foki ato mate a Herota; kia fakamoli ai e kupu ne talahau mai he Iki ke he perofeta, kua pehe mai, Na ui e au haku tama i Aikupito.
16 Kua iloa e Herota kua fakavai a ia he tau makoi, ati ita lahi ai a ia, kua fakafano atu ai e ia e falu ke kelipopo e tau tama tane oti ha i Petelehema mo e hana tau katofia oti, ko e tau tama kua tau ua, katoa mo e tau tama ne tatao hifo ai, fakalata ke he vaha ne kumi fakamakutu ai e ia ke he tau makoi.
17 Ati fakamoli ai e kupu he perofeta ko Ieremia, kua pehe mai,
18 Kua logona e leo i Rama, ko e tagi aue, mo e tagi ualoa, mo e tagi tatuki fakalahi; kua tagi aue a Rahela ke he hana tau tama, nakai maeke foki ke fakana a ia, ha ko lautolu kua nakai ha i ai.
19 Kua mate a Herota, kitiala, ko e agelu he Iki kua fakakite mai kia Iosefa ke he miti i Aikupito,
20 Kua pehe mai, Matike a, ti uta e tama tote mo e hana matua fifine, ati o atu a ke he motu ko Isaraela; nukua mamate tuai a lautolu ne kumi e tama tote ke kelipopo.
21 Ti matike ai a ia kua uta e tama tote mo e hana matua fifine, ti o ai ke he motu ko Isaraela.
22 Kua logona e ia kua eke a Arekilao mo iki i Iutaia ke hukui aki a Herota e matua hana; ti matakutaku ai a ia ke fano ki ai. Ka kua fakailoa kia ia ke he miti, ati fano ai a ia ke he fahi ko Kalilaia.
23 Kua hoko foki ke he taha māga ne higoa ko Nasareta, kua nofo ai; kia fakamoli ai e kupu he tau perofeta, Ke talahaua a ia ko e Nasareta.