Mataio 20:1-34
20 HA ko e mena lata e kautu he lagi mo e taha patu he magafaoa, ne uhu fano ke vagavagahau mo e falu ke gahua ke he hana ulu vine, to totogi.
2 Kua vagavagahau a ia mo e tau tagata eke gahua, ke taha e aho mo e tenari; ati fakafano atu ai e ia a lautolu ke he hana ulu vine.
3 Ko e magaaho tolu foki kua fina age ai a ia, ti kitia ai e ia e falu kua tutu he male kua nakai gahua.
4 Ati tala age ai a ia kia lautolu, Ati o atu foki a mutolu ke he ulu vine, to ta atu e au kia mutolu e mena kua lata. Ti o ai a lautolu.
5 Ati liu foki fina age a ia ke he magaaho ono, mo e hiva, kua eke pihia foki.
6 Ko e magaaho hogofulu ma taha foki kua fina age ai a ia, ati kitia ai e ia e falu ne tutu kua nakai gahua, kua tala age foki a ia kia lautolu, Ko heigoa e mena ne tutu mai ai a mutolu ki hinai ke he aho oti kua nakai gahua?
7 Kua pehe mai a lautolu kia ia, Nakai tala mai e taha kia mautolu. Kua tala age a ia kia lautolu, Ati o a a mutolu foki ke he ulu vine, to moua e mutolu e mena kua lata.
8 Kua hoko ke he afiafi, ati tala age ai e iki hana e ulu vine ke he fekafekau pule hana, Ui a ke he tau eke gahua, ti age e totogi kia lautolu, kia kamata ia lautolu ne fakamui, kia hoko kia lautolu ne mumua.
9 Ti o mai ai a lautolu ne o age ke he magaaho hogofulu ma taha, kua takitaha mo e moua e lautolu e tenari.
10 Ati o mai ai a lautolu ne mumua, piko na lautolu ko e mena mua ha lautolu a totogi; ka kua takitaha foki mo e moua e lautolu e tenari.
11 Kua moua e lautolu, ati loma ai a lautolu ke he patu he magafaoa.
12 Kua pehe mai, Taha ni e magaaho ne gahua ai a lautolu nai ne fakamui, ka kua fakatatai e koe a lautolu mo mautolu, ne uka he gahua to lagina he aho.
13 Ati tala age ai a ia, kua pehe age ke he taha ha lautolu. Teme na e, nakai mahani kelea au kia koe; nakai kia vagahau a taua ke taha e tenari?
14 Ati toto a e mena hāu mo e fano; kua pule au ke age kia ia ne fakamui, ke tuga na koe.
15 Ka e nakai kia lata ke pule au ke he haku a tau mena? ke fakatetefu mai kia a koe he totonu au?
16 To pihia he mumua a lautolu ne fakamui, ka e fakamui foki a lautolu ne mumua; ha ko e mena tokologa a lautolu kua ui ki ai, ka e tokogaogao a lautolu kua fifili.
17 Kua hake a Iesu ki Ierusalema, ati uta ai e ia e tau tutaki ne tokohogofulu ma ua ke he magahehala hoko lautolu, ti pehe age kia lautolu.
18 Kitiala, ko e o hake ne fai a tautolu ki Ierusalema, to tuku atu ai e Tama he tagata ke he tau ekepoa ne mua mo e tau tohikupu; ti fakahala e lautolu a ia ke mate;
19 To tuku atu foki e lautolu a ia ke he tau motu kehe, kia va e lautolu, mo e fahi, mo e fakasatauro a ia; ka e matike mai foki e ia ke he aho tolu.
20 Ati hau ai e matua fifine he fanau tane a Sepetaio fakalataha mo e na tama tane hana, kua hufeilo mo e olelalo mai taha mena kia ia.
21 Ti pehe atu ai a ia kia ia, Kua loto a koe ke ha? Kua tala mai a ia kia ia. Kia tala age a koe, kia nonofo e na tama ua nai haku, ko e taha ke he hau a fahi matau, mo e taha ke he hau a fahi hema ke he kautu hāu.
22 Ti kua tala age ai a Iesu, kua pehe age, Nakai iloa e mua e mena kua ole mai ai a mua. To maeke nakai ia mua ke inu e kapiniu kua inu ai au, mo e papatiso foki a mua ke he papatisoaga kua papatiso ai au? Kua tala mai a laua kia ia, Mena maeke ia maua.
23 Ati tala age ai a ia kia laua, To inu ni a mua ke he kapiniu haku; ko e papatisoaga foki kua papatiso ai au to papatiso ai a mua; ka ko ia ke nofo ke he haku a fahi matau mo e haku a fahi hema, nakai haku ia ke ta atu ke he falu, ka e hoko lautolu kua taute ai e mena ia he haku a Matua.
24 Kua logona ai he tokohogofulu, ati hukia ai ha lautolu a tau loto he matakainaga tokoua.
25 Ka kua ui atu a Iesu kia lautolu, kua pehe atu, Kua iloa e mutolu, ko e tau iki he tau motu kehe kua pule kia lautolu, ko e tau tagata lalahi foki kua pule kia lautolu,
26 Ka e nakai pihia a mutolu; ka fia tagata lahi e taha ia mutolu, kia eke a ia mo fekafekau ha mutolu;
27 Ka manako foki taha ia mutolu ke mua a ia, kia eke a ia mo tupa ha mutolu.
28 Kia tuga e Tama he tagata nakai hau a ia kia fekafekau mai e tau tagata kia ia, ka kia fekafekau atu a ia, kia foaki atu foki hana moui mo lukutoto ke hukui aki e tau tagata tokologa.
29 Kua o kehe a lautolu i Ieriko, ati mumui mai ai kia ia e lanu tagata tokologa.
30 Kitiala, kua nonofo ke he kauhala e na tagata matapouli, kua logona e laua ko Iesu ha ne haele age, ati tauhea mai ai a laua, kua pehe mai, Ko e Iki na e, ko e tama a Tavita, kia fakaalofa mai a koe kia maua.
31 Ati hataki ai he lanu tagata a laua kia fakamamate a laua; ka kua au atu ai he tauhea a laua, kua pehe mai, Ko e Iki na e, ko e tama a Tavita, kia fakaalofa mai a koe kia maua.
32 Ti tu ai a Iesu, kua ui age kia laua, kua pehe age, Ko e heigoa e mena ne manako a mua ki ai ke eke e au ma mua?
33 Ati pehe mai ai a laua kia ia, Ko e Iki na e, kia ala ha maua a tau mata.
34 Ti hofihofi ai e fakaalofa a Iesu, kua piki atu ke he tau mata ha laua; ti ala ai agataha ha laua a tau mata, ati mumui ai a laua kia ia.