Mataio 21:1-46
21 KUA tata tuai a lautolu ki Ierusalema, kua hohoko ki Petefake ke he mouga ko Olive, ati fakafano atu ai e Iesu e na tutaki tokoua,
2 Kua pehe atu kia laua, Ati o atu a a mua ke he māga ha i mua ha mua; ti kitia ai agataha e mua e asini kua fakave, mo e punua asini fakalataha mo ia; ti vevete la e mua, mo e takitaki mai ai kia au.
3 Kaeke foki ke vagahau mai e taha ha kupu kia mua, kia tala age a mua. Kua manako ai e Iki; to fakafano mai ai agataha e ia.
4 Ne hoko e tau mena oti nai, kia fakamoli ai e kupu he perofeta, ne pehe mai,
5 Kia tala age a mutolu ke he tama fifine a Siona, Kitiala, ha ne haele mai kia koe hau a Patuiki, kua totonu a ia, kua heke e ia e asini, ko e punua asini.
6 Ti o ai e na tutaki, kua eke e laua tuga he tala age ai e Iesu kia laua.
7 Kua takitaki mai e laua e asini mo e punua asini, kua fakatoka ai ha lautolu a tau tapulu i luga, mo e fakaheke ai a ia.
8 Ko e lanu tagata tokologa kua faliki ha lautolu a tau tapulu ke he puhala; ko e falu foki kua halahala e lautolu e tau la akau, mo e faliki ke he puhala.
9 Ko e lanu tagata ne mumua, mo lautolu ne mumui, kua tauhea, kua pehe mai, Hosana ke he tama a Tavita! Kia monuina a ia kua haele mai ke he higoa he Iki; Hosana ke he tau mena i luga muatua.
10 Kua hoko a ia ki Ierusalema, ti fakalutukia ai e māga oti ia, kua pehe age, Ko hai kia hanai?
11 Ati pehe atu ai e lanu tagata, Ko Iesu hanai, ko e perofeta mai Nasareta i Kalilaia.
12 Kua hu atu a Iesu ke he faituga he Atua, ati vega oti ai e ia ki fafo a lautolu ne fefakafuaaki ke he faituga, ne tulei atu foki e ia e tau lapa ha lautolu ne fakafua tupe, mo e tau nofoa ha lautolu ne fakafua lupe;
13 Kua pehe age a ia kia lautolu, Kua tohi, To talahaua hoku fale, ko e fale liogi, ka kua eke e mutolu mo ana he tau tagata fofo mena.
14 Ati o mai ai kia ia ke he faituga e tau matapouli, mo e tau kulikuli; kua fakamalolo e ia a lautolu.
15 Kua kitia he tau ekepoa ne mua mo e tau tohikupu e tau mana kua eke e ia, ko e tau tama foki kua tauhea ke he faituga, kua pehe age, Hosana ke he tama a Tavita! ati hukia ai e tau loto ha lautolu;
16 Ti pehe mai ai a lautolu kia ia, Kua logona nakai e koe e tau kupu ha lautolu? Ati tala age ai a Iesu kia lautolu, E; nakai kia totou e mutolu, Ne taute e koe e fakahekeaga mai he tau gutu he tau tama mukemuke mo e tau tama kai huhu?
17 Ati toka ai e ia a lautolu, ka e haele atu ki tua he māga ki Petania, kua nofo ai.
18 Ko e pogipogi ha ne liu atu a ia ke he māga, ti fia taumafa a ia.
19 Kua kitia atu e ia e taha mati ke he kauhala, kua hoko atu ki ai, ti nakai moua ai ha mena ko e tau lau hokoia; ati pehe age ai a ia ki ai, Aua neke liu foki tupu mai ha fua ia koe tukulagi tukumuitea. Ati mago ai agataha e mati.
20 Kua kitia he tau tutaki, ti ofomate ai a lautolu, kua pehe age, Kua mago vave pihia e mati nai!
21 Kua tala age a Iesu, kua pehe age kia lautolu, Ko e moli, ke tala atu e au kia mutolu, Kaeke kua toka ia mutolu e tua, mo e nakai mahalohalo a mutolu, ti eke ai e mutolu, ka e nakai ko e mena hokoia ne eke ke he mati; kaeke ke tala age e mutolu ke he mouga nai, Kia lagaaki a koe, mo e liti ke he tahi; ti eke ai ni.
22 Ko e tau mena oti foki ke ole mai ai a mutolu ke he liogi mo e tua ki ai, to moua e mutolu.
23 Kua hu atu a ia ke he faituga, ha ne fakaako, ti o mai ai kia ia e tau ekepoa ne mua mo e tau patu he motu, kua pehe mai, Ko e heigoa e pule kua eke ai e koe e tau mena na? ti age e hai kia koe e pule nai?
24 Ati tala age ai e Iesu, kua pehe age kia lautolu, Ke hūhu atu foki au kia mutolu e taha kupu; kaeke ke talahau mai e mutolu kia au e mena ia, ati talahau atu ai e au e pule kua eke ai e au e tau mena nai.
25 Ko e papatisoaga a Ioane, mai fe kia? mai he lagi kia, po ke mai he tau tagata? Ati vagavagahau ai a lautolu, kua pehe, Kaeke ke tala atu a tautolu, Mai he lagi; ti pehe mai a ia kia tautolu, Ti ko e ha nakai talia ai e mutolu a ia?
26 Kaeke foki ke tala atu a tautolu, Mai he tau tagata; kua matakutaku a tautolu ke he lanu tagata; ha ko e taofi ha lautolu oti kia Ioane, ko e perofeta a ia.
27 Ti kua tali mai ai a lautolu kia Iesu, kua pehe mai, Nakai iloa e mautolu. Ati tala atu ai a ia kia lautolu, Nakai tala atu foki e au kia mutolu e pule kua eke ai e au e tau mena nai.
28 Ka e fefe kia ha mutolu a manatu? Ko e taha tagata ne tokoua e na tama tane hana; kua fina atu a ia ke he tama uluaki, kua pehe atu, Teme na e, fano a koe ke he aho nai ke gahua ke he haku a ulu vine.
29 Ati tala mai ai a ia, kua pehe mai, Nakai fano au, Ka e tokihala fakamui a ia, ti fano.
30 Kua fina atu foki a ia ke he tama fakamui, kua pihia foki hana kupu kia ia. Ati tala mai ai a ia, kua pehe mai, Ko e Iki na e, to fano au; ka e nakai ni fano a ia.
31 Ko hai ia laua tokoua ne eke e loto he matua ha laua? Ati pehe mai ai a lautolu kia ia, Ko e tama uluaki. Ati pehe age ai a Iesu kia lautolu, Ko e moli, ke tala atu e au kia mutolu, Kua mumua atu kia mutolu e tau telona mo e tau fifine fakataka ke he kautu he Atua.
32 Ha ko e mena hau a Ioane kia mutolu ke he puhala he tututonu, ti nakai talia e mutolu a ia; ka e talia a ia he tau telona mo e tau fifine fakataka; kua iloa foki e mutolu, ka e nakai tokihala fakamui a mutolu, mo e talia a ia.
33 Kia fanogonogo mai a mutolu ke he taha fakatai, Ko e taha patu ne to e ulu vine, kua puipui e ia ke he pa, kua keli ai e mena ke hihina ki ai e huhua vine, kua ati ai foki e kolo, kua tuku atu e ia ke he tau tagata gahua vine; ati fano ai a ia he fenoga ke he motu kehe.
34 Kua tata tuai e vaha ke motua ai e fuaaga, ati fakafano atu ai e ia hana tau fekafekau ke he tau tagata gahua vine, kia moua ai hana tau fua.
35 Ati tapatapaki ai he tau tagata gahua vine hana tau fekafekau; kua fahi e lautolu taha, ti kelipopo taha, ka e taulitimaka taha.
36 Ati liu foki fakafano atu e ia falu a fekafekau, kua mua he tokologa ia lautolu ne mumua; ka e eke pihia foki a lautolu kia lautolu.
37 Ati fakafano fakamui atu ai e ia hana tama tane kia lautolu, kua pehe, To maimaina a lautolu ke he haku a tama tane.
38 Ka ko e tau tagata gahua vine, kua kitia atu hana tama tane, ati vagavagahau ai a lautolu, Ko e hakeaga hanā; o mai la ke kelipopo e tautolu a ia, ka e eke ma tautolu hana kaina.
39 Ati tapaki ai e lautolu a ia, kua tulei atu a ia ki tua he ulu vine, ti kelipopo ai e lautolu a ia.
40 Hanai, ka hau e iki hana e ulu vine, to eke ha e ia ke he tau tagata gahua vine ia?
41 Ati tala mai ai a lautolu kia ia, To fakaotioti ni e ia e tau tagata mahani kelea ia; ti tuku atu e ia e ulu vine, ke he falu a tagata gahua vine, ko lautolu ke ta age kia ia e tau fua ke he tau tau.
42 Kua tala age a Iesu kia lautolu, Nakai kia totou e mutolu ke he tau Tohi, Ko e maka ne tiaki he tau tagata ati fale, kua eke a ia mo maka malokuaga tapa ki luga; ko e mena haia ne eke he Iki, kua ofo a tautolu he kitekite ki ai?
43 Ko e mena ia ke tala atu ai e au kia mutolu, To uta kehe ia mutolu e kautu he Atua, ka e age ke he taha motu ke ta mai ai e tau fua hana.
44 Ko ia ke veli ki luga he maka ia, to mafatifati a ia; ka ko ia ka to hifo ki ai e maka to malipilipi ai a ia.
45 Kua fanogonogo e tau ekepoa ne mua mo e tau farasaio ke he hana tau fakatai, ti iloa ai e lautolu, ko lautolu ni ne vagahau mai ai a ia.
46 Ati fia tapaki ai e lautolu a ia, ka kua matakutaku a lautolu ke he lanu tagata, ha ko e taofi ha lautolu ko e perofeta a ia.