Mataio 22:1-46
22 ATI liu foki taute e Iesu e tau fakatai, ke talahau atu kia lautolu, kua pehe atu,
2 Kua fakatai e kautu he lagi ke he taha patuiki ne eke e taonaga mo e hana tama tane.
3 Kua fakafano atu e ia hana tau fekafekau ke tala age kia lautolu ne ogo ki ai ke o mai ke he taonaga. Ka e nakai fia loto a lautolu ke o mai.
4 Ati liu foki fakafano atu ai e ia e falu a fekafekau, kua pehe atu, Kia tala age e mutolu kia lautolu ne ogo ki ai, Kitiala, kua taute tuai e au haku a tau mena kai, kua tamate tuai haku a tau povi mo e tau mena gako, kua taute foki e tau mena oti; ati o mai a ke he taonaga.
5 Ka kua fakateaga ki ai a lautolu, kua takitaha mo e fano kehe, ko e taha ke he hana kaina, mo e taha ke he hana fakafua koloa.
6 Ka ko e falu, kua tapatapaki e lautolu hana tau fekafekau, kua fakakelea mo e kelipopo a lautolu.
7 Kua fanogonogo e patuiki, ati vale lahi ai a ia, kua fakafano atu e ia hana tau kau, kua tamate e tau tagata keli tagata ia, mo e hunuhunu ha lautolu a māga.
8 Ati tala age ai a ia ke he hana tau fekafekau, Kua taute tuai e taonaga, ka e nakai aoga a lautolu ne ogo ki ai.
9 Hanai, kia o atu a mutolu ke he tau halatu, ko lautolu oti ka kitia e mutolu, kia ogo age ki ai e mutolu e taonaga.
10 Ati o atu ai e tau fekafekau ia ke he tau hala, kua fakapotopoto a lautolu oti ne kitia e lautolu, ko lautolu ne kelea katoa mo lautolu ne mitaki; ati puke ai e mena ne eke ai e taonaga kia lautolu ne tatakoto ke kai mena ai.
11 Ati hu atu ai e patuiki ke kitekite kia lautolu ne tatakoto ke kai mena ai; ti kitia ai e ia e taha tagata nakai tapulu ke he tapulu he taonaga.
12 Ati tala age ai a ia kia ia, Teme na e, po ke hu mai fefe a koe ke he mena nai kua nakai tapulu a koe ke he tapulu he taonaga? Ti nakai lea ai a ia.
13 Ati tala age ai e patuiki ke he tau fekafekau, Kia lili e mutolu hana tau hui, mo e hana tau lima, mo e liti a ia ke he pouli i fafo, ha ha i ai e tagi aue mo e konoi he tau nifo.
14 Ha ko e mena tokologa a lautolu kua ui ki ai, ka e tokogahoa a lautolu kua fifili.
15 Ati o age ai e tau farasaio kua pulega po ke tauhele fefe e lautolu a ia ke he hana tau kupu.
16 Ati fakafano atu ai e lautolu kia ia e tau tutaki ha lautolu fakalataha mo e tau Herotiano, kua pehe atu, Ko e akoako na e, kua iloa e mautolu kua fakamoli a koe, kua fakaako foki e koe e puhala he Atua mo e fakamoli, ti nakai matakutaku a koe kia taha, ha ko e mena nakai fakamailoga tagata e koe.
17 Hanai, kia talahau mai e koe kia mautolu, po ke heigoa e taofi hāu? po ke lata kia ke uta e telu kia Kaisara, po ke nakai.
18 Ka kua fioia e Iesu ha lautolu a tau loto kelea, ti pehe atu a ia, Ko e tau tagata fakavai na e, ko e heigoa e mena kua kamatamata mai ai e mutolu au?
19 Kia fakakite mai kia au ha tupe he telu. Ati age ai e lautolu kia ia e tenari.
20 Ti kua tala age ai a ia kia lautolu, Ko e fakatino ha hai a enei mo e tohi ē?
21 Kua tala atu a lautolu kia ia, Ha Kaisara, Ti pehe mai a ia kia lautolu, Hanai, ko e tau mena a Kaisara, kia uta a e mutolu kia Kaisara; ka ko e tau mena he Atua, kia uta a ke he Atua.
22 Kua fanogonogo ai a lautolu ti ofomate a lautolu; ti toka e lautolu a ia, ka e o kehe.
23 Ko e aho ia, ne o mai ai kia ia e tau satukaio, ko lautolu kua taofi, nakai tuai tu mai taha kua mate, kua hūhu mai a lautolu kia ia,
24 Kua pehe mai, Ko e akoako na e, kua tala mai a Mose, Kaeke ke mate taha kua nakai fai tama kia hoana e matakainaga hana ke he hana takape kia fanau ai ha tama mo e matakainaga hana.
25 Ne nonofo ia mautolu e matakainaga ne tokofitu; ne fai hoana e taokete, kua mate foki a ia; nakai fai tama a ia ati tuku atu ai hana hoana mo e matakainaga hana.
26 Na pihia foki a ia ne tokoua aki mo ia ne tokotolu aki, ati oti ka e hoko ke he tokofitu.
27 Ka e mate fakamui fakaoti e fifine.
28 Hanai, ka liliu foki tutu mai, ko hai ia lautolu ne tokofitu ke eke māna e hoana? ha ko e mena hoana oti kia ia.
29 Ati tala age ai a Iesu, kua pehe age kia lautolu, Kua hehe tuai a mutolu, he nakai iloa e mutolu e tau Tohi, mo e malolo he Atua.
30 Ha ko e mena ka liliu foki tutu mai, ti nakai tuai fai hoana a lautolu, po ke fai tane, ka e tuga e tau agelu he Atua a lautolu ha ha he lagi.
31 Ka e nakai kia totou e mutolu e kupu he Atua kia mutolu, ke he liliu tutu mai a lautolu kua mamate, kua pehe mai,
32 Ko au nai ko e Atua a Aperahamo, ko e Atua foki a Isaako, ko e Atua foki a Iakopo; ko e Atua nakai ko e Atua a ia ha lautolu kua mamate, ka ko lautolu kua momoui.
33 Kua fanogonogo e lanu tagata, ti ofomate na lautolu he hana tau kupu.
34 Kua fanogonogo e tau farasaio kua nakai feia ha lea kia ia e tau satukaio, ti kua fakapotopoto fakalataha mai ai a lautolu,
35 Ti hūhu kamatamata kia ia e taha ia lautolu, ko e ako fakatufono, kua pehe mai,
36 Ko e akoako na e, ko e poaki fe he fakatufono kua lahi?
37 Ti pehe atu a Iesu kia ia, Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa.
38 Ko e poaki fakamua hanā mo e lahi.
39 Kua pihia foki mo ia ne ua aki, Kia fakaalofa atu a koe kia ia ne katofia a mua, kia tuga foki na koe kia koe.
40 Ko e na poaki ua ia kua tautau ai e fakatufono oti mo e tau perofeta.
41 Kua fakapotopoto e tau farasaio, ati hūhu atu ai a Iesu kia lautolu,
42 Kua pehe atu, Ko e heigoa e taofi ha mutolu ke he Keriso? ko e tama ha hai a ia? ati tala mai ai a lautolu kia ia, Ko e tama a Tavita.
43 Ati tala age ai a ia kia lautolu, Ti kua totoku fefe e Tavita a ia ke he Agaga, ko ia ko e hana Iki, kua pehe mai,
44 Kua tala age e Iki ke he haku a Iki, Kia nofo a koe ke he haku a fahi matau, ato eke e au a lautolu kua fai fi kia koe mo fakatuagahui hāu.
45 Hanai, kaeke kua totoku e Tavita a ia ko e, Iki, ke eke fefe a ia mo tama hana?
46 Ka e nakai maeke ia taha ke tali atu ha kupu kia ia; tali mai foki he aho ia, nakai tuai fakamalolo taha ke hūhu ha mena kia ia.