Mataio 23:1-39
23 ATI vagahau ai a Iesu ke he lanu tagata mo e hana tau tutaki,
2 Kua pehe atu, Kua nonofo e tau tohikupu mo e tau farasaio ke he nofoa a Mose;
3 Haia, ko e tau mena oti ke tala atu ai a lautolu kia mutolu ke omaoma ki ai, kia omaoma a mutolu ki ai mo e eke ai e mutolu; ka e aua neke fifitaki a mutolu ke he ha lautolu a tau mahani; ha kua talahau e lautolu, ka e nakai ni eke e lautolu.
4 Nukua haihai e lautolu e tau kavega mamafa mo e uka, ti tuku ke he tau ua he tau tagata; ka e nakai mafai a lautolu ke piki atu ki ai ha matalima ha lautolu.
5 Kua eke e lautolu ha lautolu a tau mena oti, kia kitia ai he tau tagata; kua fakalaulahi foki e lautolu ha lautolu a tau filateri, mo e fakalahi e tau kala tapulu ha lautolu.
6 Kua fiafia foki a lautolu ke he mena mua ke tatakoto ai ke he tau kaiaga mena, mo e tau nofoaga uho ke he tau sunako,
7 Kia fakaalofa foki kia lautolu ke he tau male, kia ui foki a lautolu he tau tagata, Rapai na e, Rapai na e.
8 Ka ko mutolu, aua neke ui a mutolu Rapai; ha ko e mena tokotaha ha mutolu a takitaki, ko e Keriso haia; ka ko mutolu oti, ko e matakainaga a mutolu.
9 Aua foki neke ui e mutolu taha ke he lalolagi ko e matua ha mutolu; ha ko e mena tokotaha ha mutolu a Matua, ko ia ha he lagi.
10 Ti aua neke ui a mutolu ko e tau takitaki; ha ko e mena tokotaha ha mutolu a Takitaki, ko e Keriso haia.
11 Ka ko e tagata ia mutolu kua mua, kia eke a ia mo fekafekau ha mutolu.
12 Ko ia ne fakatokoluga e ia a ia, to fakatokolalo a ia; ka ko ia ne fakatokolalo e ia a ia, to fakamatalahi a ia.
13 Oi fakaalofa kia mutolu e tau tohikupu, mo e tau farasaio, ko e tau tagata fakavai! ha ko e mena pa e mutolu e kautu he lagi ke he tau tagata; ha kua nakai huhu a mutolu ki ai, ti nakai toka foki e mutolu ke huhu ki ai a lautolu ha ne huhu ki ai.
14 Oi fakaalofa kia mutolu e tau tohikupu, mo e tau farasaio, ko e tau tagata fakavai! ha kua fakaoti e mutolu e tau fale he tau fifine takape, kua fakalevaleva foki ha mutolu a tau liogi ke eke mo ufiufi, ko e mena ia ke au atu ai ni e fakahala ha mutolu.
15 Oi fakaalofa kia mutolu e tau tohikupu mo e tau farasaio, ko e tau tagata fakavai! kua takai e mutolu e tahi mo e fonua kia mafoki mai ai taha; ka moua foki a ia, ti eke e mutolu a ia mo tagata Kehena kua mua foki a ia kia mutolu.
16 Oi fakaalofa kia mutolu ko e tau takitaki matapouli! kua pehe mai a mutolu, Ka omonuo taha ke he faituga ko e mena noa ia; ka ko ia kua omonuo ke he auro he faituga, kua mau a ia.
17 Ko mutolu e tau tagata goagoa mo e matapouli; ha ko e mena fe kua mua, ko e auro kia, po ke faituga kua tapu ai e auro?
18 Mo e mena ē foki, Ka omonuo taha ke he fatapoa ko e mena noa ia; ka ko ia kua omonuo ke he poa ha i luga hana, kua mau a ia.
19 Ko mutolu e tau tagata goagoa, mo e matapouli; ha ko e mena fe kua mua, ko e poa kia, po ke fatapoa kua tapu ai e poa?
20 Hanai, ko ia kua omonuo ke he fatapoa, kua omonuo a ia ki ai, katoa mo e tau mena oti ha i luga hana;
21 Ko ia foki kua omonuo ke he faituga, kua omonuo a ia ki ai, katoa mo ia ne haele ai.
22 Ko ia foki kua omonuo ke he lagi, kua omonuo a ia ke he nofoaiki he Atua, katoa mo ia ne nofo ai.
23 Oi fakaalofa kia mutolu e tau tohikupu mo e tau farasaio, ko e tau tagata fakavai! ha kua ta atu e mutolu e mena ne hogofulu aki e mili, mo e aneto, mo e kumina; ka kua tiaki e mutolu e tau mena he fakatufono ne mua, ko e mahani tututonu, mo e fakaalofa, mo e fakamoli; kua lata ni kane eke e mutolu e tau mena ia, ti ua tiaki foki e tau mena na.
24 Ko mutolu e tau takitaki matapouli, kua lehu kehe e mutolu e namu, ka kua folofua e mutolu e kamela.
25 Oi fakaalofa kia mutolu e tau tohikupu, mo e tau farasaio, ko e tau tagata fakavai! ha kua fakamea e mutolu e tua he kapiniu mo e kumete, ka ko loto kua puke namo ke he fofo mena mo e mahani kelea.
26 Ko koe na, e farasaio matapouli, kia fakamea fakamua e koe e liu he kapiniu mo e kumete, kia mea foki mo e tua.
27 Oi fakaalofa kia mutolu e tau tohikupu mo e tau farasaio, ko e tau tagata fakavai! ha kua fakataufata a mutolu mo e tau tukuaga kua fakahina, kua fulufuluola i fafo, ka ko loto kua puke ke he tau huimotua he tau tagata mamate, mo e tau mena kelea oti.
28 Ke pihia foki a mutolu, ko fafo kua tuga e tau tagata tututonu ki mua he tau tagata, ka ko loto kua puke a mutolu ke he pikopiko mo e mahani kelea.
29 Oi fakaalofa kia mutolu e tau tohikupu, mo e tau farasaio, ko e tau tagata fakavai! ha kua ati e mutolu e tau tukuaga he tau perofeta, kua taute foki e mutolu e tau tukuaga he tau tagata tututonu,
30 Kua pehe mai foki a mutolu, Ane nonofo ai a mautolu ke he vaha he tau matua ha mautolu, po kua nakai kau fakalataha a mautolu mo lautolu ke he keliaga he tau perofeta.
31 Hanai, kua fakakite e mutolu a mutolu ko e tau fanau a mutolu ha lautolu ne kelipopo e tau perofeta.
32 Ati fakapuke la e mutolu e fafatiaga he tau matua ha mutolu.
33 Ko e tau gata, ko e tau fanau he tau gata gagau! to fehola fefe a mutolu he fakahala i Kehena?
34 Kitiala, ko e mena ia ke fakafano atu ai e au kia mutolu e tau perofeta, mo e tau tagata pulotu, mo e tau tohikupu, to kelipopo e mutolu e falu ha lautolu mo e fakasatauro, to fahi e mutolu e falu ha lautolu ke he tau sunako ha mutolu, mo e favale kia lautolu ke he taha māga mo e taha māga;
35 Kia hoko kia mutolu e tau toto oti he tau tagata tututonu, kua fakamaligi ke he lalolagi, ke kamata mai he toto a Apelu ko e tagata tututonu, to hoko ke he toto a Sakaria ko e tama a Parakaio, ne kelipopo e mutolu ke he vaha loto he faituga mo e fatapoa.
36 Ko e moli, ke tala atu e au kia mutolu to hoko mai e tau mena oti ia ki luga he hau nai.
37 Ierusalema na e, Ierusalema na e, ko koe ne kelipopo e tau perofeta, mo e taulitimaka a lautolu ne fakafano atu kia koe, kua lagaloga he manako au ke fakapotopoto hau a tau fanau, tuga ne moa kua fakapulupulu hana tau punua ki lalo hifo he hana tau tapakau; ka e nakai mafai a mutolu!
38 Kitiala kua toka atu kia mutolu ha mutolu a fale kua moumou.
39 Ha ko e mena tala atu e au kia mutolu, nakai tuai kitia mai e mutolu au, ato pehe mai a mutolu, Kia monuina a ia kua haele mai ke he higoa he Iki.