Mataio 26:1-75
26 KUA fakahiku e Iesu e tau kupu oti ia, ti tala age ai a ia ke he hana tau tutaki,
2 Kua iloa e mutolu ka mole ua e aho, ti eke ai e paseka, kua tuku atu foki e Tama he tagata kia fakasatauro.
3 Ko e vaha ia kua fakapotopoto ai e tau ekepoa ne mua, mo e tau tohikupu, mo e tau patu he motu ke he fale he ekepoa ne mua, ko Kaiafa hana higoa;
4 Kua pulega a lautolu ke he taha fakavai ke maeke ai he tapaki mo e kelipopo a Iesu.
5 Ka kua pehe a lautolu, Aua ia, mo e galue, neke fakalagalaga ai e tau tagata.
6 Ha i Petania a Iesu ke he fale a Simona e lepela,
7 Ti hau ai kia ia e fifine mo e lupo alapasa ha i ai e lolo manogi fakafua uka, ti liligi ai e ia ke he hana fufuga ha ne takoto a ia ke taumafa ai.
8 Kua kitia he hana tau tutaki, ti hukia ai ha lautolu a tau loto, kua pehe age a lautolu, Kua moumou he ha e mena na?
9 Ha ko e mena ane fakafua e lolo manogi na, po kua loga e tupe ke moua ai ke age ke he tau nonofogati.
10 Ka kua fioia e Iesu, ti pehe age a ia kia lautolu, Kua fakalavelave mo ha e mutolu e fifine? ha ko e mena mitaki ne eke e ia kia au nai.
11 Ha kua nonofo mau ia mutolu e tau nonofogati; ka ko au nakai nofo mau au ia mutolu.
12 Ha kua liligi e ia e lolo manogi nai ke he haku a tino, kua eke ai e ia mo fakatakaiaga he haku a tanuaga.
13 Ko e moli, ke tala atu e au kia mutolu, ko e tau mena oti he lalolagi ke fakamatala atu ki ai e tala mitaki nai, to talahaua ai foki e mena nai kua eke e ia ke eke mo fakamanatuaga kia ia.
14 Ti fano ai e taha he tokohogofulu ma ua ne higoa ko Iuta Isakariota, ke he tau ekepoa ne mua.
15 Kua pehe age ki ai, Ko heigoa e mena ke ta mai e mutolu māku, ka e afo e au a ia kia mutolu? ati fafati ai e lautolu kia ia e tau tupe ne tolugofulu;
16 Tali mai foki he aho ia, kua kolo e ia ke moua taha magaaho ke maeke vave ai ke afo a ia.
17 Ko e aho fakamua he tau areto nakai fakaea, kua o mai ai e tau tutaki kia Iesu, kua pehe mai kia ia, Po ke mena fe kua finagalo a koe ki ai ke taute ai e mautolu ke taumafa ai e koe e paseka?
18 Ti pehe atu a ia, Kia o atu a ke he māga ke he taha tagata, mo e tala age kia ia, Kua poaki mai e akoako, kua tata tuai haku a vaha; to eke e mautolu e paseka mo e tau tutaki haku ke he fale hāu.
19 Ti eke he tau tutaki tuga ne tala age e Iesu kia lautolu; kua taute ai foki e paseka.
20 Kua hoko ke he afiafi, ti takoto ai a ia ke taumafa fakalataha mo e tokohogofulu ma ua.
21 Ha ne kai mena a lautolu, ti tala age ai a ia, Ko e moli, ke tala atu e au kia mutolu, to afo au he taha ia mutolu.
22 Ati momoko lahi ai ha lautolu a tau loto, kua takitaha a lautolu mo e tala age kia ia, Ko e Iki na e, ko au kia?
23 Ti tala age ai a ia, kua pehe age, Ko ia ka fufui hana lima fakalataha mo e haku ke he kumete, ko ia ni ke afo au.
24 To fano ni e Tama he tagata tuga ne tohia kia ia; ka ko e tagata ka afo e Tama he tagata, oi te fakaalofa ke he tagata ia, mitaki kia ia ane nakai fanau mai a ia.
25 Ati tala age ai a Iuta ko ia ne afo a ia, kua pehe mai, Rapai na e, ko au kia? Kua tala age a ia kia ia, Haia.
26 Ha ne kai mena a lautolu, ti toto ai e Iesu e areto, mo e fakaaue, ti tofitofi, mo e age ke he tau tutaki, kua pehe age, Kia toto a mo e kai; ko e haku a tino a enei.
27 Kua toto foki e ia e kapiniu, mo e fakaaue; ti age ai e ia kia lautolu, kua pehe age, Kia inu ai a a mutolu oti kana;
28 Ha ko e haku a toto a enei, ko e toto he maveheaga fou, kua fakamaligi mo e tau tagata tokologa ke fakamagalo aki e tau hala.
29 Ka e tala atu e au kia mutolu, nakai tuai inu au ke he fua vine nai, ato hoko ke he aho ia ke inu ai au ke he uaina fou fakalataha mo mutolu ke he kautu he haku a Matua.
30 Kua lologo a lautolu e tau lologo, ti o atu ai a lautolu ke he mouga ko Olive.
31 Ti tala age ai a Iesu kia lautolu, To tupetupe a mutolu oti ha ko au ni ke he po nai; ha kua tohi, To ta e au e leveki mamoe, ti mavehevehe ai e fuifui mamoe.
32 Ka mole haku a liu tu mai, ti mua atu ai au kia mutolu ki Kalilaia.
33 Ti tala age a Peteru, kua pehe age kia ia, Pete ni he tupetupe e tau tagata oti kia koe, ka e nakai tupetupe ai au tukulagi.
34 Kua pehe age a Iesu kia ia, Ko e moli ke tala atu e au kia koe, ko e po nai ni, ka e nakaila kō e tau moa, to fakatikai lagatolu mai ai a koe kia au.
35 Ti tala age a Peteru kia ia, Pete ni he mamate fakalataha a taua mo koe, ka e nakai ni fakatikai e au a koe. Ne talahau pihia foki he tau tutaki oti kana.
36 Ti hoko ai a Iesu fakalataha mo lautolu ke he fonua kua higoa ko Ketesemane; ti pehe age a ia ke he tau tutaki, Kia nonofo a mutolu i hinai, ka e fano au ke liogi ke he mena ko.
37 Ti uta e ia a Peteru mo e na tama tane tokoua a Sepetaio, ti kamata ai a ia ke momoko, mo e mānu lahi.
38 Ati tala age ai a ia kia lautolu, Kua momoko lahi haku a loto ke hoko ke he mate; kia nonofo a mutolu i hinai, mo e mataala a mutolu fakalataha mo au.
39 Kua ue atu fakatote a ia ki mua, ti fakaveli fakafohifo ai a ia mo e liogi, kua pehe atu, Hoku Matua na e, kaeke kua maeke, kia uta kehe e kapiniu nai ia au; ka e aua neke eke hoku loto, ka ko e hau a finagalo.
40 Ti haele age a ia ke he tau tutaki, kua moua a lautolu ha ne momohe; ti tala age a ia kia Peteru, Kua pihia kia a mutolu, kua nakai fahia ke mataala fakalataha mo au ke he magapo taha?
41 Kia mataala a mutolu mo e liogi, neke hoko mai e kamatamata kia mutolu; kua makai ni e loto, ka ko e tino kua lolelole.
42 Kua liu haele atu a ia, ko e lagaua ia, kua liogi, kua pehe atu, Hoku Matua na e, ka nakai maeke he uta kehe e kapiniu nai ia au, ato inu ai au, kia eke a hau a finagalo.
43 Ti haele age a ia kua moua a lautolu kua liliu foki momohe; ha kua mao ha lautolu a tau fifimata.
44 Ti toka e ia a lautolu, kua liu atu foki, kua liogi ko e lagatolu ia, kua tala atu e kupu agaia.
45 Ati haele age ai a ia ke he hana tau tutaki, kua pehe kia lautolu, Ati momohe atu a, mo e okioki; kitiala, kua tata tuai ke he magapo ke afo ai e Tama he tagata ke he tau lima he tau tagata hala.
46 Ati matike a, ke o a tautolu; kitiala, kua tata mai tuai a ia ke afo na au.
47 Kitiala, ha ne vagahau a ia, kua hau a Iuta, ko e taha he tokohogofulu ma ua, kua fakalataha foki mo ia e lanu tagata tokologa mai he tau ekepoa ne mua mo e tau patu he motu, ha ha ia lautolu e tau pelu mo e tau katoua.
48 Ne tuku atu foki e ia ne afo a ia e fakamailoga kia lautolu, kua pehe, Ko ia ka figita e au, ko ia haia; kia tapaki e mutolu a ia.
49 Ati hau ai agataha a ia kia Iesu, kua pehe age, Rapai na e, fakaalofa; ti figita ai a ia.
50 Ati tala age ai a Iesu kia ia, Teme na e, kua hau a koe ke ha? Ti o mai ai a lautolu, kua hohoko ha lautolu a tau lima kia Iesu, kua tapaki e lautolu a ia.
51 Kitiala, ko e taha ia lautolu ne fakalataha mo Iesu, kua toto e ia hana pelu, kua aki, ti ta ai e ia e fekafekau he ekepoa ne mua, kua motupū ai hana teliga.
52 Ti tala age ai a Iesu kia ia, Ati liuaki a hau a pelu ke he hana tokaaga; ha ko lautolu oti kana ke toto e pelu, to mamate a lautolu he pelu.
53 Piko kia a koe nakai maeke ia au ke ole atu ainei ke he haku a Matua, ti fekau mai e ia kia au e tau agelu ne mua he tokologa ke he tau lekeona ne hogofulu ma ua?
54 Ti fakamoli ai fefe e tau Tohi kaeke ke pihia, kia hoko ni e tau mena ia ke lata ai?
55 Ko e magapo ia kua tala age ai a Iesu ke he lanu tagata, Kua o mai kia a mutolu mo e tau pelu mo e tau katoua ke tapaki a au, tuga ne tagata fofo mena? ne nofo mau au mo mutolu ke he tau aho, he fakaako atu ke he faituga, ka e nakai tapaki ai e mutolu au.
56 Ka kua hoko e tau mena oti ia, kia fakamoli ai e tau Tohi he tau perofeta. Ti tiaki ai a ia he tau tutaki oti ka e fehola a lautolu.
57 Ko lautolu ne tapaki a Iesu, ne takitaki e lautolu a ia kia Kaiafa e ekepoa ne mua, kua fakapotopoto ai e tau tohikupu mo e tau patu.
58 Ka e mui mamao mai a Peteru kia ia, kua hoko ni ke he fale he ekepoa ne mua, kua hu atu ai ki fale, ti nofo a ia fakalataha mo e tau fekafekau, kia kitia e ia e fakahikuaga.
59 Ka ko e tau ekepoa ne mua, mo e tau patu, mo e fakapotopotoaga oti, kua kumi e lautolu e tau fatipiko kia Iesu, kia kelipopo e lautolu a ia;
60 Ka e nakai moua, pete ni he o mai e tau fatipiko tokologa, ka e nakai ni moua. Ti o mai ai fakamui e tokoua a fatipiko, kua pehe mai,
61 Ne pehe mai e tagata nai, Na maeke ia au ke ulu e faituga he Atua mo e eke foki e au ke he tolu e aho.
62 Ati tu ai ki luga e ekepoa ne mua, kua pehe mai kia ia, Ka e nakai kia lea a koe? Ko e heigoa e talahau he tau tagata nai kia koe?
63 Ka kua fakanono a Iesu. Ti tala age e ekepoa ne mua, kua pehe mai kia ia, Kua tala atu fakamakamaka e au kia koe ke he higoa he Atua moui, kia tala mai e koe kia mautolu, po ke Keriso a koe, ko e Tama he Atua.
64 Ati tala age ai a Iesu kia ia, Haia ni; ka e tala atu ni e au kia mutolu, Ato kitia e mutolu a taha aho e Tama he tagata kua nofo ke he fahi matau hana ha i ai e mana, to hau foki a ia ke he tau aolagi.
65 Ati hēhē ai he ekepoa ne mua hana tau tapulu, kua pehe age, Kua vagahau kelea a ia ke he Atua; to aoga ha ha e falu a talahau kia tautolu? kitiala, kua logona mogoho nai e mutolu hana vagahau kelea ke he Atua.
66 Kua manatu a mutolu ke ha? Ti tali mai ai a lautolu, kua pehe mai, Kua lata ke mate a ia.
67 Ti tauanu ai a lautolu ke he hana fofoga, ti taumoto foki kia ia; ka e taupoki atu ni he falu.
68 Kua pehe atu, Keriso na e, talahau la kia mautolu, po ko hai a ia ne ta a koe?
69 Na nofo a Peteru i fafo ke he loto pa; ti fina age ai e taha fekafekau tamafine kia ia, kua pehe age, Ko koe foki, ne fakalataha a mua mo Iesu ko e Kalilaia.
70 Ti fakatikai a ia ki mua ha lautolu oti kua pehe age, Nakai iloa e au e mena ne tala mai ai e koe.
71 Kua hu a ia ki fafo ke he fakamaluaga, ti kitia he taha tama fifine a ia, mo e pehe age kia lautolu ne nonofo ai, Ko e tagata na foki ne fakalataha a laua mo Iesu ko e Nasareta.
72 Ti liu foki fakatikai a ia mo e omonuo, Nakai kitia e au e tagata ia.
73 Kua levaleva, ti o age ai a lautolu ne tutu mai, kua pehe mai kia Peteru, Ko e moli ni, ko koe taha ia lautolu; ha kua iloa a koe he hau a vagahau.
74 Ati kamata ai a ia ke kaialu, mo e omonuo, Nakai kitia ni e au e tagata ia. Ti kō ai agataha e tau moa.
75 Ti manatu a Peteru ke he kupu a Iesu ne pehe mai kia ia, Nakai kō e tau moa, ato fakatikai lagatolu mai a koe kia au. Ti hu atu a ia ki fafo, kua tagi lahi.