Mataio 3:1-17
3 KO e vaha ia ne hau ai a Ioane ko e papatiso, kua fakamatala atu ke he tutakale i Iutaia.
2 Kua pehe age, Kia tokihala a a mutolu; ha ko e mena kua tata mai tuai e kautu he lagi.
3 Ha ko ia ni hanai ne talahau mai he perofeta ko Isaia, kua pehe mai, Ko e leo he taha tagata ne ui he tutakale, Ati tauteute a e mutolu e hala he Iki, kia fakahako e puhala māna.
4 Ko Ioane foki, ne tapulu a ia ke he ie fulufulu kamela, mo e pipi kili manu ke he hana tokupu; ko e hana tau mena kai foki ko e hē akerisi mo e meli vao ia.
5 Ati o atu ai kia ia a Ierusalema mo Iutaia oti, katoa mo e fahi oti a Ioritana.
6 Kua papatiso ai e ia a lautolu i Ioritana, kua fakakite age e lautolu ha lautolu a tau hala.
7 Kua kitia e ia e tokologa he tau farasaio mo e tau satukaio kua o mai ke he hana papatisoaga, ti kua pehe age ai a ia kia lautolu, ko e fuifui he tau gata gagau na e, ko hai kia ne tala age kia mutolu ke fehola he ita ne tatali?
8 Kia fua mai a mutolu e tau fua ke lata mo e tokihala;
9 Aua foki neke manatu hifo a mutolu, kua pehe, Ko Aperahamo e matua ha mautolu; ha ko e mena tala atu e au kia mutolu, kua maeke ni ke he Atua ke fakatupu mai he tau maka nai e fanau ma Aperahamo.
10 Ka kua toka tuai e toki ke he tau fu akau; ko e tau akau oti foki nakai fua mai ainei e tau fua mitaki to hio ia mo e tolo ni ke he afi.
11 Ko au ni kua papatiso atu e au a mutolu ke he vai kia tokihala; ka ko ia ka mui mai kia au, ne homo atu a ia ia au, nakai aoga au ke uta fano hana tau afialoalohui; ko ia haia ke papatiso a mutolu ke he Agaga Tapu mo e afi.
12 Ha he lima hana hana aku, to fakamea e ia hana tanakiaga saito, to fakapotopoto e ia hana tau saito ke he fale saito, ka e huhunu ni e otaota he tau saito ke he afi nakai maeke ke tamate.
13 Ti haele mai ai a Iesu i Kalilaia ki Ioritana kia Ioane kia papatiso ai e ia.
14 Ka kua hataki e Ioane a ia, kua pehe age, Ko e mena lata ke papatiso mai e koe au, ka e haele mai kia a koe kia au?
15 Ka kua tala age a Iesu, kua pehe age kia ia, Kia eke pihia ainei ha ko e mena lata ia tautolu he eke pihia e tau mena tonu oti. Ati toka ai e ia a ia.
16 Kua papatiso a Iesu, ti hake mai agataha a ia he vai, kitiala, kua maihiua tuai e lagi kia ia, kua kitia foki e ia e Agaga he Atua kua hifo mai tuga ne lupe, kua hoko ki luga ia ia.
17 Kitiala, ko e leo mai he lagi, kua pehe mai, Ko e haku a tama fakahele hanā, kua fiafia na au kia ia.