Mataio 5:1-48
5 KUA kitekite atu a ia ke he lanu tagata, ti haele hake a ia ke he mouga, kua nofo ai ki lalo, ati o mai ai hana tau tutaki kia ia;
2 Kua vagahau atu a ia, mo e fakaako kia lautolu, kua pehe age,
3 Uhoaki a lautolu ne loto holoilalo; ha ko e mena eke ma lautolu e kautu he lagi.
4 Uhoaki a lautolu ne fakatutuku; ha ko e mena ke fakamafanatia a lautolu.
5 Uhoaki a lautolu ne mahani molu; ha ko e mena to eke ma lautolu e motu.
6 Uhoaki a lautolu ne fia kai mo e fia inu ke he mahani tututonu; ha ko e mena to makona a lautolu.
7 Uhoaki a lautolu ne fakaalofa atu; ha ko e mena ofania mai a lautolu.
8 Uhoaki a lautolu ne loto mea; ha ko e mena kitia atu e lautolu e Atua.
9 Uhoaki a lautolu ke fakatupu e fakafeilo; ha ko e mena talahaua a lautolu ko e fanau he Atua.
10 Uhoaki a lautolu ne eke fakakelea ha ko e mahani tututonu ha lautolu; ha ko e mena eke ma lautolu e kautu he lagi.
11 Uhoaki a mutolu ka faikupu kelea a lautolu, mo e favale kia mutolu, mo e tukumale pikopiko a lautolu kia mutolu ke he tau mena kelea oti ha ko au.
12 Kia kolikoli a mutolu mo e fiafia ni; ha ko e ha ha he lagi ha mutolu a palepale kua lahi; ha ko e mena favale pihia a lautolu ke he tau perofeta ne mumua ia mutolu.
13 Ko mutolu, ko e masima he lalolagi a mutolu; kaeke ke magalo e masima, po ke heigoa e taha mena ke fakakona aki? Nakai fai mena ke aoga ki ai, ka e tolo ni ki fafo, mo e taholi ai he tau tagata.
14 Ko mutolu, ko e maama he lalolagi a mutolu. Nakai maeke ke galo e māga kua fakatu i luga he mouga.
15 Nakai tugi foki e lautolu e lamepa ti toka ai i lalo he kumete, ka e toka ki luga he tokaaga lamepa, ke kikila atu ai kia lautolu oti ha ha he fale.
16 Kia kikila atu pihia ha mutolu a maama ki mua he tau tagata, kia kitia ai e lautolu ha mutolu a mahani mitaki ati fakaheke atu ai a lautolu ke he Matua ha mutolu ha ha he lagi.
17 Aua neke manatu a mutolu kua hau au ke fakahui e fakatufono po ke tau perofeta; nakai hau au ke fakahui, ka kia fakamoli ai.
18 Ha ko e moli ke tala atu e au kia mutolu, ke mole atu e lagi mo e lalolagi, ka e nakai mole taha iota po ke taha maga matatohi he fakatufono, ato fakamoli e tau mena oti.
19 Hanai, ko ia ke holi e taha poaki nā ne muikau, mo e fakaako pihia ke he tau tagata, to talahaua a ia ke muikau kiliku ke he kautu he lagi; ka ko ia ka omaoma mo e fakaako ai, to talahaua a ia kua mua ke he kautu he lagi.
20 Ha ko e mena tala atu ni au kia mutolu, ka nakai ni mua ha mutolu a mahani tututonu he ha he tau tagata tohikupu mo e tau farasaio, nakai hao atu ni a mutolu ke he kautu he lagi.
21 Kua fanogonogo a mutolu ne tala mai kia lautolu ke he vaha i tuai, Aua neke keli tagata a koe; ko e tagata ne keli tagata, kua lata ke fakafili a ia.
22 Ka e tala atu e au kia mutolu ko e tagata ne ita teao ke he hana matakainaga, kua lata ke fakafili a ia; ko e tagata ne tala age foki ke he hana matakainaga, Raka, ke lata he fakatufono kia ia, ko e tagata foki ne tala age More, ke lata kia ia e afi ko Kehena.
23 Kaeke foki ke ta atu e koe hau a poa ke he fatapoa, ti manatu ai a koe ke he hau a matakainaga ha i ai taha mena kua mamahi ai kia koe.
24 Kia toka ai hau a poa i mua he fatapoa, ka e fano a a koe ke fakafeilo fakamua mo e hau a matakainaga, ti hau ai a koe, mo e ta atu hau a poa.
25 Kia fakafeilo fakaave a mua mo e tagata ne tagi he hana tau mena ha ha ia koe, ka kua o agaia a mua he magahehala mo ia, neke tuku atu foki a koe he tagata ne tagi he hana tau mena ke he fakafili, ti tuku atu foki he fakafili a koe ke he fekafekau, ati tuku atu a koe ke he fale puipui.
26 Ko e moli, ke tala atu e au kia koe nakai fakai ke hu atu ai a koe ki fafo, ato oti pito e tau tupe he age e koe.
27 Kua fanogonogo a mutolu, ne tala mai kia lautolu ke he vaha i tuai, Aua neke faivao a koe.
28 Ka e tala atu e au kia mutolu, ka kikite atu taha ke he fifine kia manako ki ai, kua faivao tuai a ia ke he hana loto.
29 Kaeke foki ke tupetupe a koe he hau a mata matau, ati kape kehe a, mo e tiaki e koe; ha ko e mena mitaki he mate taha magakakano hau, ka e kelea ka liti hau a tino oti ki Kehena.
30 Kaeke foki ke tupetupe a koe he hau a lima matau, ati hio kehe a, mo e tiaki e koe, ha ko e mena mitaki he mate taha fahi tino hau, ka e kelea ka liti hau a tino oti ki Kehena.
31 Na pehe mai foki, Kaeke ke tiaki he taha hana hoana, kia age e ia ki ai taha tohi ke tiaki ai.
32 Ka e tala atu e au kia mutolu, kaeke ke tiaki he taha hana hoana ka e nakai faivao a ia, kua fakafaivao e ia a ia; ko e tagata foki kua hoana kia ia ne tiaki, kua faivao tuai a ia.
33 Kua fanogonogo foki a mutolu ne talahau mai kia lautolu ke he vaha i tuai, Aua neke omonuo pikopiko a koe, ka kia ta atu e koe ke he Iki e tau mena ne omonuo ai a koe.
34 Ka e tala atu e au kia mutolu, aua neke omonuo ni; aua neke omonuo ke he lagi, ha ko e nofoaiki haia he Atua;
35 Po ke lalolagi, ha ko e hana tuagave a ia; po ko Ierusalema, ha ko e māga haia he Patuiki to atu.
36 Aua neke omonuo a koe ke he ulu hau, ha ko e mena nakai maeke ia koe ke fakahina po ke fakauli taha lauulu taha.
37 Ka kia pehe ha mutolu a kupu, E, e; nakai, nakai; ha ko e kupu ne mua ke he tau kupu na, mai he kelea haia.
38 Kua fanogonogo a mutolu kua talahau mai, Ke totogi e mata ke he mata, ka e totogi e nifo ke he nifo.
39 Ka e tala atu e au kia mutolu, aua neke taui atu e mutolu e kelea; ka ko e tagata ne poki mai hau a pakagutu matau, kia haga atu taha kia ia.
40 Ko e tagata foki ne fia fakafili a koe ke uta hau a tapulu, kia tuku atu ki ai e koe katoa mo e hau a tapulu lahi.
41 Ka fakamakamaka taha ke o a mua ke he maila taha, ati o a a mua mo ia ke he na maila ua.
42 Kia age e koe kia ia ne ole tupe mai ia koe; aua neke haga kehe a koe ia ia kua fia ogo mena mai ia koe.
43 Kua fanogonogo a mutolu kua talahau mai, Kia fakaalofa atu a koe ke he tagata ne katofia mo koe, ka kia fakavihia e tagata kua fai fi kia koe.
44 Ka e tala atu e au kia mutolu, kia fakaalofa atu a mutolu kia lautolu kua fai fi kia mutolu, kia fakamonuina atu e mutolu kia lautolu ne kaialu mai kia mutolu, kia totonu atu a mutolu, kia lautolu kua fakavihia a mutolu; kia liogi foki a mutolu ma lautolu ne tukumale mai mo e favale mai kia mutolu;
45 Kia eke ai a mutolu mo fanau he Matua ha mutolu ha he lagi, ha kua fakahake ne ia hana la kia lautolu kua mahani kelea katoa mo lautolu kua mahani mitaki, kua fakato hifo foki e ia e uha kia lautolu kua tututonu katoa mo lautolu kua nakai tututonu.
46 Kaeke foki ke fakaalofa atu a mutolu kia lautolu ne fakaalofa mai kia mutolu, ko heigoa kia e palepale kua moua e mutolu? Ka e nakai kia eke he tau telona e mena foki ia?
47 Kaeke ke fakaalofa a mutolu ke he tau matakainaga ha mutolu hoko lautolu, ko heigoa kia e mena uho kua eke e mutolu? ka e nakai kia eke pihia he tau telona.
48 Ko e hanai, kia katoatoa ha mutolu a mahani mitaki, ke tuga ha mutolu a Matua ha ha he lagi kua katoatoa hana mahani mitaki.