Mataio 9:1-38
9 TI hake a ia ke he foulua kua fano ke he fahi atu kua hoko ke he māga ni hana.
2 Kitiala, kua ta mai e lautolu kia ia taha tagata pareluti, kua takoto ke he mohega; kua fioia e Iesu ha lautolu a tua, ti tala age ai a ia ke he tagata pareluti, Haku tama na e, kia fakamanavalahi a a koe, kua fakamagalo tuai hau a tau hala.
3 Kitiala, ko e falu he tau tohikupu kua pehe hifo a lautolu ke he tau loto ha lautolu, Kua vagahau kelea e tagata nai ke he Atua.
4 Kua fioia e Iesu ha lautolu a tau manatu, ti pehe atu a ia, Ko heigoa e mena kua manamanatu kelea ai ha mutolu a tau loto?
5 Ha ko e mena fe ne maeke vave? po ke tala age, Kua fakamagalo hau a tau hala? po ke tala age, Matike a, ti fano.
6 Ka kia iloa ai e mutolu, ha ha he Tama he tagata e pule ke he lalolagi ke fakamagalo ai e tau hala, (ati tala age ai a ia ke he tagata pareluti,) Ati matike a, ti uta hau a mohega, ti fano a koe ke he hau a fale.
7 Ati matike ai a ia, mo e fano ke he hana fale.
8 Kua kitia he lanu tagata, ati ofomate ai; kua fakaheke atu foki a lautolu ke he Atua he foaki mai e pule pehenā ke he tau tagata.
9 Kua haele kehe a Iesu he mena ia, ati fioia ai e ia e taha tagata kua nofo ke he fale telona, ko Mataio hana higoa; ti pehe age ai kia ia, Mui mai a koe kia au. Ati matike ai a ia, kua mui atu kia ia.
10 Kua takoto a ia ke he kaiaga mena ke he fale, kitiala, ko e tau telona ne tokologa mo e tau tagata hala kua o mai, kua tatakoto a lautolu ke kai mena fakalataha mo Iesu mo e hana tau tutaki.
11 Kua kitia he tau farasaio, ti tala age ai a lautolu ke he hana tau tutaki, Ko e ha ne kai mena ai ha mutolu a akoako fakalataha mo e tau telona mo e tau tagata hala?
12 Ka kua logona e Iesu, ti tala age ai a ia kia lautolu, Nakai aoga e ekekafo ke he tau tagata malolo, ka ko e tau tagata gagao hokoia.
13 Ati o a, ke ako po ke heigoa e kakano he kupu ē, Mena loto au ke he fakaalofa, ka e nakai ko e poa; ha ko e mena nakai hau au ke ui ke he tau tagata tututonu, ka ko e tau tagata hala kia tokihala a lautolu.
14 Ati o mai ai e tau tutaki a Ioane kia ia, kua pehe mai, Ko heigoa e mena kua fakakanopogi mau ai a mautolu mo e tau farasaio, ka ko e tau tutaki hau, nakai fakakanopogi a lautolu?
15 Ti tala age ai a Iesu kia lautolu, Maeke kia he fakatutuku e tau kapitiga he tagata kitofaihoana, ka ko e ha ha ia lautolu e kitofaihoana? Ka e hoko mai e vaha ke uta kehe ai ia lautolu e kitofaihoana ati fakakanopogi ai a lautolu.
16 Nakai fakai taha ke fono ha tapulu popo ke he kala ie fou, ha ko e mena mamatu e tapulu ke he mena ne fono aki, ati au atu ai e mahēhe.
17 Nakai utu foki e lautolu e uaina fou ke he tau lupo kili manu tuai; ka pihia, ti pa ai e tau lupo kili manu, mo e maligi ai e uaina, ti moumou ai foki e tau lupo kili manu; ka e utu e lautolu e uaina fou ke he tau lupo kili manu fou, ti fakatau mau ai.
18 Kua tala age e ia e tau kupu nai kia lautolu, kitiala, kua hau e iki, kua hufeilo mai kia ia, kua pehe mai, Kua mate tuai haku a tama fifine; ka kia haele atu a koe, mo e fakalago hau a lima kia ia, ti moui ai a ia.
19 Ati matike ai a Iesu, kua mui atu kia ia, ko ia mo e hana tau tutaki.
20 Kitiala, ko e fifine kua gagao he fakatafea ne hogofulu ma ua e tau tau, kua fina age a ia ki tua hana, kua piki age ke he kala tapulu hana.
21 Nukua pehe hifo a ia ke he loto hana, Kaeke ke piki noa atu au ke he tapulu hana, ti moui ai au.
22 Ka kua haga a Iesu ki tua, mo e fioia a ia, ti tala age ai a ia, Haku tama fifine na e, kia fakamanavalahi a a koe, kua moui tuai a koe he hau a tua kia au. Ati moui ai e fifine ne kamata mai he magaaho ia.
23 Kua hu atu a Iesu ke he fale he iki, ti kua fioia ai e ia a lautolu ne fakatagi kofe mo e lanu tagata kua gaualoa.
24 Kua pehe age a ia kia lautolu, Ati o kehe a, ha ko e mena nakai mate e tama fifine, ka e mena mohe ni. Ti feki mai ai a lautolu kia ia.
25 Ka kua vega e ia e lanu tagata, ti hu atu ai a ia, kua toto hana lima, ati matike ai e tama fifine.
26 Kua tuogo atu e mena ia ke he fahi oti ia.
27 Ti haele kehe ai a Iesu he mena ia, ati mumui mai ai kia ia tokoua e tagata matapouli, kua tauui, kua pehe mai, Ko e tama a Tavita na e, kia fakaalofa mai a koe kia maua.
28 Kua hu ai a ia ke he fale, ti o mai kia ia e ne tagata matapouli; ati tala age ai a Iesu kia laua, Kua tua nakai a mua kia au ke maeke ia au e mena nai ka eke? Ati tala age ai a laua kia ia, E, ko e Iki na e.
29 Ati piki atu ai a ia ke he ha laua a tau mata, kua pehe age, Kia tuga e tua ha mua, kia eke ni pihia ma mua.
30 Ti ala ai ha laua a tau mata. Kua tala age fakamakamaka a Iesu kia laua, kua pehe age, A mua, neke fakailoa atu kia taha.
31 Ka kua o a laua, mo e fakapuloa e tala kia ia ke he fahi oti ia.
32 Kua o a laua, kitiala, kua ta mai ai e lautolu e tagata kuhukuhu, kua heketia he temoni;
33 Kua vega e ia e temoni, kua vagahau e kuhukuhu; ti ofomate ai e lanu tagata, kua pehe age, ko e kitia la nai ha mena pihia i Isaraela.
34 Ka kua tala age e tau farasaio, Ko e temoni lahi, kua vega ai e ia e tau temoni.
35 Kua haele fano a Iesu ke he tau māga oti, mo e tau magamotu, kua fakaako ke he tau sunako ha lautolu, mo e fakamatala e vagahau mitaki he kautu, kua fakamalolo foki e ia e tau gagao oti, mo e tau tagata mamahi oti he motu.
36 Kua fioia e ia e lanu tagata, ati fakaalofa hofihofi ai a ia kia lautolu, ne fakafita a lautolu, mo e tiaki atu ai, tuga e tau mamoe nakai fai leveki a lautolu.
37 Ati tala age ai a ia ke he hana tau tutaki, Kua loga e tau saito ke helehele, ka ko e tau tagata gahua, kua tokogaogao a lautolu.
38 Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.