Mika 3:1-12
3 Ti pehe age au, Kia fanogonogo mai a mutolu ko e tau iki a Iakopo, mo mutolu ko e tau pule he magafaoa a Isaraela, Nakai kia lata kia mutolu ke iloa e fakafiliaga?
2 Ko mutolu kua fakavihia e tau mena mitaki, mo e fiafia ke he tau mena kelea, kua fofole e mutolu ha lautolu a tau kili, katoa mo e kakano he tau hiumotua ha lautolu.
3 Kua kai foki e mutolu e tau tino he haku a motu, mo e fofole e tau kili ha lautolu, mo e pakipaki ha lautolu a tau huimotua, kua helehele ni a lautolu tuga ne tau mena kua tuku ke he ulo, tuga foki e tau maga kakano ki loto ha mena ne tunu aki.
4 Ti tagi atu ai a lautolu kia Iehova, ka e nakai fanogonogo mai a ia kia lautolu; ka e haga kehe e ia hana fofoga ia lautolu ke he vaha ia he kelea e tau mena ha lautolu ne eke.
5 Kua pehe mai e vagahau a Iehova ke he tau perofeta kua fakahehe haku a motu, kua kakati ke he tau nifo ha lautolu, mo e ui age e lautolu, Kua monuina: ka ko ia kua nakai tuku e tau mena ke he tau gutu ha lautolu, kua tauteute a lautolu ke tau ki ia.
6 Ko e mena ia kua pouligia ai a mutolu mo e nakai kitia e mutolu ha mena, to hoko foki e pouli kia mutolu ti nakai eke ai e mutolu e tau lagatau he tau taulaatua; to to foki e la ke he tau perofeta, to pouli foki e aho kia lautolu.
7 Ti ma e tau tagata kitekite, to fakahakuhaku ai foki e tau taulaatua; to ufiufi foki e lautolu ha lautolu a tau laugutu, ko lautolu oti ni; ha kua nakai tali mai ai e Atua.
8 Ka ko au, ko e moli ni, kua puke au ke he malolo he Agaga a Iehova, ko e fakafiliaga foki, mo e malolo, ke fakailoa atu kia Iakopo hana tau holifono, ke fakailoa atu foki kia Isaraela hana tau hala.
9 Kia fanogonogo mai a ke he mena nai ko mutolu ko e tau iki he magafaoa a Iakopo, mo e mutolu ko e tau pule he magafaoa a Isaraela, ko mutolu kua vihiatia e fakafiliaga, mo e fakakeukeu e tau mena tonu oti.
10 Kua ati hake e lautolu a Siona ke he toto, mo Ierusalema ke he mahani kelea.
11 Ko e hana tau iki kua fakafili e lautolu he fia eke taui, ko e hana tau ekepoa foki kua fakaako ai e lautolu he fia eke taui, ko e hana tau perofeta foki kua eke e lautolu e tau lagatau he tau taulaatua he fia eke tupe; ka kua falanaki a lautolu kia Iehova, mo e pehe age, Nakai kia ha ha ia tautolu a Iehova? nakai hoko mai ha kelea kia tautolu.
12 Ko e mena ia to eke a Siona mo fonua keli ha ko mutolu, to eke foki a Ierusalema mo tanakiaga maka, ko e mouga foki ha i ai e fale to eke ia mo tau mena tokoluga he vao motua.