Mika 4:1-13
4 KA to hoko ni ke he tau aho a mui, to fakamau ai e mouga ha i ai e fale a Iehova ke he tapunu mouga he tau mouga, to fakatokoluga ai foki ki luga he tau matiketike, ti tafe atu ki ai e tau motu oti kana.
2 To o mai foki e tau motu kehe loga, mo e pehe age a lautolu, O mai a, kia o hake a tautolu ke he mouga a Iehova, ko e fale foki he Atua a Iakopo; to fakaako mai e ia a tautolu ke he hana tau puhala, ti o ai a tautolu ke he hana tau puhala; ha ko e mena fina atu ai e fakatufono i Siona, ko e kupu a Iehova foki ke fina atu ai i Ierusalema.
3 To fakafili foki e ia e tau motu loga, mo e fofola atu e ia ke he tau motu malolo ne mamao; ti tukituki e lautolu e tau pelu ha lautolu ke eke mo tau koho, ko e tau tao foki ha lautolu ke eke mo tau titipi ke taute aki e tau vine; to nakai nikiti atu he taha motu e pelu ke he taha motu, to nakai liu ako tau foki a lautolu.
4 To takitokotaha a lautolu mo e nofo i lalo hana vine, mo lalo foki he hana mati; to nakai ha i ai foki taha ke fakamatakutaku ki ai; ha kua vagahau mai ai pihia e fofoga a Iehova Sapaota.
5 Ha ko e tau motu oti kua takitaha mo e fano ke he higoa he atua ha lautolu, ko tautolu foki, to o a tautolu ke he higoa a Iehova ha tautolu a Atua tukulagi tukumuitea.
6 Kua pehe mai a Iehova, Ko e aho ia to fakapotopoto ai e au e motu kua koki fakateto, to tatanaki fakalataha foki e au e motu kua vega kehe, mo e motu ne fakamamahi ai e au.
7 To eke e au ke toe ai falu he motu ne koki fakateto, to eke foki e au mo motu malolo a ia ne paea age ke he mena mamao, to pule foki a Iehova kia lautolu ke he mouga ko Siona ke kamata mai he vaha nai ke hoko ke he tukulagi.
8 Ko koe foki ko e kolo he fuifui mamoe, ko e mouga he tama fifine a Siona, to hoko mai ni kia koe, to hoko mai ni e pule fakamua, ko e kautu he tama fifine a Ierusalema.
9 Hanai, ko e ha ne fakatutu taha ai a koe? Nakai kia ha ha ia koe e patuiki? Kua malaia kia hāu a pule? kua moua a koe he mamahi tuga e mamahi he fifine ke fanau.
10 Ko e tama fifine a Siona na e, kia mamahi ā, mo e fanau a a koe, tuga e fifine ka fanau, ha ko e mena to fano kehe a koe ainei he maga ke nofo ke he vao, to hoko ni a koe ki Papelonia, to laveaki ai a koe ke he mena ia, to laveaki e Iehova a koe ke he mena ia mai he tau lima ha lautolu kua fai fi kia koe.
11 Kua fakapotopoto ai foki e tau motu loga ainei ke tau mo koe, kua pehe age a lautolu, kia kelea ai a ia; kua kitia foki he tau mata ha tautolu e tau mena kua manako ki ai a tautolu ki Siona.
12 Ka ko lautolu, nakai iloa e lautolu e manatu a Iehova, nakai iloa foki e lautolu hana pule; ha kua tatanaki ai e ia a lautolu tuga ne tau fuhi saito ke he mena ne taholi ai e saito.
13 Ko e tama fifine a Siona na e, kia tu a ki luga, mo e taholi; ha ko e mena to eke e au e hoe hau mo lapatoa, to eke foki e au hau a tau mahina hui mo apa kula; to tuki malipilipi foki e koe e tau motu loga; to tuku atu foki e au kia Iehova e tau mena ha lautolu ne moua he tau, katoa mo e tau koloa ha lautolu ma e Iki he lalolagi oti.