Mika 7:1-20
7 OI te fakaalofa kia au! ha kua eke au tuga ne tau fua akau momoho kua oti he tatanaki, tuga e tau fuhi fua vine ke he tanakiaga he tau fua vine; kua nakai fai fuhi vine ke kai; ne manako au ke he fua uluaki he mati ne momoho mua.
2 Kua malaia a ia ne mahani mitaki mai he motu; to nakai ha i ai ha tagata kua mahani tututonu; kua lamalamati a lautolu oti kia kelipopo tagata; kua takitaha a lautolu mo e tutuli hana matakainaga mo e kupega.
3 Kua eke fakamitaki e lautolu e tau mena kelea ke he na lima ua ha lautolu; kua ole palepale he iki katoa mo e fakafili; kua vagahau age foki he tagata lahi ke he tau manako he hana loto; kua fakakeukeu ai pihia e lautolu e mena ia.
4 Ko ia ne mahani mitaki ia lautolu kua tuga ne akau fotofoto a ia; ko ia ne mahani tututonu ia lautolu kua mua hana fotofoto ke he pa akau fotofoto; kua hoko mai e aho he hau a tau tagata toko, ko e aho ke ahi ai a koe; to ha i ai ainei ha lautolu a fakahakuhaku.
5 Aua neke tua a mutolu ke he kapitiga, ti ua falanaki a mutolu ke he kapitiga fakahele; kia leveki e koe e tau gutuhala he hau a gutu ke he hau a hoana fakahele.
6 Ha kua fakavihia he tama tane e matua tane, ko e tama fifine kua tu a ia ke totoko atu ke he hana matua fifine, ko e figona fifine kua totoko atu a ia ke he hana matua fugavai fifine; ko lautolu kua fai fi ke he tagata, ko e tau tagata he hana magafaoa haia.
7 Ka ko au, to tatali atu au kia Iehova, to amaamanaki au ke he Atua he haku a fakamouiaga; to fanogonogo mai haku Atua kia au.
8 Aua neke fiafia mai a koe kia au, ko koe na, kua fai fi mai kia au; pete he veli au, to liu tu ki luga au; pete he nofo au ke he pouli, ka ko Iehova ko e haku a maama haia.
9 To fakauka ai au ke he ita a Iehova, ha kua hala au kia ia; ato eke e ia haku a taufetoko, mo e eke foki e ia haku a fakafiliaga; to takitaki e ia au ke he maama, to kitia foki e au hana tututonu.
10 To kitia ai foki e ia ne fai fi mai kia au, to ufiufi foki a ia he ma, ko ia ne pehe mai kia au, Ko fe kia a Iehova hau a Atua? To kitia a ia ke he tau mata haku, to taholi a ia ainei tuga e pelapela he tau puhala.
11 Ko e aho ka ati hake ai hau a tau kaupa, ko e aho haia ke uta mamao ai e fakatufono.
12 Ko e aho ia to o mai ai a lautolu kia koe i Asuria mo e tau maga i Aikupito, to o mai foki a lautolu i Aikupito ke hoko atu ke he vailele, mai he taha tahi ke hoko atu ke he taha tahi, mai he taha mouga ke hoko atu ke he taha mouga.
13 Ka to eke e motu mo tau mena kua moumou ha ko lautolu kua nonofo ai, ha ko e tau fua he mahani la lautolu.
14 Kia leveki e koe hau a motu mo e hau a tokotoko, ko e fuifui mamoe he hau a tufaaga; ko lautolu kua nonofo hoko lautolu ke he vao i Karamelu; kia fagai ai a lautolu i Vasana mo Kiliata, ke tuga he vaha fakamua.
15 Tuga e vaha ne hau ai a koe he motu ko Aikupito, to fakakite atu e au kia ia e tau mana.
16 To kitia he tau motu kehe, ti ma ai a lautolu ha ko e ha lautolu a malolo oti; to ufiufi ai a lautolu ha lautolu a tau gutu ke he tau lima ha lautolu, to tuli foki ha lautolu a tau teliga.
17 To epoepo e lautolu e efuefu tuga ne gata; tuga e tau mena totolo he kelekele to o mai mo e vivivivi a lautolu he tau mena ha lautolu ne puipui ai; to o mai a lautolu mo e matakutaku kia Iehova ha tautolu a Atua; to matakutaku foki a lautolu kia koe.
18 Ko hai kia e Atua ke tatai mo koe kua fakamagalo e tau mahani kelea, mo e nakai manatu ke he tau holifono ha lautolu ne toe he hana tufaaga? Nakai toka mau ai hana a ita ha kua fiafia a ia ke he fakaalofa.
19 To liu mai a ia mo e fakaalofa mai kia tautolu, to taholi ai e ia ke he kelekele ha tautolu a tau mahani kelea; to liti foki e ia e tau hala oti ha lautolu ke he tau mena hokulo he tahi.
20 To fakahoko e koe e fakamoli kia Iakopo, mo e fakaalofa kia Aperahamo, ne omonuo ai e koe ke he tau matua ha mautolu tali mai he vaha i tuai.