Nahuma 1:1-15
1 KO e kavega a Nineva. Ko e tohi he fakakiteaga kia Nahuma ko e tagata Elekosi.
2 Ko Iehova ko e Atua ita tafua a ia kua lalago foki e ia, kua lalago e Iehova mo e ita lahi ni; kua lalago atu e Iehova kia lautolu kua fai fi kia ia, kua takahao foki e ia kia lautolu kua fai fi kia ia.
3 Ko Iehova kua fakatuai hana ita ka e lahi hana malolo; nakai toka noa e ia a lautolu kua hala; ko Iehova ha ha he hiohio mo e afa hana puhala, ko e tau aolagi ko e efuefu he hana tau ve haia.
4 Kua akonaki atu a ia ke he tahi, mo e fakapakupaku ai e ia, kua fakapakupaku ai foki e ia tau vailele oti. Kua mafāfā a Vasana mo Karamelu, kua fifigo foki e tau fua a Lepanona.
5 Kua vivivivi e tau mouga ia ia, kua faliu puke vai ai e tau matiketike; kua lagaaki ai e kelekele ki mua hana, ko e lalolagi foki katoa mo lautolu oti kua nonofo ai.
6 Ko hai ke tu ki mua hana ita? Ko hai foki ke tu ki luga ka tupu lahi ai hana ita? Kua liligi atu hana ita po ke afi, ti fulufuluhi ai e ia e tau maka tumau.
7 Kua mahani mitaki a Iehova, ko e taue a ia ke he aho matematekelea; kua iloa e ia a lautolu kua tua kia ia.
8 To fakaoti ai e ia e mena ne tu ai e maga ke he fakapuke ke lofia ai, to vega atu e ia ke he pouli a lautolu kua fai fi kia ia.
9 Ko e heigoa kia e mena kua manamanatu ai a mutolu kia Iehova? To fakaotioti ai e ia; nakai tupu mai lagaua e matematekelea.
10 Pete he vihi a lautolu tuga ne tau akau mahukihuki, mo e konahia a lautolu ke he uaina, ka to fakaotioti a lautolu tuga e tau gutugutu saito kua magomago lahi.
11 Kua fina atu taha ia koe kua manamanatu ke he tau mena kelea ke eke kia Iehova, ko e pule mahani kelea.
12 Kua pehe mai e vagahau a Iehova, Pete he katoatoa a lautolu mo e tokologa pihia, ka to kelipopo pihia a lautolu, to mole atu a ia. Pete he fakamamahi e au a koe, ka e nakai liu fakamamahi foki e au a koe.
13 To papaki e au ainei hana lakau hahamo mai ia koe, to motumotu foki e au hau a tau liliaga.
14 Kua poaki mai e Iehova kia koe, Nakai tuai to foki falu he higoa hau; to hehele kehe e au e tupua kua ta mo e tupua lapatoa mai he fale he hau a tau atua; to eke e au hau a tukuaga; ha kua kelea a koe.
15 Kitiala, ha ha i luga he tau mouga e tau hui hana kua talahau mai e tala mitaki, ko ia kua ogo mai e monuina; Iuta na e, kia eke a e koe hau a tau galue, kia ta age a e tau mena ne omonuo ai e koe; ha ko e mena nakai tuai fina atu kia koe e tagata mahani kelea; kua mate popo ni a ia.