Nehemia 1:1-11
1 KO e tau kupu a Nehemia ko e tama a Hakalia. Ko e tau uafulu, ko e mahina a Kisilu, ha ha i ai au ke he fale he patuiki i Susana,
2 Ti hoko mai ai taha he tau matakainaga haku, ko Hanani, ko ia mo e falu a tagata ne o mai i Iuta; ti huhu age au kia lautolu po ke fefe e tau tagata Iuta ne hao ko lautolu ne toe he paeaaga, ne huhu age foki po ke fefe a Ierusalema.
3 Ti pehe mai a lautolu kia au, Ko lautolu ne toe ko lautolu ne toe he paeaaga ha ha he fahi kautu, kua matematekelea lahi a lautolu mo e ekefakakelea ai a lautolu, kua maona foki e kaupa a Ierusalema, mo e huhunu ai e tau gutuhala ke he afi.
4 Ne logona ai e au e tau kupu ia, ti nofo hifo ai au, ne tagi foki au mo e mānu ai falu a aho; ne fakakanopogi foki au mo e liogi ki mua he Atua he lagi,
5 Mo e pehe age au, Iehova na e, ko e Atua he lagi, kua ole atu e au kia koe, ko e Atua ne mua ue atu mo e matakutakuina, kua taofi e maveheaga mo e fakaalofa kia lautolu kua fakaalofa atu kia ia, mo lautolu kua omaoma ke he hana tau poaki;
6 Kia fakateliga mai a koe, mo e haga mai hau a tau fofoga, kia fanogonogo mai a koe ke he liogi he hau a fekafekau, kua liogi atu ai e au ki mua hau ke he aho mo e po ha ko e fanau a Isaraela ko e hau a tau fekafekau, mo e talahau atu ai e au e tau hala he fanau a Isaraela, kua hala ai a mautolu kia koe; kua hala foki au katoa mo e magafaoa he haku a tau matua.
7 Kua ekefakakelea atu a mautolu kia koe, mo e nakai omaoma a mautolu ke he tau poaki, mo e tau fakatufono, mo e tau fakafiliaga, ne poaki mai ai e Mose hau a fekafekau.
8 Kua ole atu e au kia koe, kia manatu ai e koe e kupu ne poaki mai ai e koe ke he hau a fekafekau ko Mose kua pehe mai, Kaeke ke hala a mutolu to fakamavehevehe ai e au a mutolu ke he tau motu.
9 Ka ko e mena ka liliu mai a mutolu kia au, mo e omaoma a mutolu ke he haku a tau poaki, mo e eke ai e mutolu, pete ni he vega a mutolu ke he motuaga he lagi, to fakapotopoto mai ai e au a lautolu, mo e ta mai ai e au a lautolu ke he mena kua fifili e au ke tuku ai haku a higoa.
10 Hanai, ko e hau a tau fekafekau ia mo e hau a motu, ne laveaki ai e koe ke he hau a mana lahi, mo e hau a lima malolo.
11 Ko e Iki na e, kua ole atu au kia koe ke fakateliga mai a koe ke he liogi haku ko e hau a fekafekau, mo e liogi he hau a tau fekafekau, ko lautolu ne fia matakutaku ai ke he hau a higoa; mo e fakamonuina mai a e koe hau a fekafekau ke he aho nai; mo e foaki mai ai e koe kia au, kia ofania au ki mua he tagata nai. Ha kua eke au mo tagata taute uaina ke he patuiki.