Nehemia 11:1-36
11 NE nonofo e tau iki he motu i Ierusalema; ka ko lautolu ne toe he motu ne eke e lautolu e vili ke ta mai ai e taha mai he tau takitokohogofulu ke nofo i Ierusalema ko e maga tapu, ka e toka ai e tau takitokohiva ke he tau maga.
2 Ti fakamonuina he motu e tau tagata oti ne makai ai e tau loto ha lautolu ke nonofo i Ierusalema.
3 Ko e tau iki he motu ne nonofo i Ierusalema hanai; ka ko e tau maga a Iuta ne nonofo a lautolu takitaha ke he hana ni a tufaaga ke he tau maga ha lautolu, ko Isaraela, ko e tau ekepoa, mo e tau tagata Levi, mo e tau Netini, mo e fanau he tau fekafekau a Solomona.
4 Ne nonofo foki i Ierusalema falu he fanau a Iuta; ko Ataia ko e tama a Usia, ko e tama ia a Sakaria, ko e tama ia a Amaria, ko e tama ia a Sefatia, ko e tama ia a Maalaelu, mai he fanau a Faresa;
5 Ko Maaseia foki ko e tama a Paruka, ko e tama ia a Kolokusi, ko e tama ia a Hasaia, ko e tama ia a Ataia, ko e tama ia a Ioiaripa, ko e tama ia a Sakaria, ko e tama ia a Siloni.
6 Ko e fanau oti a Faresa ne nonofo i Ierusalema ko e fa e teau mo e onogofulu ma valu e tagata, ko e tau tagata malolo.
7 Ko e fanau foki a Peniamina hanai; ko Salu ko e tama a Mesulama, ko e tama ia a Ioeta ko e tama ia a Petaia, ko e tama ia a Kulaia, ko e tama ia a Maaseia, ko e tama ia a Itielu, ko e tama ia a Isaia.
8 Ne mumui age foki kia ia a Kapai, mo Salai, ko e hiva e teau mo e uafulu ma valu e tagata.
9 Ne pule foki kia lautolu a Ioelu ko e tama a Sikeri; ko Iuta foki ko e tama a Hasimua ko e pule ne ua aki a ia ke he maga.
10 Ko e tau ekepoa; ko Ietaia ko e tama a Ioiaripa mo Iakinu,
11 Ko Seraia ko e tama a Hilikia, ko e tama a ia a Mesulama, ko e tama ia a Satoka, ko e tama ia a Meraiota, ko e tama ia a Ahitupu, ne pule a ia ke he fale he Atua.
12 Ko e tau matakainaga foki ha lautolu ne eke e gahua ke he fale, ko e valu e teau mo e uafulu ma ua e tagata; ko Ataia foki ko e tama a Ierohama, ko e tama ia a Pelalia, ko e tama ia a Ameti, ko e tama ia a Sakaria, ko e tama ia a Pasura, ko e tama ia a Malekia,
13 Mo e hana tau matakainaga ko e tau iki ne mua, ne ua e teau mo e fagofulu ma ua e tagata; mo Amasesai ko e tama a Asareelu, ko e tama ia a Ahasai, ko e tama ia a Mesilemotu, ko e tama ia a Imeru,
14 Ko e tau matakainaga foki ha lautolu, ko e tau toa malolo, ko e taha e teau mo e uafulu ma valu e tagata; ne pule foki kia lautolu a Sapetielu ko e tama a Hagetolima.
15 Ko e tau tagata Levi foki; ko Semaia ko e tama a Hasupu, ko e tama ia a Aserikama, ko e tama ia a Hasapea, ko e tama ia a Puni;
16 Ko Sapatai foki mo Iosapata, ko e tau iki he magafaoa a Levi, ne pule a laua ke he gahua i fafo he fale he Atua.
17 Ko Matanaia foki ko e tama a Mika, ko e tama ia a Sapata, ko e tama ia a Asafo, ko e iki hanā ne kamata ai e fakaaue mo e liogi; ko Pakepukia foki, ko e tagata ne ua aki haia he hana tau matakainaga, mo Apeta ko e tama a Sumua, ko e tama ia a Kalali, ko e tama ia a Iutana.
18 Ko e tau tagata Levi oti ke he maga tapu, ne ua e teau mo e valugofulu ma fa e tagata.
19 Ko e tau tagata leveki gutuhala foki, ko Akupa mo Talemoni, mo e tau matakainaga ha lautolu ko e tau leveki gutuhala, ne taha e teau fitugofulu ma ua a lautolu.
20 Ko e tau tagata ne toe i Isaraela, ko e tau ekepoa, mo e tau tagata Levi, ha ha i ai a lautolu ke he tau maga oti a Iuta takitaha ke he hana tufaaga.
21 Ka ko e tau Netini ne nonofo a lautolu i Ofele; ne pule foki a Tika mo Gisepa ke he tau Netini.
22 Ko e tau tagata foki ne pule ke he tau tagata Levi i Ierusalema, ko Usi ko e tama a Pani, ko e tama ia a Hasapea, ko e tama ia a Matania, ko e tama ia a Mika. Ko e fanau a Asafo, ko e tau tagata uhu lologo ne pule a lautolu ke he gahua ke he fale he Atua.
23 Ka kua fai poaki e patuiki kia lautolu, mo e tufaaga mena kai kua kotofa ma e tau tagata uhu lologo ke lata mo e taha aho mo e taha aho.
24 Ko Petakia foki ko e tama a Mesisapelu, mai he fanau a Siraha ko e tama a Iuta, ha i ai a ia ke he tapa he patuiki ke he tau mena oti he motu.
25 Ko e tau maga foki mo e ha lautolu a tau fonua; ne nonofo falu he fanau a Iuta i Kiriata-arapa mo e hana tau maga, mo Tipona mo e hana tau maga, mo Kapetielu mo e hana tau maga,
26 Mo Iesua, mo Molata, mo Petepaleta,
27 Mo Hasara-saulo, mo Peresepa mo e hana tau maga,
28 Mo Tikelaka, mo Mekona mo e hana tau maga,
29 Mo Aino-rimoni, mo Sorea, mo Iaremuta,
30 Ko Sanoa, ko Atulama mo e tau maga ha laua, ko Lakisa mo e hana tau fonua, ko Aseka mo e hana tau maga. Ne heapi ai foki a lautolu ne kamata i Peresepa ti hoko atu ke he pahua a Hinoma.
31 Ko e fanau foki a Peniamina ne kamata i Kipeā kua hoko atu ki Mikemasa, mo Ai, mo Peteli mo e tau maga ha lautolu,
32 Ko Anatota, ko Nove, ko Anania,
33 Ko Hasora, ko Rama, ko Kitaima,
34 Ko Hatito, ko Sipoima, ko Nepalato,
35 Ko Loto, mo Ono ko e pahua he tau tufuga.
36 Ha ha i ai foki ia Iuta, mo Peniamina e tau vahega he tau tagata Levi.