Nehemia 12:1-47
12 KO e tau ekepoa mo e tau tagata Levi hanai ne o hake ai mo Serupapelu ko e tama a Salatielu, mo Iesua; ko Seraia, ko Ieremia, ko Esera,
2 Ko Amaria, ko Maluka, ko Hatusa,
3 Ko Sekania, ko Rekumu, ko Meremota.
4 Ko Itu, ko Gineto, ko Avia,
5 Ko Meamina, ko Maatia, ko Pileko,
6 Ko Semaia, mo Ioaripa, ko Ietaia,
7 Ko Salu, ko Amoka, ko Hilikia, mo Ietaia. Ko e tau iki hanā he tau ekepoa mo e tau matakainaga ha lautolu ke he tau aho a Iesua.
8 Ko e tau tagata Levi foki; ko Iesua, ko Pinui, ko Katameeli, ko Serepea, ko Iuta, mo Matania, ko ia ne pule ke he fakaaue, ko ia mo e hana tau matakainaga.
9 Ko Pakepukia foki mo Uni, ko e tau matakainaga ha lautolu, ne fakafehagai mo lautolu ke he tau leoleoaga.
10 Ne fanau e Iesua a Ioiakima, ne fanau foki e Ioiakima a Eliasipa, ne fanau foki e Eliasipa a Ioata,
11 Ne fanau foki e Ioata a Ionatana, ne fanau e Ionatana a Iatua.
12 Ha ha i ai foki ke he vaha a Ioiakima ko e tau ekepoa, ko e tau iki ne mua; ko Meraia he magafaoa a Seraia; ko Hanania he magafaoa a Ieremia;
13 Ko Mesulama he magafaoa a Esera; ko Iohanana he magafaoa a Amaria;
14 Ko Ionatana he magafaoa a Maliku; ko Iosefa he magafaoa a Sepania;
15 Ko Atena he magafaoa a Harima; ko Helekia he magafaoa a Meraiota;
16 Ko Sakaria he magafaoa a Ito; ko Mesulama he magafaoa a Ginetonu;
17 Ko Sikeri he magafaoa a Ahiva; ko Piletai he magafaoa a Meneamina, he magafaoa a Moatia;
18 Ko Samua he magafaoa a Pileko; ko Ionatana he magafaoa a Semaia;
19 Ko Matenai foki he magafaoa a Ioaripa; ko Usi he magafaoa a Ietaia;
20 Ko Kalai he magafaoa a Salai; ko Eperu he magafaoa a Amoka;
21 Ko Hasapeia he magafaoa a Hilikia; ko Natanielu he magafaoa a Ietaia.
22 Ko e vaha ia Eliasipa, mo Ioata, mo Iohanana, mo Iatua, ne tohi ai e tau tagata Levi ko e tau iki ne mua; katoa mo e tau ekepoa, ke hoko ke he kautu a Tariu ko e tagata Peresia.
23 Ne tohi ai ke he tohi he tau tala ke he nofoaga, e tau tama tane a Levi, ko e tau iki ne mua, ke hoko ke he vaha a Iohanana ko e tama a Eliasipa.
24 Ko e tau iki foki he tau tagata Levi; ko Hasapeia, ko Serepea, mo Iesua ko e tama a Katameeli, mo e ha lautolu a tau matakainaga ne fakafehagai mo lautolu, ke fakaheke mo e fakaaue ai, ke lata mo e poaki a Tavita ko e tagata he Atua, ke eke fetogiaki e tau leoleoaga.
25 Ko Matania, mo Pakepukia, ko Opetaia, ko Mesulama, ko Talemoni, mo Akupu, ko e tau leveki gutuhala a lautolu ne leveki e lautolu e tau mena ne tatanaki ai ke he tau gutuhala.
26 Ha ha i ai a lautolu ke he vaha a Ioiakima ko e tama a Iesua, ko e tama ia a Iosataka, mo e vaha a Nehemia ko e iki ne pule, mo Esera ko e ekepoa ko e tohikupu.
27 Ko e fakaulu kaupa foki he kaupa a Ierusalema ne kumi e lautolu e tau tagata Levi oti ke he tau mena ne nonofo ai a lautolu, ke ta mai ai a lautolu ki Ierusalema, ke eke ai e fakaulu kaupa mo e fiafia, mo e fakaaue, mo e lologo, mo e tau kumepalo, mo e tau napeli, mo e tau kitara.
28 Ne fakapotopoto ai foki e fanau he tau tagata uhu lologo, mai he kelekele tatai ne takai ai a Ierusalema, mai he tau maga foki he tau tagata Nepota;
29 Mo Pete-kilikala, mo e tau fonua a Kipeā, mo Asemau; ha kua eke ai he tau tagata uhu lologo e tau maga ma lautolu kua takai ai a Ierusalema.
30 Ko e tau ekepoa mo e tau tagata Levi ne fakamea ai e lautolu a lautolu, ne fakamea foki e lautolu e tau tagata, mo e tau gutuhala, mo e kaupa.
31 Ti ta hake ai e au e tau iki a Iuta ki luga he kaupa mo e kotofa ai e au ua e vahega lalahi ne fakaaue mo e o fakapapata ai, ko e taha vahega ne o age ke he fahi matau ki luga he kaupa ke hoko atu ke he gutuhala he otaota;
32 Ne mumui atu foki kia lautolu a Hosaia, mo e taha vahega he tau iki a Iuta,
33 Mo Asaria, ko Esera, mo Mesulama,
34 Ko Iuta, mo Peniamina mo Semaia, mo Ieremia.
35 Ko e falu foki he tau tama tane he tau ekepoa ha ha ia lautolu e tau pu ke ulo; ko Sakaria ko e tama a Ionatana, ko e tama ia a Semaia, ko e tama ia a Matania, ko e tama ia a Mikaio, ko e tama ia a Sakura, ko e tama ia a Asafo;
36 Mo e hana tau matakainaga, ko Semaia, mo Asareelu, ko Milalai, ko Kelalai, ko Maai, ko Natanielu, mo Iuta, mo Hanani, ha i ai ia lautolu e tau akau fakatagi a Tavita ko e tagata he Atua, mo Esera ko e tohikupu ha i mua ha lautolu.
37 Ko e gutuhala foki he vaipuna, ha i mua ha lautolu, ne o hake ai a lautolu he hala papahi he maga a Tavita, ke he mena ne hake ai e kaupa ki luga he fale a Tavita, ke hoko atu ni ke he gutuhala he vai ke he fahi uta.
38 Ko e vahega foki ne ua aki a lautolu ne fakaaue ne o age a lautolu ke he taha fahi ke feleveia ai mo lautolu, ne mui atu foki au kia lautolu, mo e taha veveheaga he motu ki luga he kaupa, i luga he kolo he tau gutuumu, ke hoko atu ke he kaupa laulahi;
39 I luga foki he gutuhala a Efaraimo, mo luga he gutuhala tuai, mo luga he gutuhala he tau ika, mo e kolo a Hananieli, mo e kolo a Meaa, ke hoko ni ke he gutuhala he tau mamoe; ti tutu ai a lautolu ke he gutuhala he fale puipui.
40 Ti tutu ai e vahega ne ua aki a lautolu ne fakaaue ke he fale he Atua, ko au foki, mo e taha veveheaga he tau pule fakalataha mo au;
41 Mo e tau ekepoa; ko Eliakimo, ko Maaseia, ko Meneamina, ko Mikaio, ko Elionai ko Sakaria, mo Hanania, ha ha i ai ia lautolu e tau pu ke ulo;
42 Mo Maaseia, mo Semaia, mo Eleasaro, mo Usi, mo Iohanana, mo Malekia, mo Elama, mo Esera. Ne lologo foki mo e leo lahi e tau tagata uhu lologo, mo Isaraia ha lautolu a iki.
43 Ne eke foki e lautolu e tau poa lalahi ke he aho ia, mo e fiafia a lautolu; ha kua fakafiafia ai he Atua a lautolu ke he fiafia lahi; ne fiafia ai foki e tau fifine mo e tau tama; ne logona atu foki e fiafia a Ierusalema ke he mena mamao.
44 Ne kotofa ai foki ke he aho ia e tau tagata ke pule ke he tau poko ke tatanaki ai e tau koloa, ke eke mo tau poa, mo tau fua uluaki, mo tau mena ke hogofulu aki e tau mena, ke fakapotopoto ki ai mai he tau fonua he tau maga e tau mena ke lata mo e fakatufono ma e tau ekepoa mo e tau tagata Levi; ha ko e mena fiafia a Iuta ha ko e tau ekepoa mo e tau tagata Levi ne tutu mai.
45 Ko e tau tagata uhu lologo foki katoa mo e tau tagata leveki gutuhala, ne omaoma e lautolu ke he fekau he Atua ha lautolu, mo e fekau he fakameaaga, ke lata mo e poaki a Tavita, mo Solomona hana tama.
46 Ha ko e mena tali mai he vaha ia Tavita mo Asafo i tuai ne ha i ai e takitaki he tau tagata uhu lologo, mo e tau lologo ke fakaheke ai mo e fakaaue atu ai ke he Atua.
47 Ne ta age foki e Isaraela oti ke he vaha ia Serupapelu, mo e vaha ia Nehemia e tau tufaaga ke he tau tagata uhu lologo mo e tau tagata leveki gutuhala, ko e aho mo e hana tau mena; mo e fakatapu ai e lautolu e tau veveheaga ne hogofulu aki e tau mena ma e tau tagata Levi; ne fakatapu ai foki he tau tagata Levi e tau veveheaga ne hogofulu aki e tau mena ma e fanau a Arona.