Nehemia 2:1-20
2 KO e mahina a Nisana, ko e tau ne uafulu aki he patuiki ai a Aretaseta; ha ha i mua hana e uaina; ti toto e au e uaina mo e ta age ai e au ke he patuiki. Nakai mata momoko foki au ke he tau vaha fakamua ki mua hana.
2 Ti pehe mai e patuiki kia au, Ko e heigoa kia e mena ne mata maanu ai a koe, ka e nakai gagao a koe? nakai ko e mena kehe nai ka ko e mamahi loto ni. Ti matakutaku lahi ai ni au,
3 Mo e pehe age au ke he patuiki, Kia moui tukulagi a e patuiki; ke nakai tagi au he ha, kua eke e maga mo tau mena kua moumou, ko e mena ne toka ai e tau tukuaga he haku a tau matua, mo e hana tau gutuhala kua fakaoti ai ke he afi.
4 Ti pehe mai e patuiki kia au, Ko e heigoa kia e mena kua manako a koe ki ai? Ti liogi ai au ke he Atua he lagi.
5 Ti pehe age au ke he patuiki, Kaeke kua mitaki ke he patuiki, kaeke foki kua ofania mai e koe hau a fekafekau, kia fakafano atu e koe au ki Iuta, ke he maga ne toka ai e tau tukuaga he haku a tau matua, kia ati ai e au.
6 Ti pehe mai e patuiki kia au, (kua nofo foki e patuiki fifine ke he tapa hana,) Ko e po fiha kia hau a fenoga? to liu mai a fe foki a koe? Ti mitaki ke he patuiki ke fakafano mai au; ti kotofa e au e vaha ke liu atu ai au kia ia.
7 Ti pehe age au ke he patuiki, Kaeke kua mitaki ke he patuiki, kia ta mai ai kia au e tau tohi ke he tau iki ne pule ke he fahi atu he vailele, kia leveki mai e lautolu kia au ato hoko au ki Iuta;
8 Ko e tohi foki kia Asafo ko e tagata kua leveki e vao he patuiki, kia ta mai ai e ia kia au e tau akau ke eke aki e tau akau fakalava he tau gutuhala he kolo he fale, mo e kaupa he maga, katoa mo e fale ke fina age au ki ai. Ti foaki mai ai he patuiki kia au ke lata mo e lima fakaalofa he haku Atua ha ha ia au.
9 Kua hoko atu au ke he tau iki ne pule ke he fahi atu he vailele, ti ta age e au kia lautolu e tau tohi he patuiki. Ne fakafano mai foki he patuiki mo au e tau takitaki kau mo e kau heke solofanua.
10 Ne logona ai e Sanepalata ko e Horono, mo Tovia ko e fekafekau ko e tagata Amoni, ti mamahi lahi ai a laua, ha kua hau e tagata ke kumi ai e mitaki ke monuina ai e fanau a Isaraela.
11 Ne hoko au ki Ierusalema, ne po tolu foki ha ha i ai au.
12 Ti mamatike ai a mautolu he po, ko au mo e tau tagata tokogahoa ha ha ia au; nakai tala age foki au ke he taha tagata e mena kua tuku ke he haku loto ke eke i Ierusalema; nakai fai manu foki au ka ko e manu ni ne heke ai e au.
13 Ti fina atu ai au he po he gutuhala he pahua, ki mua foki he vaipuna he tanimo, mo e gutuhala he otaota, ti kitekite ai au ke he tau kaupa a Ierusalema ne maona, mo e hana tau gutuhala ne fakaoti ai ke he afi.
14 Ti fina age ai au ke he gutuhala he vaipuna, mo e vai namo he patuiki, ka e nakai fai mena ke hao ai e manu ne heke ai e au.
15 Ti hake ai au ke he vailele he po, mo e kitekite ai au ke he kaupa, ti liu mai au mo e hu mai ai ke he gutuhala he pahua; ti liu mai ai au.
16 Nakai iloa foki he tau pule e mena ne fina atu au ki ai mo e mena ne eke ai e au; kua nakaila tala age foki e au ke he tau tagata Iuta, po ke tau ekepoa, po ke tau iki, po ke tau pule, po ko lautolu ne toe ne eke ai e gahua.
17 Ti pehe age au kia lautolu Kua fioia e mutolu e malaia ha ha ia tautolu, kua eke a Ierusalema mo mena kua moumou, mo e huhunu ai hana tau gutuhala ke he afi; kia o mai a, kia ati e tautolu e kaupa a Ierusalema, aua neke fakamā mau ai a tautolu.
18 Ne tala age foki e au kia lautolu e lima he haku a Atua ne mitaki ki luga ia au, katoa mo e tau kupu he patuiki ne tala mai e ia kia au. Ti pehe mai ai a lautolu, Kia mamatike a, kia eke ai e tautolu. Ti fakamalolo ai a lautolu ke he gahua mitaki nai.
19 Ne logona ai e Sanepalata ko e Horono, mo Tovia ko e fekafekau, ko e tagata Amoni, mo Gesemu ko e tagata Arapi, ti va mai a lautolu kia mautolu, mo e fakavihia mai a lautolu kia mautolu, Ko e heigoa kia e mena nai kua eke e mutolu? to fakafualoto kia a mutolu ke he patuiki?
20 Ti tali age au kia lautolu, mo e pehe age au kia lautolu, Ko e Atua he lagi to fakamonuina mai e ia a mautolu; ko e mena ia to mamatike ai a mautolu ko e hana tau fekafekau, mo e eke ai e gahua; ka ko mutolu, nakai fai tufaaga, po ke fakafiliaga, po ke fakamanatuaga i Ierusalema.