Nehemia 3:1-32
3 TI mamatike ai a Eliasipa ko e ekepoa ne mua, mo e hana tau matakainaga ko e tau ekepoa, mo e ati ai e lautolu e gutuhala mamoe; ne fakatapu ai e lautolu, ti fakatu ai foki e lautolu hana tau gutuhala; ne fakatapu ai e lautolu ke hoko ke he kolo a Meaa, ke hoko atu ke he kolo a Hananielu.
2 Ne ati ai ke he tapa hana he tau tagata Ieriko, Ne ati ai ke he tapa ha lautolu e Sakuro ko e tama a Imeru.
3 Ka ko e gutuhala he tau ika ne ati ai he fanau a Asenaa, ne fakalagolago e lautolu hana tau akau fakalava, mo e fakatutu ai e lautolu hana tau gutuhala, ko e hana tau fakamau, mo e hana tau fakamau fakalava.
4 Ne ati ai tata age kia lautolu e Meremota ko e tama a Uria, ko e tama ia a Kosa. Ti ati tata age kia lautolu e Mesulama ko e tama a Perekia, ko e tama ia a Mesesapelu. Ti ati tata age kia lautolu e Satoka ko e tama a Paana.
5 Ti ati ai tata age kia lautolu he tau tagata Tikoa; ka ko e tau iki ha lautolu, nakai lagomatai ai e lautolu ke he gahua he Iki ha lautolu.
6 Ne eke ai e Ioata ko e tama a Pasea, mo Mesulama ko e tama a Pesotia e gutuhala tuai; ne fakalagolago e laua hana tau akau fakalava, mo e fakatu ai e laua hana tau gutuhala, mo e hana tau fakamau mo e hana tau fakamau fakalava.
7 Ti ati ai tata age kia laua e Melatia ko e tagata Kipeona, mo Iatonu ko Marono, ko e tau tagata Kipeona mo e tau tagata Misepa, ne hoko ke he nofoaiki he iki ne pule ke he fahi mai nai he vailele.
8 Ne ati ai tata age kia ia e Usielu ko e tama a Haraia, ko e taha he tau tufuga ne eke e tau mena auro. Ti ati tata age kia ia e Hanania ko e tama he taha ia lautolu ne eke e tau mena manogi; ne toka ai foki e lautolu a Ierusalema kua hoko ke he kaupa laulahi.
9 Ti ati ai tata age kia lautolu e Refaia ko e tama a Huro, ko e iki ne pule ke he taha fahi a Ierusalema.
10 Ti ati ai tata age kia lautolu e Ietaia ko e tama a Harumapu, ki mua foki he fale hana. Ti ati tata age kia ia e Hatusa ko e tama a Hasapenia.
11 Ne ati ai foki e Malekia ko e tama a Harima, mo Hasupo ko e tama a Paka-moapi taha maga he kaupa, mo e kolo he tau gutuumu.
12 Ti ati ai tata age kia ia e Saluma ko e tama a Holokesu, ko e iki ne pule ke he taha fahi a Ierusalema, ko ia mo e hana tau tama fifine.
13 Ti ati e Hanuni mo e tau tagata Sanoa e gutuhala, ne eke e lautolu, mo e fakatu ai e lautolu hana tau gutuhala, mo e hana tau fakamau, mo e hana tau fakamau fakalava, ko e taha afe foki e kupita he kaupa, kua hoko ke he gutuhala he otaota.
14 Ne eke ai e gutuhala he otaota e Malekia ko e tama a Rekapa, mo e iki ne pule ke he taha fahi he motu ko Peteakarema; ne eke ai e ia mo e fakatu ai hana tau gutuhala, ko e hana tau fakamau, mo e hana tau fakamau fakalava.
15 Ne liu eke ai e gutuhala he vaipuna e Saluna ko e tama a Kolukose, ko e iki ne pule ke he taha fahi motu ko Misepa; ne eke e ia, mo e ufiufi ai e ia, mo e fakatu ai e ia hana tau gutuhala, ko e hana tau fakamau, mo e hana tau fakamau fakalava, mo e kaupa he vai namo ko Siloa ke he tapa he kaina he patuiki, ne hoko age foki ke he hala papahi ne o hifo ai he maga a Tavita.
16 Ne mui age foki kia ia mo e ati ai a Nehemia ko e tama a Atipuka, ko e iki ne pule ke he taha fahi a Petesura, ke hoko age ke he mena ha i mua he tau tukuaga a Tavita, ke hoko age foki ke he vainamo ne eke, ke hoko foki ke he fale he tau tagata malolo.
17 Ne mumui age kia ia mo e ati e tau tagata Levi, ko Rehumu ko e tama a Pani. Ti ati ai tata age kia ia e Hasapea, ko e iki ne pule ke he taha fahi a Kaila, ke he hana fahi motu.
18 Ti mumui age kia ia mo e ati e tau matakainaga ha lautolu, ko Pavai ko e tama a Henatati, ko e iki ne pule ke he taha fahi a Keila.
19 Ne ati tata age kia ia e Esera ko e tama a Iesua, ko e iki ne pule i Mitepa, ko e taha foki he maga pa ki mua he mena ne o hake ai ke he fale ne toka ai e tau kanavaakau ke he malokuaga he kaupa.
20 Ne mui age kia ia mo e ati ai mo e fakamalolo e Paruka ko e tama a Sapai, taha maga pa, ne kamata mai he malokuaga he kaupa kua hoko ke he gutuhala he fale he ekepoa ne mua ko Eliasipa.
21 Ne mui age kia ia mo e ati a Meremota ko e tama a Uria ko e tama a Kosa, ko e taha maga pa ne kamata mai he gutuhala he fale a Eliasipa kua hoko ke he mena ne gata mai ai e fale a Eliasipa.
22 Ti mumui age kia ia mo e ati e tau ekepoa, ko e tau tagata he fonua he kelekele tatai.
23 Ne mumui age kia lautolu mo e ati a Peniamina mo Hasupo ki mua he fale he laua. Ti mui age kia laua mo e ati e Asaria ko e tama a Maaseia ko e tama ia a Anania ke he hana fahi fale.
24 Ne mui age kia ia mo e ati ai a Penui ko e tama a Henatati taha maga kaupa, ne kamata ke he fale a Asaria kua hoko ke he malokuaga he kaupa kua hoko foki ke he hika he kaupa.
25 Ne ati e Palala ko e tama a Usai ki mua he malokuaga he kaupa, mo e kolo ne homo hake ke he fale tokoluga he patuiki ne tata age ke he lotopa he fale puipui. Ti mui age kia ia a Petaia ko e tama a Perosi.
26 Ne nonofo foki e tau Netini i Ofele, ne hoko ki mua he gutuhala he vai ke he fahi uta, mo e kolo ne mua he tokoluga.
27 Ne mumui age kia ia mo e ati taha maga kaupa e tau tagata Tikoa, ne kamata mai i mua ke kolo lahi ne mua he tokoluga kua hoko foki ke he kaupa a Ofele.
28 Ne ati he tau ekepoa ne kamata mai i luga he gutuhala he tau solofanua, takitokotaha ke he hana mua fale.
29 Ne mui age kia lautolu mo e ati ai e Satoka ko e tama a Imere ke he hana mua fale. Ne mui age kia ia mo e ati ai a Semaia ko e tama a Sekania, ko e tagata leveki gutuhala ke he fahi uta.
30 Ne mumui age kia ia mo e ati ai taha maga kaupa a Hanania ko e tama a Selemia mo Hanuni ko e tama ne toko ono aki he tau tama a Salafa. Ne mui age kia ia mo e ati ai ki mua hana poko a Mesulama ko e tama a Perekia.
31 Ne mui age kia ia mo e ati ai a Malekia ko e taha he tau tufuga eke mena auro ne hoko ke he fale he tau Netini, mo e tau tagata fakafua koloa, ki mua he gutuhala a Mefekato, ne hoko foki ke he poko i luga he hika he kaupa.
32 Ne ati ai he tau tufuga eke mena auro mo e tau tagata fakafua koloa ke he vaha he poko ki luga he hika he kaupa ke hoko ke he gutuhala he tau mamoe.