Nehemia 4:1-23
4 NE logona e Sanepalata kua ati ai e mautolu e kaupa, ti ita ai a ia, ne mamahi lahi ni a ia, ne va mai foki a ia ke he tau tagata Iuta,
2 Mo e vagahau ai a ia ki mua he tau matakainaga hana mo e kau a Samaria, kua pehe age, Ko e heigoa kia e mena kua eke he tau tagata lolelole? To toka ai kia a lautolu? To eke ai kia e lautolu e tau poa? To fakaoti ai kia e lautolu ke he aho taha? To liu ati hake ai kia e lautolu e tau maka mai he toloaga veve kua huhunu?
3 Ha ha i ai foki mo ia a Tovia ko e tagata Amoni, ne pehe mai foki a ia, Ko e mena kua ati e lautolu, kaeke ke hake ki ai e alope, to ulu ki lalo ai e ia ha lautolu a kaupa maka.
4 Ha mautolu a Atua na e, kia fanogonogo mai a a koe, ha kua vihiatia a mautolu; kia liuaki age foki e koe ha lautolu a ekefakakelea mai ki luga he tau ulu ha lautolu, kia tuku age e koe a lautolu kia fofo ai ha lautolu a tau mena ke he motu ke nonofo paea ai a lautolu;
5 Aua neke ufiufi foki ha lautolu a tau mahani kelea, aua neke holoholo kehe foki ha lautolu a tau hala ki mua hau, ha kua fakahogohogomanava atu a lautolu kia koe ki mua ha lautolu ne ati ai e kaupa.
6 Ne ati ai e mautolu e kaupa; ti tutaki ai e kaupa oti ke hoko ke he mena ne veveheua ai hana tokoluga; ha kua makai ai e tau loto he motu ke he gahua.
7 Ne logona e Sanepalata, mo Tovia, mo e tau tagata Arapi, mo e tau tagata Amoni, mo e tau tagata Asetota, ne hagaaki ati agaia e tau kaupa a Ierusalema, he kamata ke mau e tau mena ne maona, ti tupu lahi ai e ita ha lautolu,
8 Mo e pulega fakalataha a lautolu oti ke tau ki Ierusalema mo e fakahoko ki ai e malaia.
9 Ka e liogi a mautolu ke he Atua ha mautolu, mo e kotofa ai e mautolu falu ke leoleo kia lautolu ke he aho mo e po ha ko lautolu.
10 Ne pehe mai foki a Iuta kua tote e malolo ha lautolu ne fua e tau kavega ti lahi e otaota; nakai ni maeke a tautolu ke ati e kaupa.
11 Ne pehe age foki a lautolu ne fai fi kia mautolu, Nakai iloa e lautolu to nakai kitia e lautolu, ato hohoko atu a mautolu kia lautolu, mo e kelipopo e mautolu a lautolu, mo e fakahiku ai e gahua.
12 Ne o mai foki e tau tagata Iuta ne nonofo fetataaki mo lautolu, ti laga hogofulu he pehe mai a lautolu kia mautolu mai he tau mena oti, Kua tata ke liliu mai a mutolu kia mautolu.
13 Ti kotofa ai e au ke he tau mena tokolalo ki tua he pa, ke he tau mena tokanoa, ne kotofa e au e tau tagata ki ai fakalata ke he tau magafaoa ha lautolu, mo e ha lautolu a tau pelu, mo e ha lautolu a tau tao, mo e ha lautolu a tau kaufana.
14 Ne kitekite au, mo e matike, mo e pehe age au ke he tau iki, mo e tau pule, mo e motu oti, Aua neke matakutaku a mutolu ha ko lautolu; kia manamanatu a mutolu ke he Iki ne mua mo e matakutakuina, mo e tau a mutolu ha ko e tau matakainaga ha mutolu, ko e ha mutolu a tau tama tane, mo e ha mutolu a tau tama fifine, ko e ha mutolu a tau hoana, mo e ha mutolu a tau fale.
15 Ne logona ai e lautolu ne fai fi mai kia mautolu, kua iloa ai e mautolu, kua ulu foki he Atua e tau pulega ha lautolu, ti liliu age ai a mautolu oti ke he kaupa, takitaha ni ke he hana gahua.
16 Tali mai foki he aho ia, ne veveheua ai haku a tau fekafekau, ne eke gahua he taha veveheaga, ka ko e taha veveheaga ne toto ai e lautolu e tau tao, mo e tau akau punuti, mo e tau kaufana, mo e tau tapulu tau; ko e tau iki foki ha ha i ai a lautolu i tua he magafaoa oti a Iuta.
17 Ko lautolu ne ati e kaupa, mo lautolu ne fua e tau kavega, mo lautolu ne fetuku mena, ne takitaha mo e eke ai e gahua ke he taha lima, ka e toto ai e kanavaakau ke he taha lima.
18 Ko lautolu foki ne ati e kaupa ne takitaha a lautolu mo e pipi hana pelu ke he hana tokupu, mo e ati ai e lautolu; ha ha i ai foki ke he haku tapa e tagata ne ulo e pu.
19 Ne pehe age foki au ke he tau iki, mo e tau pule mo e tau tagata oti he motu, Kua lahi mahaki e gahua, kua mavehevehe foki a tautolu ke he kaupa, kua vaha mamao e taha mo e taha.
20 Hanai, ko e mena ke logona ai e mutolu e leo he pu, kia fakapotopoto mai ai a mutolu kia mautolu; to kau ha tautolu a Atua mo tautolu.
21 Ne gahua foki a mautolu ke he gahua, ne toto ai e tau tao e taha veveheaga ha lautolu ne kamata mai he matafatafa ata he aho ato tutu mai ai e tau fetu.
22 Ne pehe age foki au ke he motu ke he vaha ia, Kia takitaha e tagata mo e hana fekafekau mo e nonofo i Ierusalema, kia eke a lautolu mo tau leoleo kia tautolu ka po, ka e gahua a lautolu ka aho.
23 Ko au foki, mo e haku a tau matakainaga, mo e tau tagata leoleo ne mumui mai kia au, nakai aki e mautolu ha mautolu a tau tapulu, ne takitaha e tagata mo e toto hana kanavaakau he fano a ia ke he vai.