Nehemia 5:1-19
5 NE lahi ai e tagi he tau tagata mo e tau hoana ha lautolu ha ko e tau matakainaga ha lautolu ko e tau tagata Iuta.
2 Ha ko e mena ha i ai a lautolu ne pehe mai, Ko e ha mautolu a tau tama tane mo e ha mautolu a tau tama fifine, kua tokologa a mautolu; ko e mena ia kua uta ai e mautolu e tau fua saito kia kai ai a mautolu mo e momoui ai.
3 Ha ha i ai foki falu ne pehe mai, Kua ta age e mutolu ke fakamau aki e fakafua, he tau fonua ha mautolu, mo e ha mautolu e tau ulu vine, mo e ha mautolu a tau fale, ke moua ai e tau fua saito ha kua hoge.
4 Ha ha i ai foki falu ne pehe mai, Kua ogo tupe mai a mautolu ke eke mo poa ke he patuiki, ti age ai e mautolu e tau fonua ha mautolu mo e tau ulu vine ha mautolu ke fakamau aki e fakafua.
5 Ka ko e hanai, kua tatai e tau tino ha mautolu mo e tau tino he tau matakainaga ha mautolu, kua tatai foki e fanau ha mautolu mo e fanau ha lautolu; ti kitiala kua fakatupa ai e mautolu ha mautolu a tau tama tane mo e ha mautolu e tau tama fifine ke eke mo tau tupa; kua nonofo fakatupa ainei falu a tama fifine ha mautolu; ti nakai ni maeke kia mautolu ke liu fakafua mai ai a lautolu; ha ko e tau fonua ha mautolu mo e tau ulu vine ha mautolu kua eke ma e tau tagata kehe.
6 Ti ita lahi ai au he logona e au e tagi ha lautolu, mo e tau kupu ia.
7 Ti fifili hifo ai au ke he haku loto, mo e totoko age au ke he tau iki mo e tau pule, mo e pehe age au kia lautolu, Kua takitaha a mutolu mo e talia e taui fakalahi mai he tau tupe kua age ke he hana matakainaga. Ti fakapotopoto ai e au e fakapotopotoaga lahi ha ko lautolu.
8 Ti pehe age au kia lautolu, Kua fakafua mai e mautolu ha tautolu a tau matakainaga ko e tau tagata Iuta, ne fakafua atu ke he tau motu kehe, ke lata mo e tau mena ha ha ia mautolu; ka ko mutolu to fakafua atu kia e mutolu ha mutolu a tau matakainaga? po ke fakafua mai kia a lautolu kia tautolu? Ti fakamamate ai a lautolu; kua nakai ni fai kupu mai.
9 Ti pehe age foki au kia lautolu, Nakai mitaki e mena kua eke e mutolu; nakai kia lata ke o a mautolu mo e matakutaku ke he Atua ha tautolu ha ko e ekefakakelea mai he tau motu kehe kua fai fi mai kia tautolu?
10 Ko au foki, mo e haku a tau matakainaga, mo e haku a tau fekafekau, kua age e mautolu kia lautolu e tau tupe, mo e tau fua saito ke he taui fakaloga mai; kia tiaki a e tautolu e taui fakaloga na.
11 Kua ole atu au kia mutolu, kia liuaki atu a kia lautolu ke he aho nai ni ha lautolu a tau fonua, ko e tau ulu vine ha lautolu, ko e tau ulu olive ha lautolu, mo e tau fale ha lautolu, mo e veveheaga ne teau aki e tau tupe, mo e tau fua saito, mo e uaina, mo e puke lolo ne moua ai e mutolu ia lautolu he taui fakaloga mai e lautolu.
12 Ti pehe mai a lautolu, To liuaki atu ni e mautolu, to nakai kumi ai foki e mautolu ha mena ia lautolu; tuga ne vagahau mai e koe kia mautolu to eke ai pihia e mautolu. Ti ui age au ke he tau ekepoa, mo e pehe age au kia lautolu kia omonuo ai e lautolu, kia eke e lautolu ke lata mo e tau kupu na.
13 Ne lulululu foki e au e fatafata he haku tapulu, mo e pehe age au, Kia lulululu ai pihia he Atua e tau tagata oti kua nakai fakamoli ai e tau kupu na, mai he tau fale ha lautolu mo e tau gahua ha lautolu, kia lulululu ai pihia mo e fakanonofogati ai a lautolu. Ti pehe mai ai e fakapotopotoaga oti, Amene; mo e fakaheke atu ai a lautolu kia Iehova. Ne eke foki he motu ke lata mo e tau kupu na.
14 Tali mai he aho ne kotofa ai au mo iki ke pule ke he motu ko Iuta, ne kamata ai ke he tau uafulu kua hoko atu ke he tau tolugofulu ma ua he patuiki ko Aretaseta, ko e hogofulu ma ua e tau ia, nakai kai ai a mautolu, ko au mo e haku a tau matakainaga, e tau mena kai he iki ne pule.
15 Ka ko e tau iki fakamua ne pule ko lautolu ne fakamua atu kia au, ne pehia e motu ia lautolu, mo e talia mai e lautolu ia lautolu e tau areto mo e uaina, katoa mo e fagofulu e sikeli ario; ko e tau fekafekau foki ha lautolu ne pule a lautolu ke he motu; ka ko au nakai eke pihia e au, ha kua matakutaku ai au ke he Atua.
16 Ne fakamalolo foki au ke he gahua he kaupa nai, nakai fakafua mai foki e mautolu ha fonua; ne fakapotopoto mai ai foki haku a tau fekafekau oti ke he gahua.
17 Ne kai ai foki ke he laulau haku ko e tau tagata Iuta mo e tau pule taha e teau mo e limagofulu e tagata, katoa foki mo lautolu ne o mai ai kia mautolu he tau motu kehe ne agaagai mai kia mautolu.
18 Ko e tau mena nai foki ne taute ai ke he taha aho mo e taha aho, ko e taha e povi mo e ono e mamoe mitaki; ne taute foki māku e tau manulele; ne takilagataha foki ke he tau po hogofulu e tau uaina kehekehe oti ne loga; ka e pete ni he tau mena ia nakai pehe age au ke ta mai ai e tau mena kai he iki ne pule, he mamafa e gahua he motu nai.
19 Haku Atua na e, kia manatu mai e koe au kia monuina ai au, ke lata mo e tau mena oti ne eke ai e au ke he motu nai.