Nehemia 6:1-19
6 NE logona e Sanepalata, mo Tovia, mo Gesemu ko e tagata Arapi, katoa mo lautolu oti ne fai fi mai kia mautolu, kua ati e au e kaupa, mo e nakai toe ai ha mena malolo; (ka ko e vaha ia nakaila fakatu ai e au e tau pa gutuhala he tau gutuhala);
2 Ti fekau ai e Sanepalata mo Gesumu kia au kua pehe mai, Hau a kia feleveia ai a tautolu ke he tau maga he kelekele tatai ko Ono. Ka e manatu e lautolu ke eke mena kelea kia au.
3 Ti fakafano age e au e tau fekau kia lautolu kua pehe age, Kua eke e au e gahua lahi, nakai maeke au ke hifo. Ko e heigoa kia e mena ke toka ai a gahua he tiaki e au mo e hifo atu au kia mutolu?
4 Lagafā ne fakafano mai pehenā e laua kia au; ti tali age ai pihia au kia lautolu.
5 Ti fakafano mai e Sanepalata hana fekafekau kia au ke he fekau pehenā, ko e lagalima haia; ha ha he lima hana foki e tohi kua nakai fakamau.
6 Ne tohi ai, Kua logona mai he tau motu kua pehe mai foki a Gesemu, kua manatu e koe mo e tau tagata Iuta ke fakafualoto; ko e mena ia kua ati ai e kaupa, kia eke a koe mo patuiki ha lautolu ke lata mo e tau kupu na.
7 Kua kotofa foki e koe e tau perofeta ke talahau ai a koe i Ierusalema, kua pehe age, Kua fai patuiki a Iuta; ko e fakailoa atu ne fai ke he patuiki ke lata mo e tau kupu na. Hanai, kia hau a koe, mo e pulega fakalataha ai a taua.
8 Ti fakafano age e au kia ia, kua pehe age, Nakai fai mena kua eke tuga ne tau mena kua vagahau mai ai e koe, ka kua fafati noa ai e koe e tau mena ia ke he hau a loto ni.
9 Ha ko e mena fakamatakutaku mai a lautolu oti kia mautolu, kua pehe age, To fakalolelole ai ha lautolu a tau lima ke he gahua, ke nakai eke ai. Hanai, ko e Atua na e, kia fakamalolo mai e koe haku a tau lima.
10 Ti fano ai au ke he fale a Semaia ko e tama a Talaia, ko e tama ia a Mehetapulu, ne puipui foki a ia; ti pehe mai a ia kia au, Kia o a taua fakalataha ke he fale he Atua ki loto he faituga; ha ko e mena o mai ni a lautolu ke kelipopo a koe, to o mai ni a lautolu ke he po a magaaho ke kelipopo a koe.
11 Ti pehe age au kia ia, Ke hola kia e tagata tuga au? Ko hai kia tuga au nai ke fano ke he faituga ke moui ai? Nakai ni fano au ki ai.
12 Kitiala, ne kitia e au nakai fakafano mai he Atua a ia; ka kua vagahau mai e ia e kupu he perofetaaga na kia kelea ai au; ha kua fakakoloa ai e Sanepalata mo Tovia a ia.
13 Ko e mena nai ne fakakoloa ai a ia, kia matakutaku ai au, mo e eke e au pihia, ke hala ai au, kia moua e lautolu e mena ke eke mo tala kelea kia talahaua kelea ai au.
14 Haku Atua na e, kia manatu e koe a Tovia mo Sanepalata ke lata mo e tau mena ne eke e laua, katoa foki mo e perofeta fifine ko Noataia, mo e falu a perofeta ne fakamatakutaku mai kia au.
15 Ne fakaoti ai e kaupa ke he aho uafulu ma lima he mahina ko Elula; ko e tau aho limagofulu ma ua ne eke ai to mau.
16 Ne logona ai e lautolu oti ne fai fi mai kia mautolu, ti matakutaku ai e tau motu oti ne agaagai mai kia mautolu, mo e fakalolelole lahi ai a lautolu; ha kua iloa e lautolu ko e Atua ha tautolu ne eke ai e gahua na.
17 Ko e tau aho ia foki ne ta age ai e tau tohi loga he tau iki a Iuta kia Tovia, ne hohoko mai foki e tau tohi a Tovia kia lautolu.
18 Ha ko e mena tokologa i Iuta ne omonuo kia ia, ha ko e figona a ia a Sekania ko e tama a Araka; ne faihoana foki e tama hana ko Iohanana ke he tama fifine a Mesulama ko e tama a Perekia.
19 Ne vagahau ai foki a lautolu ki mua haku ke he hana mahani mitaki, ne tala age ai foki e lautolu haku tau kupu kia ia. Ne fakafano mai foki e Tovia e tau tohi ke fakamatakutaku ai au.