Nehemia 8:1-18
8 NE fakapotopoto ai e motu oti tuga ne tagata tokotaha ke he malē ha i mua he gutuhala he vai; ti pehe age ai a lautolu kia Esera ko e tohikupu ke ta age ai e tohi he fakatufono a Mose, ne poaki mai ai e Iehova kia Isaraela.
2 Ti ta mai ai e Esera ko e ekepoa e fakatufono ki mua he fakapotopotoaga ko e tau tane mo e tau fifine, mo lautolu oti ne maama he fanogonogo ki ai, ke he aho fakamua he fitu mahina.
3 Ti totou ai e ia ke he malē ha ha i mua he gutuhala he vai, ne kamata mai he maama he aho ke hoko ke he tupoulā, ki mua he tau tane mo e tau fifine, mo lautolu ne maama he fanogonogo ki ai; ne haga mai foki e tau teliga he motu oti ke he tohi he fakatufono.
4 Ne tu foki a Esera ko e tohikupu ki luga he tuaga akau, ne taute ai e lautolu mo e mena ia; ne tutu foki fakalataha mo ia ke he hana fahi matau ko Matatia, mo Sema, mo Anaia, mo Uria, mo Hilikia, mo Maaseia; ka e ha ha he fahi hema hana, a Petaia, mo Misaelu, mo Malekia, mo Hasumu, mo Hasepatana, ko Sakaria mo Mesulama.
5 Ti fofola ai e Esera e tohi ki mua he motu oti; (ha ko e mena tokoluga a ia ki luga he motu oti;) ne fofola ai e ia ti tutu ai e motu oti.
6 Ti fakaaue atu ai e Esera kia Iehova ko e Atua mua ue atu; ti tali mai ai e motu oti, Amene, Amene, ti nikiti ki luga ha lautolu a tau lima, mo e tukutukuhifo a lautolu, mo e fakaveveli fakafohifo ai a lautolu kia Iehova.
7 Ko Iesua foki, mo Pani, mo Serepeia, ko Iaminu, ko Akupu, ko Sapetai, ko Hotia, ko Maaseia, ko Kelita, ko Asaria, ko Iosapata, ko Hanana, ko Pilaia, mo e tau tagata Levi, ne fakamatala atu ai e lautolu e fakatufono ke he motu, ne tutu mai ai foki e motu.
8 Ti totou fakatekiteki ai e lautolu ke he tohi ke he fakatufono he Atua, mo e fakakite atu ai e lautolu e alito, ti maama ai e tau tagata ke he tau mena ne totou.
9 Ko Nehemia, ko e iki ne pule haia, mo Esera ko e ekepoa, ko e tohikupu, mo e tau tagata Levi ne fakaako atu ke he motu, ne pehe age a lautolu ke he motu oti, Ko e aho tapu kia Iehova ha mutolu a Atua hanai, aua neke mānu a mutolu, ti ua tagi a mutolu. Ha ko e mena tagi e motu oti he logona ai e lautolu e tau kupu he fakatufono.
10 Ne pehe age foki a ia kia lautolu, Kia o ā mutolu, kia kai a e tau mena lolo, mo e inu e tau mena humelie; mo e fakafano age e mutolu e tau tufaaga kia lautolu kua nakai taute ai e tau mena ma lautolu; ha ko e aho tapu hanai ke he Iki ha tautolu; aua neke mamahi foki a mutolu; ha ko e fiafia kia Iehova ko e malolo ha mutolu haia.
11 Ne fakanānā ai foki he tau tagata Levi e motu oti, ne pehe age a lautolu, Kia fakanono ā mutolu; ha ko e aho tapu hanai, aua neke mamahi foki a mutolu.
12 Ti o atu ai e motu oti ke kai, mo e inu, mo e fakafano age ai e tau tufaaga, mo e olioli lahi ai, ha kua logona ai e lautolu e tau kupu ne fakailoa atu kia lautolu.
13 Ko e aho ua foki ne fakapotopoto ai e tau iki ne mua he motu oti, ko e tau ekepoa, mo e tau tagata Levi kia Esera ko e tohi kupu kia ako ai a lautolu ke he tau kupu he fakatufono.
14 Ti iloa ai e lautolu kua tohi ai ke he fakatufono ne poaki mai ai e Iehova ia Mose, kia nonofo e fanau a Isaraela ke he tau fale api ke he galue ke he fitu mahina;
15 Mo e ogoogo atu e lautolu mo e fakamatala atu ai ke he tau maga oti ha lautolu, mo Ierusalema, kua pehe atu, Kia o atu ā mutolu ke he mouga, mo e ta mai ai e mutolu e tau la olive, mo e tau la akau he olive vao, mo e tau la hatasi, mo e tau lau pama, mo e tau la akau lau uhiuhi, ke eke aki e tau fale api ke lata mo e tohi.
16 Ti o atu e motu mo e ta mai ai e lautolu e tau la akau ia, mo e eke ai ma lautolu e tau fale api, takitahi ke he hana tua fale i luga, ke he tau lotopa foki ha lautolu, mo e tau lotopa he fale he Atua, mo e malē he gutuhala he vai, mo e malē he gutuhala a Efaraimo.
17 Ko e fakapotopotoaga oti foki ko lautolu ne o mai ai he paeaaga ne eke e lautolu e tau fale api mo e nonofo ai a lautolu ke he tau fale api; ha ko e mena tali mai he vaha ia Iosua ko e tama a Nuno ke hoko mai ke he aho ia nakai eke pihia he fanau a Isaraela. Ti lahi mahaki ai e fiafia.
18 Ne totou foki e ia ke he tohi he fakatufono he Atua ke he taha aho mo e taha aho ne kamata ai he aho fakamua ti hoko ke he aho ne fakahiku ai. Ko e fitu e aho foki ne eke ai e lautolu e galue, ti eke ai e lautolu e fakapotopotoaga ke he aho ne valu aki, ke lata mo e kotofaaga.