Numera 10:1-36
10 KUA vagahau mai foki a Iehova kia Mose, kua pehe mai,
2 Kia eke e koe ua e pu ario, kia lakuina; ko e tau pu foki ia ke fakapotopoto ai e tau fakapotopotoaga, ke eke foki mo fakamailoga ke o ai e tau heagaapi.
3 Ka ulo ai e na pu ua, ti tutuuta ai e fakapotopotoaga oti kia koe ke he gutuhala he fale uta fano he tutuutaga.
4 Kaeke ke ulo ai e lautolu taha pu ti fakapotopoto atu kia koe e tau iki ko e tau iki he tau takiafe ia Isaraela.
5 Ka ulo ai e mutolu, mo e leo fakavivivivi ti o fenoga ai e heagaapi ha ha he fahi uta.
6 Ka kua ulo ai lagaua e mutolu mo e leo fakavivivivi ti o fenoga ai e heagaapi ha ha he fahi toga; to ulo ai e lautolu e tau pu mo e leo fakavivivivi ke he ha lautolu a tau fenoga.
7 Ka kua eke foki e mutolu ke fakapotopoto ai e fakapotopotoaga to ulo ai e mutolu e tau pu ka e aua neke ulo mo e leo fakavivivivi.
8 Ko e tau tama tane a Arona ko e tau ekepoa to ulo ni e laua e tau pu; ti eke foki ia mo fakatufono tukulagi kia mutolu ke he tau hau ha mutolu a mui.
9 Kaeke foki ke o atu a mautolu ke tau ke he motu ha mutolu kia lautolu kua fai fi kia mutolu, kua favale mai kia mutolu, ti ulo ai e mutolu e tau pu mo e leo fakavivivivi, ti manatu ai a mutolu ki mua a Iehova ha mutolu a Atua, ti fakamomoui ai a mutolu mai ia lautolu kua favale mai kia mutolu.
10 Ko e aho foki kua fiafia ai a mutolu, mo e ha mutolu a tau aho galue, mo e tau kamataaga he ha mutolu a tau mahina, to ulo ai e mutolu e pu ki luga ha mutolu a tau poa huhunu, ki luga foki ha mutolu a tau poa fakaaue; ti eke ia mo fakamanatuaga ki mua a Iehova ha mutolu a Atua; ko au ni ko Iehova ko e ha mutolu a Atua.
11 Kua hoko ke he aho uafulu he mahina ua, he tau ua, ti lagaaki e aolagi mai luga he faituga kua ha i ai e fakatufono.
12 Ti o ai e fanau a Isaraela ke he fenoga ha lautolu he tutakale ko Sinai; kua nofo foki e aolagi ke he tutakale ko Parana.
13 Ne o fenoga fakamua ai a lautolu fakalata ke he kupu a Iehova kia Mose,
14 Ti mua atu e matini he heagaapi he fanau a Iuta ke he ha lautolu a tau kau; ko e takitaki kau foki hana ko Nasona haia ko e tama a Aminatapu.
15 Ko e takitaki kau foki he magafaoa he fanau a Isakara, ko Natanielu haia ko e tama a Suaro.
16 Ko e takitaki kau foki he magafaoa he fanau a Sepulona ko Eliapo haia ko e tama a Helona.
17 Ti ta hifo ai e lautolu e faituga, ti o ai e fanau a Keresoma mo e fanau a Merari, kua uta e lautolu e faituga.
18 Ti uta ai e matini he heaga api a Reupena ke he ha lautolu a tau kau; ko e hana takitaki kau foki ko Elisura ko e tama a Seturo haia,
19 Ko e takitaki kau foki he magafaoa he fanau a Simeona, ko Salumielu haia ko e tama a Surisatai.
20 Ko e takitaki kau foki he magafaoa he fanau a Kato, ko Eliasafo haia ko e tama a Tuelu.
21 Ti o ai e tau tagata Koato, kua uta e lautolu e tau mena tapu; ka kua oti he fakatu e lautolu ne mumua e faituga to hohoko atu a lautolu.
22 Ti uta ai e matini he heaga api he fanau a Efaraimo ke he ha lautolu a tau kau; ko e hana takitaki kau foki ko Elisama haia ko e tama a Amihuta.
23 Ko e takitaki kau foki he magafaoa he fanau a Manase, ko Kamalielu haia ko e tama a Petasuro.
24 Ko e takitaki kau foki he magafaoa he fanau a Peniamina, ko Apitano haia ko e tama a Kitione.
25 Ti uta ai e matini he heaga api he magafaoa a Tano, ko e mui aki haia he tau heagaapi oti ke he ha lautolu a tau kau; ko e takitaki kau hana foki ko Ahieseru haia ko e tama a Amisatai.
26 Ko e takitaki kau foki he magafaoa he fanau a Asera, ko Pagielu haia ko e tama a Okirano.
27 Ko e takitaki kau foki he magafaoa he fanau a Nafatali, ko Akira ko e tama a Enano.
28 Ne pihia ni e tau fenoga he fanau a Isaraela ke he tau kau ha lautolu ka kua o fenoga a lautolu.
29 Ti pehe atu a Mose kia Hopapo ko e tama a Reuelu ko e Mitiana, ko e matua fugavai a Mose, Ha ne o fenoga a mautolu ke he mena ne pehe mai ai a Iehova, To foaki atu ai e au kia mutolu; kia o a tautolu mo koe, to mahani mitaki a mautolu kia koe ha kua talahaua mai e Iehova e tau mena mitaki kia Isaraela.
30 Ti pehe atu a ia kia ia, Nakai ni fano au, ka to liu au ke he haku motu mo e haku a magafaoa.
31 Ti pehe atu a ia kia ia, Aua neke toka e koe a mautolu, ha kua iloa koe mena heapi ni a mautolu ke he tutakale, to eke foki a koe mo tau mata ma mautolu.
32 Kaeke foki ke o a tautolu mo koe, ti eke ai e mautolu kia koe e tau mena mitaki oti ka eke mai e Iehova kia mautolu.
33 Ti o fenoga ai a lautolu he mouga a Iehova, po tolu ha lautolu a fenoga; ko e tau po foki ia ne tolu ne mumua atu ai kia lautolu e puha he maveheaga a Iehova ke he fenoga, ke kumi ha okiokihaga ma lautolu.
34 Ti ha i luga kia lautolu e aolagi a Iehova ke he taha aho mo e taha aho, ka o atu ai a lautolu he heaga api.
35 Ka uta ai e puha, ti pehe age a Mose, Iehova na e, kia tu mai ā koe, kia fakamavehevehe ai a lautolu kua fai fi kia koe; kia fehola foki ki mua hau a lautolu kua fakavihia a koe.
36 Ka tuku hifo ai ti pehe age a ia, Iehova na e, kia liu mai a koe ke he tau tagata afe mo afe ia Isaraela.