Numera 11:1-35
11 KUA loma he motu; ti kelea ia ke he tau teliga a Iehova ha kua logona e Iehova, ti tupu ai hana ita; ti puho ai e afi mai ia Iehova kia lautolu ti fakaotioti ai a lautolu ke he tau katofia he heaga api.
2 Ti tagi atu ai e motu kia Mose; ti liogi a Mose kia Iehova, ti mate ai e afi.
3 Ti ui e higoa he mena na ko Tapara; ha ko e afi ia Iehova ne puho ai kia lautolu.
4 Kua manako lahi foki he tau tagata kehe tokologa ha ia lautolu, ti liu foki tagi e fanau a Isaraela, mo e pehe age a lautolu, To ta mai e hai e tau manu ke kai ai a tautolu?
5 Kua manatu e tautolu ke he tau ika ne kai fakahanoa ai e tautolu i Aikupito; ko e tau fua kukama foki, mo e tau fua meleni, mo e tau fua liki, mo e tau fua aniani, mo e tau fua kalika;
6 Ka ko e ainei kua fifigo tuai ha tautolu a moui; to nakai kitia e tautolu ha mena ka ko e manai ni.
7 Ko e manai foki kua tuga ne fua koriano ia, ne tuga foki ne petala ke kitekite ki ai.
8 Ti faifano e motu mo e okooko ai, ti holo ai ke he tau maka holo, po ke tukituki ke he kumete, ti tunu e lautolu ia ke he pani, mo e taute aki fakapukupuku; kua namu foki ia po ke tau areto pukupuku kua laku mo e lolo.
9 Kua to hifo e hahau ke he heaga api ke he po, ti to hifo ki ai e manai.
10 Kua logona e Mose e motu kua tagi ke he tau magafaoa ha lautolu, ko e tau tagata takitokotaha ke he tau gutuhala he tau fale ie ha lautolu; ti tupu lahi ai e ita a Iehova, ti kelea foki ni ke he manatu a Mose.
11 Ti pehe atu ai a Mose kia Iehova, Ko e heigoa e mena ne mahani kelea mai ai a koe ke he hau a fekafekau? ko e ha foki nakai ofania au ki mua hau, kua tuku mai ai e kavega he motu oti nai ki luga ia au?
12 Ne fatu kia au ke he motu oti nai? po ke fanau kia e au a lautolu, kua pehe mai ai a koe kia au, Kia uta e koe a lautolu ke he hau a fatafata, tuga ne uta he tagata eke tama e tama mukemuke, kia hohoko atu a lautolu ke he kelekele ne omonuo ai e au ke ta atu ke he ha lautolu a tau matua.
13 Ke moua mai i fe e au e tau manu ke ta atu ai ke he motu oti nai? ha kua tagi mai a lautolu kia au, kua pehe mai, Kia ta mai e koe e tau manu ma mautolu, ke kai ai a mautolu.
14 Nakai fahia au ke hahamo tokotaha e kavega he motu oti nai, ha kua mamafa ue atu ia kia au.
15 Kaeke foki ke eke pihia e koe kia au, kua olelalo atu ni e au kaeke kua ofania au e koe, kia kelipopo ni e koe au, ka e aua neke kitia e au haku a matematekelea.
16 Ti pehe mai ai a Iehova kia Mose, Kia fakapotopoto mai e koe kia au e tau tagata tokofitugofulu he tau patu a Isaraela, kua iloa ai e koe ko e tau patu he motu a lautolu, mo e ha lautolu a tau takitaki; ti ta mai e koe a lautolu ke he fale uta fano he tutuutaga, ti tutu ai a lautolu ke he mena ia fakalataha mo koe.
17 To hifo foki au ti vagahau ai foki a taua mo koe ke he mena ia; to uta kehe foki e au mai he agaga ha ha ia koe, mo e tuku atu ai kia lautolu; ti tauloto ai e lautolu fakalataha mo koe e kavega he motu nai, kia nakai hahamo e koe ia tokotaha.
18 Ti pehe atu foki a koe ke he motu, Kia fakatapu ai e mutolu a mutolu, ha ko e mena kai ai e mutolu a tau manu a pogipogi; nukua tagi a mutolu ke he tau teliga a Iehova, kua pehe mai, To ta mai e hai e tau manu ma mautolu ke kai ai a mautolu? ka ko e mena mitaki a mautolu i Aikupito; ko e mena ia to ta atu ai e au e tau manu ma mutolu, ke kai ai a mutolu.
19 Nakai ko e aho taha, po ke aho ua, po ke aho lima, po ke aho hogofulu, po ke aho uafulu ke kai ai e mutolu e tau manu,
20 Ka e kai ai ato hoko ke he mahina katoa, ato hu atu ia he tau poko ihu ha mutolu, ti eke ia mo mena vihiatia kia mutolu, ha kua tiaki e mutolu a Iehova ha ha ia mutolu kua tagi foki a mutolu ki mua hana, kua pehe mai, Ko e ha ne o mai ai a mautolu nai i Aikupito?
21 Ti pehe atu a Mose, Ko e motu kua o ai fakalataha mo mautolu ne ono e teau afe ia he tau tagata tau, ka kua pehe mai a koe, To foaki atu e au e tau manu ma lautolu ti kai ai e lautolu ke he mahina katoa.
22 To keli kia e tau fuifui mamoe mo e tau fuifui povi ma lautolu kia makona ai a lautolu? po ke fakapotopoto ai kia e tau ika oti he tahi ma lautolu kia makona ai a lautolu?
23 Ti pehe mai ai a Iehova kia Mose, Kua fakaku kia e lima a Iehova? to kitia e koe ainei po ke hoko haku a tau kupu kia koe poke nakai.
24 Ti hu atu a Mose, mo e fakamatala atu ai e tau kupu a Iehova ke he motu; ti fakapotopoto ai e ia e tau patu he motu, ko e tau tagata toko fitugofulu, ti fakatutu takai e ia a lautolu ke he fale uta fano.
25 Ti haele hifo ai a Iehova ke he aolagi, mo e vagahau mai kia ia, ti uta foki e ia mai he agaga ha ha ia ia, mo e tuku atu ai ke he tau patu ne tokofitugofulu; kua nofo e agaga ki luga ia lautolu, ti perofeta ai e lautolu, ti hiku ai ni ke he aho ia.
26 Ka e nonofo ai e na tagata tokoua ha lautolu ke he heaga api, ko e higoa he taha ko Elitato, mo e higoa he taha ko Metato; kua nofo foki e agaga ki luga ia laua, (ko e mena tohi foki a laua mo lautolu ne tohi, ka e nakai o atu a laua ke he fale uta fano,) ti perofeta ai a laua ke he heaga api.
27 Ti poi mai taha fuata mo e tala mai kia Mose kua pehe mai, kua perofeta ai a Elitato mo Metato ke he heaga api.
28 Ti pehe mai ai a Iosua ko e tama a Nuno, ko e fekafekau a Mose ko e taha he hana tau fuata, kua pehe mai, Ko e iki na e, ma Mose, kia hataki e koe a laua.
29 Ti pehe age a Mose kia ia, Kua mahekeheke kia a koe ha ko au? kua manako ni au ke eke e motu oti a Iehova mo tau perofeta, mo e foaki atu ai e Iehova hana Agaga kia lautolu.
30 Ti fina age ai a Mose ke he heaga api, ko ia mo e tau patu a Isaraela.
31 Ti agi mai ai e matagi ia Iehova, ti ta mai ai e tau salu mai he tahi, kua to ai ke he heagaapi, tuga ne mamao he fenoga ke he aho taha ka o ke he taha fahi, ti tuga ne mamao he fenoga ke he aho taha ka o ke he taha fahi, kua takai ai ni he heagaapi, ne ua foki e kupita ki luga he fuga kel kele.
32 Ti tutu ai e motu ke he aho loa ia, mo e po katoa, mo e aho katoa a pogipogi ti tatanaki ai e lautolu e tau salu; ko ia ne tote hana mena kua tanaki ne hogofulu ni hana omera; ti tafola ai a lautolu ma lautolu, kua takai ai ni he heagaapi.
33 Ha ne kakati e lautolu e tau manu ka e nakaila kai, ti tupu ai e ita a Iehova ke he motu, ti ta ai e Iehova e motu ke he mauku lahi mahaki ni.
34 Ti ui ai e ia e higoa he mena ia ko Kiperota-hatava, ha ko e mena ia ne tanu ai e lautolu e motu ne manako lahi ke he tau mena kai.
35 Ti o fenoga ai e motu i Kiperota-hatava ki Haserota; ti nonofo ai a lautolu i Haserota.