Numera 14:1-45
14 TI tagi fakaleolahi ai he fakapotopotoaga oti, kua tagi ai foki he motu ke he po ia.
2 Ti loma ai e fanau a Isaraela oti kia Mose mo Arona, kua pehe mai e fakapotopotoaga oti kia laua, mitaki ane mamate a mautolu ke he motu ko Aikupito, ane mamate foki ke he tutakale nai po kua mitaki.
3 Kua ta mai he ha e Iehova a mautolu ke he motu nai kia mamate ai ke he pelu, ke uta ai foki ha mautolu a tau fifine mo e ha mautolu a tau tama ikiiki mo tau ola ha lautolu? Nakai kia mitaki ke liliu atu ai a mautolu ki Aikupito?
4 Ti pehe a lautolu ko e taha ke he taha, kia kotofa e tautolu taha takitaki, mo e liliu atu ai a tautolu ki Aikupito.
5 Ti fakaveveli fakafohifo ai a Mose mo Arona ki mua he tau tagata oti he fakapotopotoaga he fanau a Isaraela.
6 Ko Iosua foki e tama a Nuno mo Kalepa ko e tama a Iefuna ko e tau tagata a laua he tau tagata toko ne toko aki e motu, kua hēhē e laua ha laua a tau tapulu.
7 Kua tala age a laua ke he fakapotopotoaga oti he fanau a Isaraela kua pehe atu, Ko e motu ne o a mautolu ke toko ki ai, ko e motu mitaki lahi ue atu ni a ia.
8 Kaeke ke fiafia mai a Iehova kia tautolu, to fakahoko atu e ia a tautolu ke he motu na, mo e foaki mai ia kia tautolu; ko e motu ni kua tafe ai e puke huhu mo e meli.
9 Ka e aua neke fakafualoto a mutolu kia Iehova, ti aua neke matakutaku a mutolu ke he tau tagata he motu; ha ko e mena eke ni a lautolu mo mena kai ma tautolu; ha kua to tuai ha lautolu a taue, kua fakalataha ni a tautolu mo Iehova, ua matakutaku a mutolu kia lautolu.
10 Ka e pehe ni e fakapotopotoaga oti ke pinimaka a laua ke he tau maka. Ti fakakite mai ai e lilifu a Iehova ke he fale uta fano he tutuutaga ki mua he fakapotopotoaga oti ni he fanau a Isaraela.
11 Ti pehe mai a Iehova kia Mose, To fakavihia mai he motu nai kia au ato a fe? To nakai tua a lautolu kia au ato a fe pete he tau fakamailoga oti kua eke e au kia lautolu?
12 To ta e au a lautolu ke he tatalu, to fakaotioti foki e au a lautolu, to eke foki e au a koe mo tupuna he motu lahi mo e malolo, ke mua ia kia lautolu.
13 Ti pehe atu a Mose kia Iehova, Ti logona ai ni e Aikupito, (ha ko e mena ta hake e koe e motu nai ke he mana hau mai loto ia lautolu;)
14 To tala atu foki a lautolu kia lautolu kua nonofo ke he motu nai; ha kua logona ni e lautolu, ko koe ni Iehova na e, kua ha i ai ke he motu nai, ko koe ni Iehova na e kua kitia ai mo e fakafehagaoaki ni; ko e aolagi hau foki kua tu ki luga kia lautolu, kua mua foki a koe kia lautolu ke he aolagi fakatupou ka aho, mo e afi fakatupou ke he po.
15 Ko e hanai, kaeke ke kelipopo ai e koe e motu nai tuga ne tagata tokotaha, ti talahau ai he tau motu kua logona ai e tala kia koe, kua pehe age.
16 Nakai maeke kia Iehova ke fakahoko atu e motu nai ke he motu ne omonuo ai e ia kia lautolu, ko e mena ia ni kua kelipopo ai e ia a lautolu ke he tutakale.
17 Hanai, kia lahi ai e mana he haku a Iki, tuga ne talahau mai e koe, kua pehe,
18 Ko Iehova kua fakatuai hana ita, to lahi hana fakaalofa, kua fakamagalo foki e ia e hala, mo e holifono, ka e nakai toka noa e ia a lautolu kua hala, ka e taui ni e hala he tau matua ke he ha lautolu a fanau, ke hoko ke he tolu mo e fa e hau.
19 Kia fakamagalo e koe e hala he motu nai, ke lata mo e hau a fakaalofa lahi, tuga foki ne fakamagalo ai e koe ke he motu nai ha lautolu a tau hala he o mai i Aikupito kua hoko mai ni ke he aho nai.
20 Ti pehe mai ai a Iehova, Kua fakamagalo tuai e au tuga ne kupu hau,
21 Ka e pete ia, kua moui ni au, to fakapuke ai ni e lalolagi oti ke he lilifu a Iehova.
22 Ka ko e tau tagata oti ne kitia haku a lilifu mo e haku a tau fakamailoga ne eke ai e au i Aikupito mo e tutakale, kua kamatamata mai foki laga hogofulu kia au, mo e nakai fanogonogo mai a lautolu ke he haku a tau kupu;
23 Nakai ni kitia e lautolu e motu ne omonuo ai e au ke he ha lautolu a tau matua, nakai ni kitia ai foki e lautolu oti kua fakavihia mai kia au.
24 Ka ko e haku a fekafekau ko Kalepa ha kua ha ia ia e loto kua kehe mo lautolu, ti mui mai fakaoti a ia kia au, ko e mena ia ni to fakahoko atu e au a ia ke he motu ne fano a ia ki ai, to eke foki ia mo e hana fanau.
25 (Ne nonofo ai e tau tagata Amaleka mo e tau tagata Kanana ke he pahua.) Kia liliu atu a mutolu a pogipogi, mo e o atu ke he tutakale, ke he puhala ke he tahi Kula.
26 Ti vagahau mai foki a Iehova kia Mose mo Arona kua pehe mai,
27 To fakauka e au ato a fe mo e fakapotopotoaga mahani hepehepe nai, ko lautolu kua loma kia au? Kua logona tuai e au e loma he fanau a Isaraela kua loma mai ai a lautolu kia au.
28 Kia tala age e koe kia lautolu, Kua pehe mai a Iehova, kua moui ni au, to eke ni e au kia mutolu tuga ne kupu ha mutolu kua hoko mai ke he haku a tau teliga;
29 To mamate ai ha mutolu a tau tino ke he tutakale nai; ko mutolu oti ni ne totou, fakalata ke he katoatoa ha mutolu oti he totou, ke kamata ia lautolu ne uafulu ha lautolu a tau tau katoa mo lautolu ne fakamua atu, ko mutolu oti kua loma mai kia au.
30 Nakai ni hohoko atu a mutolu ke he motu ne omonuo ai au kia mutolu ke nonofo ai, ka e toe a Kalepa ko e tama a Iefuna, mo Iosua ko e tama a Nuno.
31 Ka ko e tau tama ikiiki ha mutolu ne pehe mai a mutolu, To eke a lautolu mo tau tagata kua fofo he tau, to fakahoko atu e au a lautolu ki ai ti iloa ni e lautolu e motu kua tiaki ai e mutolu.
32 Ka ko mutolu, to mamate ni ha mutolu a tau tino ke he tutakale nai.
33 Ko e ha mutolu a fanau foki to o fano ai a lautolu ke he tutakale ke he tau tau ne fagofulu ni, ti fua ai e lautolu ha mutolu a tau hala, ato fakaotioti ai ha mutolu a tau tino ke he tutakale.
34 Fakalata ke he tau po ka totou ne toko atu ai e mutolu ke he motu, ne fagofulu e po, ko e po taha fakalata ia ke he tau taha, ko e fagofulu ni e tau to fua ai e mutolu ha mutolu a tau hala, ti iloa ai e mutolu haku a fano kehe ia mutolu.
35 Ko au ni ko Iehova, kua vagahau atu e au, to eke ai e au ni ke he fakapotopotoaga mahani kelea oti nai kua fakapotopoto mai kia au; to fakaotioti ai a lautolu ke he tutakale nai, ti mamate ai ni a lautolu.
36 Ko e tau tagata foki ne fakafano atu e Mose ke toko ke he motu ti liliu mai a lautolu mo e fakatupu ai e loma he fakapotopotoaga oti ke he ha lautolu a tala kelea kua fakamatala ke he motu,
37 Ko e tau tagata ia ne fakamatala ai e tala kelea ke he motu, ne mamate ni a lautolu ke he tatalu ki mua a Iehova.
38 Ka ko Iosua ko e tama a Nuno, mo Kalepa ko e tama a Iefuna ne momoui ai ni a laua he tau tagata ne o atu ke toko ke he motu.
39 Kua talatala atu e Mose e tau kupu na ke he fanau oti a Isaraela, ti maānu lahi ai ni e motu.
40 Ti uhu matike a lautolu ke he magaaho pogipogi, mo e o hake a lautolu ke he tapunu mouga, kua pehe age, Kitiala, ko mautolu hanai, to o hake a mautolu ke he mena kua talahau mai e Iehova; ha kua hala tuai a mautolu.
41 Ka kua pehe atu a Mose, Kua holi he ha e mutolu e poaki a Iehova ka e nakai ni monuina e mena ia.
42 Aua neke o hake a mutolu, ha kua nakai ha i ai a Iehova mo mutolu neke mamate ai a mutolu ki mua ha lautolu kua fai fi kia mutolu.
43 Ha ko e mena hanai ha i mua ia mutolu e tau tagata Amaleka mo e tau tagata Kanana to mamate ni a mutolu ke he pelu; ha kua liliu kehe a mutolu ia Iehova ko e mena ia nakai ha i ai a ia mo mutolu.
44 Ka e fakatokoluga a lautolu mo e o hake ke he tapunu mouga; ka ko e puha he maveheaga a Iehova mo Mose nakai fano kehe a ia mo e heaga agi.
45 Ti o hifo ai e tau tagata Amaleka mo e tau tagata Kanana ko lautolu ia ne nonofo ke he mouga ti keli e lautolu a lautolu, mo e tutuli a lautolu kua hohoko ni ki Horema.