Numera 17:1-13
17 KUA vagahau mai foki a Iehova kia Mose, kua pehe mai,
2 Kia tala age a koe ke he fanau a Isaraela, kia ta mai ai ia lautolu e tau tokotoko, takitaha e magafaoa he ha lautolu a tau matua mo e tokotoko; kia ta mai ai he tau iki oti he tau magafaoa he ha lautolu a tau matua, ko e hogofulu ma ua e tokotoko; ti tohi ai e higoa he tagata ke he hana tokotoko.
3 Ti tohi ai e higoa a Arona ke he tokotoko a Levi; ha ko e mena taki taha e tokotoko ma e patu he magafaoa he ha lautolu a tau matua.
4 Kia tuku ai foki ia ke he fale uta fano he tutuutaga ki mua he puha he fakatufono, ke he mena ke feleveia ai a tautolu mo mutolu,
5 To hoko foki pehe ko e tokotoko he tagata kua fifili ai e au to fufua ia; ti fakahiku ai e au ki mua haku e loma he fanau a Isaraela kua loma ai a lautolu kia mutolu.
6 Kua tala age foki a Mose ke he fanau a Isaraela, ti ta mai ai he tau iki oti ha lautolu, ke takitaha e iki mo e tokotoko he magafaoa he ha lautolu a tau matua, ko e hogofulu ma ua e tokotoko; ne fakalataha foki e tokotoko a Arona mo e tau tokotoko ha lautolu.
7 Ti tuku ai e Mose e tau tokotoko ki mua a Iehova ke he fale uta fano ne ha i ai e fakatufono.
8 Kua hoko ke he aho a pogipogi, ti hu atu ai a Mose ke he fale uta fano ne ha i ai e fakatufono, kitiala foki, kua fufua mai he tokotoko a Arona ma e magafaoa a Levi; kua fufua mai ni, kua matala mai ai e tau fiti, kua fua mai e tau fua sikati motua.
9 Ti uta ai e Mose e tau tokotoko oti mai mua a Iehova ke he fanau a Isaraela oti, ti kitekite a lautolu ki ai, kua taki tokotaha a lautolu mo e uta hana tokotoko.
10 Ti pehe mai a Iehova kia Mose, Kia liuaki mai e tokotoko a Arona ki mua he puha he fakatufono ke toka ai, ke eke mo fakamailoga ke he tau tagata fakafualoto; ti fakaoti e koe ha lautolu a loma ki mua haku, ke aua neke mamate ai a lautolu.
11 Ti eke e Mose tuga ne poaki mai ai e Iehova kia ia, ne eke ni e ia pihia.
12 Ti tala mai e fanau Isaraela kia Mose, kua pehe mai, Kitiala, kua mamate a mautolu, kua mahaikava a mautolu, kua mahaikava ni a mautolu oti.
13 Kaeke ke fakatata atu taha ke he faituga a Iehova ti mate ni a ia, po ke fakaotioti kia a mautolu oti he mate?