Numera 20:1-29
20 KUA hohoko atu e fanau a Isaraela, ko e fakapotopotoaga oti, ke he tutakale ko Tisina, ke he mahina fakamua; ti nonofo ai a lautolu ke he motu ko Katesa, kua mate ai foki a Miriama, ti tanu ai a ia ke he mena ia.
2 Kua nakai fai vai foki ma e fakapotopotoaga; ti fakapotopoto mai ai a lautolu ke totoko atu kia Mose mo Arona.
3 Ti fetoko atu e motu kia Mose, mo e talahau atu pehe a lautolu, mitaki ane mamate a mautolu he mamate ai ha mautolu a tau matakainaga ki mua a Iehova.
4 Ko e ha ne ta mai ai e mua e fakapotopotoaga a Iehova ke he tutakale nai, ke mamate ai a mautolu, katoa foki mo e ha mautolu a tau manu?
5 Ko e ha foki ne ta hake ai e mua a mautolu i Aikupito, ke ta mai ai a mautolu ke he mena kelea nai? nakai ko e mena ha i ai ha fua, po ke fua mati, po ke fua vine, po ke fua rimoni, to nakai fai vai foki ke inu ai.
6 Ti o atu ai a Mose mo Arona mai mua he fakapotopotoaga ke he gutuhala he fale uta fano he tutuutaga, ti fakaveveli fakafohifo ai a laua; ti fakakite mai ai e lilifu a Iehova kia laua.
7 Ti vagahau mai foki a Iehova kia Mose, kua pehe mai,
8 Kia uta e koe e tokotoko, mo e fakapotopoto mai a fakapotopotoaga, ko koe mo Arona hau a matakainaga, ti vagahau atu a mua ke he maka tumau ki mua ha lautolu, ti foaki mai ai e ia hana vai; kia fakatafe mai foki e koe e vai ma lautolu he maka tumau, ti fakainu ai e koe e fakapotopotoaga katoa foki mo e ha lautolu a tau manu.
9 Ti uta ai e Mose e tokotoko mai mua a Iehova, tuga ne poaki mai e ia kia ia.
10 Ti fakapotopoto ai e Mose mo Arona e fakapotopotoaga ki mua he maka tumau, ti pehe atu a ia kia lautolu, Kia fanogonogo mai a mutolu ko mutolu kua fakafualoto; kia fakatafe mai kia e maua e vai mai he maka tumau nai ma mutolu?
11 Ti nikiti ai e Mose hana lima, mo e ta lagaua e maka tumau ke he hana tokotoko; ti tafe fakalahi mai ai e vai, ti inu ai e fakapotopotoaga mo e ha lautolu a tau manu.
12 Ti pehe mai ai a Iehova kia Mose mo Arona, Ha kua nakai tua a mua kia au, ke fakatapu ai au ki mua he fanau a Isaraela, ko e mena ia ni nakai fakahoko atu ai e mua e fakapotopotoaga nai ke he motu kua foaki atu ai e au kia lautolu.
13 Ko e vai a Meripa hanai, ha kua fetoko ai e fanau a Isaraela kia Iehova, ti fakatapu ai a ia ki mua ha lautolu.
14 Ti fakafano atu e Mose e tau fekau mai Katesa ke he patuiki i Etoma ke pehe atu ai, Kua pehe atu hau a matakainaga ko Isaraela, kua iloa e koe e tau mena matematekelea kua hoko mai ai kia mautolu.
15 Ne o hifo ha mautolu a tau matua ki Aikupito, ti po loga ni he nonofo ai a mautolu i Aikupito; ka e ekefakakelea mai a Aikupito kia mautolu katoa mo e ha mautolu a tau matua.
16 Ti tagi ai a mautolu kia Iehova, ti fanogonogo mai a ia ke he ha mautolu a leo, ti fakafano mai foki e ia e agelu mo e ta mai ai a mautolu i Aikupito; kitiala foki ha ha i Katesa a mautolu, ko e maga haia ke he tau katofia he hau a motu.
17 Kia toka e koe a mautolu ke o atu ai ke he hau a motu, nakai o age a mautolu ke he tau fonua, po ke tau uluvine, to nakai inu foki e mautolu e vai he tau vai keli; to o atu ai a mautolu ke he puhala tu he patuiki; ti nakai afe ai a mautolu ke he fahi matau po ke fahi hema, ato mole atu e tau katofia he hau a motu.
18 Ka e pehe mai a Etoma kia ia, nakai ni o mai a mutolu ke he haku a motu, neke finatu ai au mo e pelu ke fonofono a mutolu.
19 Ti pehe atu ai e fanau a Isaraela kia ia, Ko e puhala tanu ke o ai a mautolu; kaeke foki ke inu ai a mautolu he hau a vai ko au ni mo e haku a tau manu, ti ta atu ai e au kia koe hana totogi; nakai eke e au ha mena ka e o atu ai ni ke he haku a tau hui.
20 Ti pehe mai a ia nakai ni hau a koe. Ti o atu a Etoma mo e tau tagata tokologa mo e lima malolo ke totoko atu kia ia.
21 Kua nakai ni mafai a Etoma ke toka a Isaraela ke finatu ai ke he hana motu; ti o kehe a Isaraela ia ia.
22 Ti o kehe ai e fanau a Isaraela i Katesa ko e fakapotopotoaga oti, ti hohoko atu a lautolu ke he mouga ko Horo.
23 Ti tala mai foki a Iehova kia Mose mo Arona ke he mouga ko Horo, ke he tau katofia he motu ko Etoma kua pehe mai.
24 Kia fakalataha atu a Arona ke he hana faoa; ha ko e mena nakai hoko atu a ia ke he motu kua foaki atu ai e au ke he fanau a Isaraela, he totoko mai a mua ke he haku a kupu ke he vai ko Meripa.
25 Kia uta e koe a Arona mo e hana tama ko Eleasaro, ti o hake ai a mutolu mo laua ke he mouga ko Horo;
26 Ti aki ai e koe ia Arona hana tau tapulu, mo e fakatapulu ai a Eleasaro hana tama; ti fakalataha atu ai a Arona ke he hana faoa, to mate ni a ia ke he mena ia.
27 Ti eke ni e Mose tuga ne poaki mai ai e Iehova; ti o hake ai a lautolu ke he mouga ko Horo ki mua he fakapotopotoaga oti.
28 Ti āki ai e Mose ia Arona hana tau tapulu, mo e fakatapulu ai e ia a Eleasaro hana tama; ti mate ai a Arona ke he mena ia ke he tapunu mouga ti o hifo ai a Mose mo Eleasaro he mouga.
29 Kua kitia he fakapotopotoaga oti kua mate tuai a Arona, ti tagi ai ni e faoa oti a Isaraela ha ko Arona ke he tau aho ne tolugofulu.