Numera 27:1-23
27 TI o mai ai e tau tama fifine a Selofeata, ko e tama a Heferu, ko e tama ia a Kiliata, ko e tama ia a Makiro, ko e tama ia a Manase, ko e tau magafaoa ia a Manase ko e tama a Iosefa; ko e tau higoa foki hanai he hana tau tama fifine, ko Maala, mo Noa, mo Hakelā, mo Meleka, mo Tiresa.
2 Ti tutu a lautolu ki mua a Mose, ki mua foki a Eleasaro ko e ekepoa, ki mua foki he tau patu, mo e fakapotopotoaga oti, ke he gutuhala he fale utafano he tutuutaga, kua pehe mai,
3 Kua mate tuai ha mautolu a matua tane ke he tutakale, nakai ha i ai a ia ke he fakapotopotoaga ha lautolu ne fakapotopoto ai ke totoko atu kia Iehova, ko lautolu ne kau fakalataha mo Koru; ka e mate a ia ke he hana ni a hala, ti nakai fai tama tane a ia.
4 Kua fakagalo ai he ha e higoa he ha mautolu a matua tane ke he hana magafaoa, he nakai fai tama tane a ia? Kia ta mai kia mautolu ha fonua ma mautolu fakalataha mo e tau matakainaga he ha mautolu a matua tane.
5 Ti uta ai e Mose ha lautolu a tau kupu ki mua a Iehova.
6 Ti talahau mai e Iehova kia Mose, kua pehe mai,
7 Kua tonu e tau kupu he tau tama fifine a Selofeata; kia ta age e koe ma lautolu ha tufaaga fakalataha mo e tau matakainaga he ha lautolu a matua tane, kia tuku age kia lautolu e tufaaga he matua tane ha lautolu.
8 Ti vagahau atu a koe ke he fanau a Isaraela kia pehe atu, Kaeke ke mate e tagata, ka e nakai fai tama tane a ia, to tuku atu ai e mutolu hana tufaaga ke he hana tama fifine.
9 Kaeke foki kua nakai fai tama fifine a ia, ti tuku atu ai e mutolu hana tufaaga ke he hana matakainaga.
10 Kaeke foki kua nakai fai matakainaga a ia, ti tuku atu ai e mutolu hana tufaaga ke he tau matakainaga he hana matua tane.
11 Kaeke foki ke nakai ha i ai ha matakainaga he hana matua tane, ti ta atu ai e mutolu hana tufaaga ke he taha tagata he hana magafaoa, ko e tagata ne magafaoa taha ai a laua mo ia, ti eke ia mana. Ti eke foki e mena na mo fakatufono ke fakatonu aki ke he fanau a Isaraela, tuga ne poaki mai ai e Iehova kia Mose.
12 Kua pehe mai foki a Iehova kia Mose. Kia hake a koe ke he mouga nai ko Aperima, ti kitekite a koe ke he motu kua foaki atu e au ke he fanau a Isaraela.
13 Kia kitekite a koe ki ai, ti fakalataha atu a koe mo e hau a faoa, tuga ne fakalataha atu ai hau a matakainaga ko Arona.
14 Ha ko e mena totoko mai a mua ke he haku a kupu ke he tutakale ko Sisina, he taufetoko mai ai he fakapotopotoaga, nakai fakatapu ai e mua au ke he vai ki mua ha lautolu; ko e vai ko Meripa haia ha i Katesa, ke he tutakale ko Sisina.
15 Ti vagahau atu e Mose kia Iehova, kua pehe atu,
16 Kia tuku mai e Iehova, ko e Atua he tau agaga he tau tagata oti, ha tagata ke pule ke he fakapotopotoaga;
17 Ko e taha ke hu atu ki mua ha lautolu mo e hu mai ki mua ha lautolu; ko e taha ke takitaki atu a lautolu, mo e takitaki mai a lautolu; ti aua neke eke e fakapotopotoaga a Iehova ke tuga ne tau mamoe kua nakai fai leveki a lautolu.
18 Ti pehe mai ai a Iehova kia Mose, Kia uta e koe a Iosua ko e tama a Nuno, ko e tagata ha ha i ai e Agaga, ti fakalago ai e koe hau a tau lima ki luga hana.
19 Ti tuku atu e koe a ia ki mua a Eleasaro ko e ekepoa, ki mua foki he fakapotopotoaga oti, ti kotofa ai e koe a ia ki mua ha lautolu.
20 Ti tuku atu e koe kia ia taha maga he hau a lilifu, kia fanogonogo ai e fakapotopotoaga oti he fanau a Isaraela.
21 To tu foki a ia ki mua a Eleasaro ko e ekepoa, ti huhu foki e ia māna ke he fakatonuaga he Urima ki mua a Iehova; ko e hana tau kupu ke o atu ai a lautolu ko e hana tau kupu ke liliu mai ai a lautolu, ko ia katoa mo e fanau oti a Isaraela fakalataha mo ia, ko e fakapotopotoaga oti ni.
22 Ti eke e Mose tuga ne poaki mai ai e Iehova kia ia, ne uta e ia a Iosua, mo e fakatu atu a ia ki mua a Eleasaro ko e ekepoa, ki mua foki he fakapotopotoaga oti.
23 Ti fakalago ai e ia hana tau lima ki luga hana, ti kotofa ai a ia, tuga ne tala mai ai e Iehova kia Mose.