Numera 28:1-31
28 KUA vagahau mai foki a Iehova kia Mose, kua pehe mai,
2 Kia poaki atu e koe ke he fanau a Isaraela kia pehe atu a koe kia lautolu, Ko e tau poa kia au, ko e tau mena kai mo e tau poa kua eke ke he afi, ko e tau mena manogi mitaki kia au, kia taofi ai e mutolu, kia ta mai e mutolu kia au ke he ha lautolu a tau aho kua kotofa ai.
3 Ti pehe atu a koe kia lautolu, Ko e tau poa kua eke ke he afi hanai ke ta mai ai e mutolu kia Iehova; takiua e tau punua mamoe ke he tau aho, ko e tau punua mamoe tau taha, kua katoatoa e mitaki ke eke ai mo tau poa huhunu mau.
4 Kia eke ai e koe taha punua mamoe mo poa ke he pogipogi, ti eke ai e taha punua mamoe mo poa ke he afiafi.
5 Ko e omera taha he falaoa mitaki kua laku mo e hana maga ne fa aki he hinu he puke lolo kua tukituki ke eke mo poa mena kai.
6 Ko e poa huhunu mau haia, ne kotofa ai ke he mouga ko Sinai, ke eke mo mena manogi mitaki, ko e poa kua eke ke he afi kia Iehova.
7 Ko e hana poa inu foki ko e maga ne fa aki e hinu he uaina ke he taha punua mamoe; kia liligi ai ke he mena tapu ke eke mo poa inu ko e uaina kona a Iehova.
8 Ko e taha foki e punua mamoe ke eke e koe ke he afiafi, kia eke ke tuga e poa mena kai ke he pogipogi, mo e hana poa inu; ko e poa kua eke ke he afi ko e mena manogi mitaki kia Iehova.
9 Ka ko e aho sapati kia ua e punua mamoe tau taha, kua katoatoa e mitaki; ti ua foki e omera he falaoa mitaki kua laku mo e puke lolo ke eke mo poa mena kai, katoa mo e hana poa inu.
10 Ko e poa huhunu haia ke he tau sapati oti, ke lafilafi ai ke he poa huhunu mau, mo e hana poa inu.
11 Ko e tau kamataaga foki he ha mutolu a tau mahina kia ta mai ai e mutolu e poa huhunu kia Iehova; ko e ua e punua povi tane, mo e taha mamoe tane, mo e fitu e punua mamoe tau taha, kua katoatoa e mitaki.
12 Kia takitaha e povi tane mo e tolu e omera he falaoa mitaki kua laku mo e puke lolo ke eke mo poa mena kai; ti ua foki e omera he falaoa mitaki kua laku mo e puke lolo ke eke mo poa mena kai ma e mamoe tane ne taha.
13 Kia takitaha e punua mamoe mo e taha omera he falaoa mitaki kua laku mo e puke lolo, ke eke mo poa mena kai, ko e poa huhunu haia, ko e mena manogi mitaki, ko e poa kua eke ke he afi kia Iehova.
14 Ko e ha lautolu a tau poa inu; kia takitaha e povi tane mo e maga ne veveheua ai e hinu he uaina; mo e mamoe tane mo e maga ne tolu aki e hinu; kia takitaha foki e punua mamoe mo e maga ne fa aki e hinu; ko e tau poa huhunu haia ke eke ke he mahina, ko e tau mahina oti ni he tau.
15 Kia eke foki kia Iehova taha punua koti tane mo poa ha ko e hala, ke lafilafi ai ke he poa huhunu mau, mo e hana poa inu.
16 Ko e mahina fakamua ko e aho hogofulu ma fa he mahina ke eke ai e paseka kia Iehova.
17 Ko e aho hogofulu ma lima he mahina ia ko e aho galue haia; fitu ni e aho ke kai ai e mutolu e areto nakai fakaea.
18 Ko e aho fakamua ke eke ai e fakapotopotoaga tapu; aua neke eke ai e mutolu ha gahua mamafa.
19 Kia ta mai e mutolu e poa kua eke ke he afi, ko e poa huhunu kia Iehova; ko e ua e punua povi tane, mo e taha mamoe tane, mo e fitu e punua mamoe tau taha, kua katoatoa e mitaki ma mutolu.
20 Ko e ha lautolu a poa mena kai foki ko e falaoa mitaki kua laku mo e puke lolo; kia eke ai takitolu e omera ke he povi tane taha, ti ua e omera ke he mamoe tane.
21 Kia eke ai takitaha e omera ke he punua mamoe, ti pihia ke he tau punua mamoe ne fitu.
22 Ko e taha koti foki ko e poa ha ko e hala, ke eke mo lukutoto ma mutolu.
23 Kia eke ai e mutolu e tau poa ia ke lafilafi ke he poa huhunu ke he pogipogi ko e poa huhunu mau haia.
24 Kia eke pihia ni e mutolu ke he tau aho oti he tau aho ia ne fitu, ko e mena kai he poa kua eke ke he afi, ko e mena manogi mitaki kia Iehova; kia eke ia ke lafilafi ke he poa huhunu mau, katoa mo e hana poa inu.
25 Kia eke ai e mutolu ke he aho fitu e fakapotopotoaga tapu; aua neke eke ai e mutolu ha gahua mamafa.
26 Ko e aho foki he tau fua uluaki, kia ta mai ai e mutolu e poa mena kai fou kia Iehova, ka mole atu ha mutolu a tau vaha tapu, kia eke ai e mutolu e fakapotopotoaga tapu; ti aua neke eke ai e mutolu ha gahua mamafa.
27 Ka e ta mai ai e mutolu e poa huhunu ke eke mo mena manogi mitaki kia Iehova; ko e ua e punua povi tane, mo e taha e mamoe tane ti fitu e punua mamoe tau taha.
28 Ko e ha lautolu a poa mena kai foki ko e falaoa mitaki kua laku mo e puke lolo, kia takitaha e povi tane mo e tolu e omera, ti ua e omera ke he mamoe taha.
29 Ko e taha omera ke he punua mamoe tane, ti eke ai pihia ke he tau punua mamoe ne fitu.
30 Ko e taha e koti tane, ke eke ai e lukutoto ma mutolu.
31 Ti eke ai e mutolu e tau poa ia ke lafilafi ke he poa huhunu mau, mo e hana poa mena kai, katoa mo e ha lautolu a tau poa inu; kia katoatoa e mitaki ma mutolu.