Numera 31:1-54
31 KUA vagahau mai foki a Iehova kia Mose, kua pehe mai,
2 Kia taui atu e koe ke he tau tagata Mitiana ha ko e fanau a Isaraela, ka mole ia ti fakalataha atu a koe ke he hau a faoa.
3 Ti vagahau atu a Mose ke he motu, kua pehe atu, Kia tauteute a e falu ia mutolu ke tau, ke o atu a lautolu ke tau kia Mitiana, ke fakahoko atu e taui a Iehova kia Mitiana.
4 Kia takitaha e afe mai he tau magafaoa oti a Isaraela ke fakafano atu ai e mutolu ke he tau.
5 Ti fifili mai ai he tau tagata afe mo afe a Isaraela takitaha e afe mai he tau magafaoa; ko e hogofulu e afe ti ua e afe ia e tagata kua tauteute ke o atu ke tau.
6 Ti fakafano atu e Mose a lautolu ke he tau takitaha e afe mai he tau magafaoa; ti o atu a lautolu ke he tau mo Fineaso ko e tama a Eleasaro ko e ekepoa, ha ha he lima hana e tau mena tapu mo e tau pu ke ulo.
7 Ti tau ai a lautolu mo Mitiana, tuga ne poaki mai e Iehova kia Mose, ti kelipopo ai e lautolu e tau tane oti.
8 Ti kelipopo e lautolu e tau patuiki a Mitiana fakalataha ai mo lautolu ne keli, ko Evi, mo Rekema, mo Suro, mo Huro, mo Repa, ko e tau patuiki a Mitiana ne tokolima; ti kelipopo foki e lautolu ke he pelu a Palaamo ko e tama a Peoro.
9 Ti fofo foki he tau tagata Isaraela, e tau fifine Mitiana, katoa mo e ha lautolu a tau tama ikiiki; ko e ha lautolu a tau fuifui povi, mo e ha lautolu a tau fuifui mamoe oti, katoa mo e ha lautolu a tau koloa oti kua fofo ai e lautolu ke he tau.
10 Ko e ha lautolu a tau maga oti foki ne nonofo ai a lautolu, katoa mo e ha lautolu a tau taue oti, ne huhunu ai e lautolu ke he afi.
11 Ti uta e lautolu e tau mena oti ne fofo mo e tau mena oti ne moua ai e lautolu, ko e tau tagata katoa foki mo e tau manu.
12 Ti ta mai ai e lautolu e tau tagata ne fofo he tau, mo e tau mena ne moua e lautolu, katoa mo e tau mena fofo kia Mose mo Eleasaro ko e ekepoa, mo e fakapotopotoaga he fanau a Isaraela ke he heaga api ke he kelekele tatai a Moapi ne tata age ki Ioritana, ne fehagai mo Ieriko.
13 Ti o atu ai a Mose, mo Eleasaro ko e ekepoa, mo e tau iki oti he fakapotopotoaga, ke fonofono a lautolu ki tua he heaga api.
14 Ti ita ai a Mose ke he tau takitaki kau, ko e tau iki he tau takiafe, mo e tau iki he tau takiteau; ko lautolu ne o mai he kau ne o atu ke he tau.
15 Ti pehe atu a Mose kia lautolu, Kua fakamoui kia e mutolu e tau fifine oti?
16 Kitiala; ko lautolu na ko e fu ti holi ai he fanau a Isaraela e kupu a Iehova ke he mena a Peoro, ha ko e kupu a Palaamo; ti tupu ai e tatalu ke he fakapotopotoaga a Iehova.
17 Ko e hanai kia kelipopo ai e mutolu e tau tama tane oti he tau tama ikiiki, mo e kelipopo foki e mutolu e tau fifine oti kua iloa ha tane.
18 Ka ko e tau tama fifine ikiiki oti kua nakai iloa ha tane, kia fakamomoui ai a lautolu ma mutolu.
19 Ka ko mutolu foki, kia nonofo a mutolu ki tua he heaga api ke he tau po ne fitu; ko lautolu oti foki kua kelipopo taha tagata, mo lautolu oti kua pipiki atu ke he tagata mate, kia fakamea ai e mutolu a mutolu ke he aho tolu, mo e aho fitu; ko mutolu katoa mo e ha mutolu a tau tagata kua fofo he tau.
20 Kia fakamea foki e mutolu e tau tapulu oti, mo e tau mena oti kua eke aki he tau kili manu, mo e tau mena oti kua eke aki he tau fulu koti, katoa mo e tau mena oti kua eke aki he akau.
21 Ti pehe atu ai a Eleasaro ke he kau ne o atu ke he tau, Ko e kupu he fakatufono hanai ne poaki mai ai e Iehova kia Mose,
22 Ka ko e auro ni, mo e ario ko e apa kula, ko e lapatoa, ko e apa hina, mo e pili,
23 Ko e tau mena oti nakai maona ai ke he afi, kia tuku ia ke he afi, ti mea ai a ia; ka e fakamea ai a ia ke he vai ma lautolu kua kelea; ka ko e tau mena oti kua kelea ke uta ke he afi kia tuku ia ke he vai.
24 Ti unu ai e mutolu ha mutolu a tau tapulu ke he aho fitu, ti mea ai ni a mutolu, ka mole ia ti o mai ai a mutolu ke he heaga api.
25 Ti vagahau mai a Iehova kia Mose, kua pehe mai,
26 Kia totou e koe e tau mena ne moua e mutolu ke he tau po ke fiha e katoatoa, ko e tau tagata katoa mo e tau manu; ko koe, mo Eleasaro ko e ekepoa, mo e tau patu lalahi he fakapotopotoaga;
27 Ti veveheua e koe e tau mena ne moua e mutolu ke he tau, ma lautolu ne eke e tau, ko lautolu ne o atu ke he tau, katoa mo e fakapotopotoaga oti.
28 Ti vevehe mai e mutolu he tau tagata ne o atu ke he tau, takitaha e mena mai he tau mena ne lima e teau, ko e tau tagata mo e tau povi, mo e tau asini, katoa mo e tau mamoe.
29 Ti uta e mutolu e poa mai he veveheaga ha lautolu ia, mo e ta age kia Eleasaro ko e ekepoa ke eke mo poa nikiti kia Iehova.
30 Ka ko e veveheaga he fanau a Isaraela, kia uta ai e mutolu takitaha e mena mai he lima gofulu e mena, ko e tau tagata, mo e tau povi, mo e tau asini, mo e tau mamoe, ko e tau manu oti ni, mo e ta age ai ke he tau tagata Levi, ko lautolu kua eke e tau fekau he faituga a Iehova.
31 Ti eke ai e Mose mo Eleasaro ko e ekepoa, tuga ne poaki mai e Iehova kia Mose.
32 Ko e tau mena ne moua e lautolu ke he tau, ko e tau mena ne toe he tau mena ne fofo ai he kau ke he tau, ko e tau mamoe ne ono e teau e afe ti fitugofulu ma lima e afe.
33 Ko e tau povi ne fitugofulu e afe ti ua e afe.
34 Ko e tau asini ne onogofulu e afe ti taha e afe.
35 Ko e katoatoa foki he tau tagata, ko e tau fifine kua nakai iloa ha tane, ne tolugofulu e afe ti ua e afe e tagata.
36 Ko e hana maga ne veveheuaki foki, ko e veveheaga ia ha lautolu ne o atu ke he tau, ko e tau mamoe kua lata ke totou. Ko e tolu e teau e afe ti tologofulu ma fitu e afe, mo e lima e teau.
37 Ko e poa foki kia Iehova mai he tau mamoe ko e ono e teau fitugofulu ti lima e mamoe.
38 Ho e tau povi ne tolugofulu ma ono e afe. Ko e poa foki kia Iehova mai he tau mena ia ne fitugofulu ma ua e povi,
39 Ko e tau asini ko e tolugofulu e afe mo e lima e teau. Ko e poa foki kia Iehova mai he tau mena ia, ko e onogofulu ma taha e asini.
40 Ko e tau tagata ne hogofulu e afe ti ono e afe. Ko e poa foki ma Iehova mai ia lautolu ne tolugofulu ti ua e tagata.
41 Ti uta e Mose e poa kia Eleasaro ko e ekepoa, ko e poa nikiti haia kia Iehova, tuga ne poaki mai ai e Iehova kia Mose.
42 Ka ko e veveheaga koloa he fanau a Isaraela ne vevehe mai ai e Mose he tau tagata ne o atu ke he tau;
43 (Ko e veveheaga koloa he fakapotopotoaga hanai; ko e tau mamoe ne tolu e teau e afe ti fitu e afe mo e lima e teau;
44 Ko e tau povi ne tolugofulu e afe ti ono e afe;
45 Ko e tau asini ne tolugofulu e afe ti lima e teau;
46 Ko e tau tagata foki ne hogofulu e afe ti ono e afe;)
47 Ti uta ai e Mose mai he veveheaga he fanau a Isaraela takitaha e mena mai he tau mena limagofulu, ko e tau tagata katoa mo e tau manu, ti ta age ia ke he tau tagata Levi ko lautolu ne eke ai e tau fekau he faituga a Iehova tuga ne poaki mai ai e Iehova kia Mose.
48 Ti o mai ai kia Mose e tau iki he tau takiafe ne o atu ke he tau, ko e tau iki he tau takiafe, mo e tau iki he tau takiteau.
49 Ti pehe mai a lautolu kia Mose, Kua totou tuai hau a tau fekafekau ko lautolu kua lata ke totou he tau tagata ne o atu mo mautolu ke he tau; kua nakai galo foki ha tagata taha ia mautolu.
50 Ko e tau mena foki hanai kua ta mai ai e mautolu e poa kia Iehova, takitaha e tagata mo e hana mena kua moua, ko e tau mena auro ke tauteaki, mo e tau filifili auro, mo e tau pipi lima, mo e tau mama, mo e tau mama tau teliga, mo e tau kahoa auro, ke eke ai e lukutoto ma mautolu ki mua a Iehova.
51 Ti uta ai e Mose mo Eleasaro ko e ekepoa e auro mai ia lautolu, ko e tau mena oti ke tauteaki, kua eke.
52 Ko e tau auro oti foki he poa nikiti, ne uta kia Iehova he tau iki he tau takiafe, mo e tau iki he tau takiteau, ne hogofulu ma ono e afe, fitu e teau ti limagofulu e sikeli.
53 Ko e tau tagata tau ne takitaha a lautolu mo e eke ai e tau mena mana.
54 Ti uta ai e Mose mo Eleasaro ko e ekepoa e tau auro he tau iki he tau takiafe, mo e tau iki he tau takiteau, ti uta ai e laua ia ke he fale uta fano he tutuutaga, ke eke mo fakamanatuaga ma e fanau a Isaraela ki mua a Iehova.