Numera 32:1-42
32 KO e mena loga lahi ni e tau fuifui manu he fanau a Reupena, mo e fanau a Kato; ti kitekite a lautolu ke he kelekele a Iasaru mo e kelekele a Kiliata, kitiala foki ko e mena aoga ni ke he tau fuifui manu.
2 Ti o mai ai e fanau a Kato, mo e fanau a Reupena kua pehe mai a lautolu kia Mose, mo Eleasaro ko e ekepoa, mo e tau iki he fakapotopotoaga, kua pehe mai,
3 Ko Atarota, mo Tipono, mo Iasaru, mo Nimara, mo Hesapono, mo Eleale, mo Sepama, mo Nepo, mo Peono,
4 Ko e motu kua ta e Iehova ki mua he fakapotopotoaga a Isaraela, ko e motu, kua aoga ke he tau fuifui manu ha ha he tau fekafekau hau foki e tau fuifui manu.
5 Kua pehe mai foki a lautolu, Kaeke kua ofania a mautolu e koe kia tuku mai e koe e motu nai ke he hau a tau fekafekau ke eke ma mautolu, ka e aua neke o atu a mautolu ke he fahi atu a Ioritana.
6 Ti pehe atu ai a Mose ke he fanau a Kato, mo e fanau a Reupena, Ke o atu kia e tau matakainaga ha mutolu ke he tau, ka e nonofo a mutolu ki hinei?
7 Ko e heigoa e mena ne fakalolelole ai e mutolu e tau loto he fanau a Isaraela ke nakai o atu ai a lautolu ke he motu kua foaki mai e Iehova kia lautolu?
8 Ne eke pihia he tau matua ha mutolu he fakafano atu e au a lautolu i Katesapanea ke toko atu ke he motu.
9 Ne o hake a lautolu ke he vailele ko Esekolo, mo e toko ke he motu, ti fakalolelole ai e lautolu e tau loto he fanau a Isaraela ke aua neke o hake a lautolu ke he motu kua foaki mai ai e Iehova kia lautolu.
10 Ti tupu ai e ita a Iehova ke he aho ia, ti omonuo ai a ia, kua pehe mai.
11 Ko e tau tagata ne o mai i Aikupito ke kamata mai ia lautolu ne uafulu ha lautolu a tau tau, katoa mo lautolu ne fakamua atu nakai ni kitia e lautolu e motu ne omonuo ai e au kia Aperahamo mo Isaako, mo Iakopo; he nakai mumui mai fakaoti a lautolu kia au;
12 Ko Kalepa ko e tama a Iefuna ko e tagata Kenisi, mo Iosua ko e tama a Nuno ko laua hoko laua ni ke kitia; ha ko e mena mumui atu fakaoti a laua kia Iehova.
13 Ti tupu foki e ita a Iehova kia Isaraela ti eke e ia ke o fano ai a lautolu ke he tutakale ke he tau tau ne fagofulu, ato fakaotioti ai e hau katoa ia, ne eke e mena kelea ia ki mua a Iehova.
14 Kitiala foki, kua tutupu mai a mutolu ke hukuiaki ha mutolu a tau matua, ko e hau he tau tagata hala, ke liu fakalahi ai e ita lahi a Iehova kia Isaraela,
15 Ha ko e mena kaeke ke liliu kehe a mutolu ia ia, ti liu foki toka e ia a lautolu ke he tutakale; ti kelipopo ai e mutolu e motu oti nai.
16 Ti fakatata a lautolu kia ia, mo e pehe mai e lautolu, To eke e mautolu ki hinei e tau pa mamoe mo e tau fuifui manu ha mautolu, mo e tau maga ma e tau tama ikiiki ha mautolu.
17 Ka ko mautolu to tauteute fakaave a mautolu ke he tau, ti mumua atu a mautolu ke he fanau a Isaraela, ato fakahoko atu e mautolu a lautolu ke he tau mena ha lautolu ke nonofo ai; ka ko e tau tama ikiiki ha mautolu, to nonofo a lautolu ke he tau maga kua puipui ke he pa, ha ko e tau tagata he motu.
18 Nakai liliu mai foki a mautolu ke he tau magafaoa ha mautolu, ato moua ai he fanau a Isaraela, takitokotaha ha lautolu a tau fonua ke eke ma lautolu.
19 Ko e mena nakai eke e mautolu ha fonua ma mautolu fakalataha mo lautolu ke he fahi na a Ioritana, po ke fahi atu; ha kua moua tuai e mautolu e fonua ke eke ma mautolu ki hinei ke he fahi uta a Ioritana.
20 Ti pehe atu ai a Mose kia lautolu, Kaeke ke eke e mutolu e mena nai, kaeke ke tauteute a mutolu ke o ke he tau ki mua a Iehova,
21 Ti o atu a mutolu oti ke he fahi atu a Ioritana mo e tauteute a mutolu ke he tau, ki mua a Iehova, ato vega kehe ai e ia hana tau fi oti kana ki mua hana.
22 Ti mahala ai foki e motu ki mua e Iehova, ka mole ia to liliu mai ai a mutolu, ti mea ai a mutolu ki mua a Iehova, katoa mo Isaraela, to eke foki e mutolu e motu nai ma mutolu ki mua a Iehova.
23 Kaeke foki ke nakai eke pihia e mutolu, kitiala, kua hala tuai a mutolu kia Iehova; kia iloa foki e mutolu to moua ai a mutolu he ha mutolu a hala.
24 Kia eke ai e mutolu e tau maga ma e tau tama ikiiki ha mutolu, mo e tau pa mo e ha mutolu a tau mamoe; mo e eke ni e mutolu e tau mena kua tala mai ai e mutolu.
25 Ti tala age he fanau a Kato, mo e fanau a Reupena kia Mose, kua pehe age, To eke ni hau a tau fekafekau e mena kua poaki mai ai ha mautolu a iki.
26 Ko e ha mautolu a tau tama ikiiki, ko e ha mautolu a tau hoana, ko e ha mautolu a tau fuifui mamoe, mo e ha mautolu a tau manu oti to nonofo a lautolu ki hinei ke he tau maga a Kiliata.
27 Ka ko e hau a tau fekafekau, to o a mautolu oti ke he fahi atu mo e tauteute ni ki mua a Iehova ke tau ai ke he tau, tuga ne vagahau mai ai ha mautolu a iki.
28 Ko lautolu foki ia ne poaki atu ai e Mose kia Eleasaro ko e ekepoa mo Iosua ko e tama a Nuno; mo e tau patu lalahi he tau magafaoa he fanau a Isaraela,
29 Kua pehe atu a Mose kia lautolu, Kaeke ke o fakalataha mo mutolu e fanau a Kato, mo e fanau a Reupena ke he fahi atu a Ioritana, kua tauteute a lautolu oti ke tau ke he tau ki mua a Iehova, to mahala ai e motu ki mua ha mutolu, ti tuku atu ai e mutolu e motu ko Kiliata ke eke ma lautolu.
30 Kaeke ke nakai o a lautolu fakalataha mo mutolu ke he fahi atu mo e tauteute ke he tau, ti eke ai e lautolu taha fonua ma lautolu fakalataha mo mutolu ke he motu ko Kanana.
31 Ti tali mai he fanau a Kato, mo e fanau a Reupena, kua pehe mai, Ko e mena ne vagahau mai ai e Iehova ke he hau a tau fekafekau to eke ai pihia e mautolu;
32 To o a mautolu ni ke he fahi atu mo e tauteute ai ke he tau ki mua a Iehova ke he motu ko Kanana, kia eke ai e mautolu e kelekele ma mautolu ke he fahi nai a Ioritana.
33 Ti tuku atu e Mose kia lautolu, ko e fanau a Kato, mo e fanau a Reupena, mo e taha veveheaga he magafaoa a Manase ko e tama a Iosefa, ko e kautu a Sikono ko e patuiki he tau tagata Amori; mo e kautu a Oko ko e patuiki a Vasana; ko e kelekele, mo e tau maga ke he hana tau fahi, ko e tau maga ne agāgai ai ke he motu.
34 Ti ati ai he fanau a Kato a Tipona mo Atarota, mo Arueru,
35 Mo Atirota, mo Sofano, mo Iasuru, mo Iakepea.
36 Mo Petenimara, mo Petearana, ke eke mo tau taue; katoa mo e tau pa mamoe.
37 Ne ati foki he fanau a Reupena, a Hesepona, mo Eleale, mo Kiriataima,
38 Mo Nepo, mo Paalameona, (ne hiki ai ha laua a tau higoa) mo Sipema; ti ui ai foki e lautolu e tau maga ne ati e lautolu ke he falu a higoa.
39 Ne o atu foki e fanau a Makiro ko e tama a Manase ki Kiliata, mo e fofo ai ma lautolu, mo e vega kehe e lautolu e tau tagata Amori ha ha i ai.
40 Ti tuku atu ai e Mose a Kiliata kia Makiro ko e tama a Manase, ti nofo ai a ia.
41 Ti fano foki a Iairo, ko e tama a Manase mo e fofo ai hana tau maga, ti ui ai e ia e higoa he mena ia, ko Havota-iairo,
42 Ti fano foki a Nopa, mo e fofo ai a Kinata, mo e hana tau maga, ti ui foki e ia ki ai hana higoa, ko Nopa.