Numera 5:1-31
5 KUA vagahau mai foki e Iehova kia Mose, kua pehe mai,
2 Kia poaki atu e koa ke he fanau Isaraela kia toka kehe ai e lautolu he heaga api e tau lepela oti, mo lautolu oti ne ha i ai e gagao pela, mo lautolu oti kua kelea ha ko e tau tagata mamate;
3 To toka kehe e mutolu ko e tau tane katoa mo e tau fifine, to toka atu e mutolu a lautolu ki tua he heagaapi; neke kelea ai ia lautolu ha lautolu a tau heaga api kua nofo ai au.
4 Ti eke pihia he fanau Isaraela, ti toka atu e lautolu a lautolu ki tua he heaga api; tuga ne vagahau mai e Iehova kia Mose ne eke pihia ni he fanau a Isaraela.
5 Kua vagahau mai foki a Iehova kia Mose, kua pehe mai,
6 Kia pehe atu a koe ke he fanau a Isaraela, Kaeke ke eke ai he tane po ke fifine taha he tau hala oti he tau tagata ke holifono ai ki mua a Iehova, ti nofo ai e tagata mo e kelea;
7 Ti talahau e ia hana hala ne eke e ia, ti taui atu ni e ia hana hala ke katoatoa, mo e lafilafi ki ai hana veveheaga ne limaaki, ti uta ai e ia ke he tagata ne hala a ia ki ai.
8 Kaeke ke nakai fai magafaoa he tagata ke taui atu ki ai e hala, ti uta ai e taui he hala kia Iehova, ke he ekepoa ni, ke lafilafi ke he mamoe tane ke lukutoto aki, ke eke aki e lukutoto māna.
9 Ko e tau poa nikiti oti he tau mena tapu oti he fanau a Isaraela kua uta e lautolu ke he ekepoa, to eke ia ni māna.
10 Ko e tau mena tapu he tau tagata takitokotaha to eke ia māna ni; ka ta atu he tagata ha mena ke he ekepoa to eke e ia e mena ia māna,
11 Kua vagahau mai foki a Iehova, kia Mose, kua pehe mai,
12 Kia vagahau atu a koe ke he fanau Isaraela, ti pehe atu a koe kia lautolu, Kaeke ke fano e hoana he taha tagata mo e holifono ai a ia kia ia;
13 Kua momohe ni a laua mo e taha tane ka e nakai kitia he tane hana, kua galo ni, kua kelea ai a ia, ka e nakai fakamoli atu he taha kia ia, to nakai moua ai foki a ia;
14 Kaeke ke hoko atu kia ia e loto ita tafuā ti ita tafuā a ia ke he hana hoana, kua kelea foki e fifine; po ke hoko atu kia ia e loto ita tafuā, ti ita tafuā a ia ke he hana hoana, ka e nakai ni kelea e fifine,
15 Ti uta ai he tagata hana hoana ke he ekepoa, ti uta foki e ia hana poa ma e hoana hana, ko e omera he falaoa karite; ka e aua neke liligi ki ai e puke lolo, ti ua tuku ki ai e lipano; ha ko e poa he ita tafuā haia, ko e poa ke fakamanatu aki, kua fakamanatu ai e hala.
16 Ti fakatata ai he ekepoa a ia, mo e tuku atu a ia ki mua a Iehova;
17 Ti uta foki he ekepoa e vai tapu ke he kapiniu kelekele, ti uta ai e ia e efuefu mai he efuefu ha he kelekele he faituga mo e tuku ai ke he vai;
18 Ti tuku atu he ekepoa e fifine ki mua a Iehova, mo e āki kehe e ufiufi he ulu he fifine, ti tuku foki e ia ke he hana lima e poa ke fakamanatu aki, ko e poa ha ko e ita tafuā haia; ke ha he lima foki he ekepoa e vai kona ke fakamalaia aki;
19 Ti pehe age e ekepoa ke he fifine kia omonuo mai a koe, kua pehe age a ia kia ia. Kaeke kua nakai momohe a mua mo e taha tane, ti nakai kelea foki a koe mo e taha nakai ko e tane hau kia hao ai a koe he vai kona nai ke fakamalaia aki;
20 Kaeke foki kua fano kehe a koe ke he taha nakai ko e tane hau, kaeke foki kua kelea a koe, mo e momohe ai a mua mo e taha tane nakai ko e tane hau;
21 Ti pehe atu ai e ekepoa ke he fifine ke he omonuo ke kaialu ai, ti pehe atu foki e ekepoa ke he fifine, Kia tuku atu e Iehova a koe ke he malaia mo e ulāfia a koe ke he hau a motu, ka fakahoko atu e Iehova kia koe ke to kehe hau a patupula, mo e fua hau a manava;
22 Ko e vai hanai foki ke fakamalaia aki to hoko hifo ia ke he manava hau, ti fua ai hau a manava, mo e to ai hau a patupula. Ti tali mai ai he fifine, Amene, Amene.
23 Ti tohi ai he ekepoa e tau kaialu ia ke he tohi, ti holoholo kehe foki ke he vai kona.
24 Ti uta ai e ia ke he fifine e vai kona ke fakamalaia aki, ke inu ai e ia ti hoko atu ki loto ia ia e vai kona ke fakamalaia aki ke kona ai.
25 Ti uta ai he ekepoa e poa ha ko e ita tafuā mai he lima he fifine, mo e lialiaki e poa ki mua a Iehova, ti uta e ia a ia ke he fatapoa;
26 Ti uta foki he ekepoa e puke aloalolima mai he poa, ko e hana fakamanatuaga haia, ti huhunu ia ki luga he fatapoa, ka mole ia ti fakainu ai e ia e fifine ke he vai.
27 Kua oti he fakainu a ia ke he vai, kaeke kua kelea a ia mo e holifono ke he hana tane, to hoko atu e vai kona ki loto ia ia ke kona ai, ti fua ai ni hana manava ti to kehe foki hana patupula; ti eke ai ni e fifine ia mo kaialu ke he hana motu.
28 Kaeke foki kua nakai kelea e fifine, ka kua mahani mitaki a ia, ti hao ni a ia to fai tama foki a ia.
29 Ko e fakatufono haia ke he ita tafuā kaeke kua fano kehe e fifine ke he taha nakai ko e tane hana, mo e kelea ai a ia;
30 Po ke hoko atu e loto ita tafuā ke he tane, ti ita tafuā a ia ke he hana hoana, mo e tuku atu ai e ia e fifine ki mua a Iehova, ti eke ai e ekepoa kia ia e tau mena oti he fakatufono na.
31 Ti mea ai e tane he mahani hepehepe, ka ko e fifine to nofo ni a ia mo e kelea.