Roma 10:1-21
10 KO e tau matakainaga na e, ko e amaamanaki hanai he haku a loto, mo e haku a liogi ke he Atua ma Isaraela, kia fakamomoui a lautolu.
2 Ha kua talahau au kia lautolu, ha ha ia lautolu e fakamakutu ke he tau mena he Atua, ka e nakai lata mo e maama.
3 Ha kua nakai iloa e lautolu e tututonu mai he Atua, ti kua kumi e lautolu ke fakatu e tututonu ha lautolu ni, kua nakai omaoma a lautolu ke he tututonu mai he Atua.
4 Ha ko Keriso, ko e fakahikuaga he fakatufono haia, kia hoko mai ai e tututonu kia lautolu gotoa kua tua.
5 Ha ko e mena ne tohi e Mose ke he tututonu kua moua ke he fakatufono, Ko e tagata ke eke e tau mena ia, to moui ai a ia.
6 Ka ko e tututonu kua moua ke he tua, kua pehe mai a ia, Aua neke pehe hifo ke he hau a loto, To hake a hai ke he lagi? (Ko e hana kakano hanai, ke takitaki hifo a Keriso;)
7 Po ke pehe, To hifo a hai ke he mena hokulo? (ko e hana kakano hanai, ke takitaki hake a Keriso mai ia lautolu kua mamate;)
8 Ka ko e ha he tala mai a ia? Kua tata kia koe e kupu ha he gutu hāu, to ha he loto hāu. Ko e kupu haia ke he tua kua fakamatala atu ai e mautolu;
9 Ha ko e mena kaeke ke talahau e koe ke he hāu a gutu e Iki ko Iesu, mo e talia ke he hāu a loto kua fakatu mai he Atua a ia mai ia lautolu kua mamate, to fakamoui ai a koe;
10 Ha ko e loto ke talia ai, ke hoko mai ai e tututonu; ka ko e gutu ke talahau ai, ke hoko mai ai e fakamouiaga.
11 Nukua pehe mai e Tohi, Nakai ma e taha kua tua kia ia.
12 Ha ko e mena nakai kehekehe e Iutaia mo e Heleni; ha ko e Iki tokotaha he tau tagata oti kana kua lahi ue atu hana fakaalofa kia lautolu oti kana kua ui kia ia;
13 Ha ko e mena fakamomoui a lautolu oti kana kua ui ke he higoa he Iki.
14 Hanai, po ke tauui fefe a lautolu kia ia kua nakai tua ki ai a lautolu? ka e tua fefe a lautolu kia ia kua nakai fanogonogo atu ki ai a lautolu? ka e fanogonogo atu fefe a lautolu, ka nakai fai tagata ke fakamatala atu?
15 Ka e fakamatala atu fefe e tau tagata, kaeke ke nakai fekau atu a lautolu ki ai? Tuga he tohi mai, Kua fulufuluola ni e tau hui ha lautolu kua ta mai e tala mitaki ke he monuina, ko lautolu kua ta mai e tala ke he tau mena mitaki.
16 Ka e nakai omaoma a lautolu oti kana ke he tala mitaki; nukua pehe mai a Isaia, Ko e Iki na e, kua talia e hai ha mautolu a ogo?
17 Hanai, kua tupu mai e tua mai he ogo, ko e ogo foki ha ko e kupu he Atua haia.
18 Ka e pehe atu au, Nakai kia fanogonogo a lautolu? Ko e moli, Kua hoko ha lautolu a tau leo ke he tau motu oti, mo e tau kupu foki ha lautolu ke he tau kala he lalolagi.
19 Ka e pehe atu au, Nakai kia iloa a Isaraela? Kua fakamua ne pehe mai a Mose, To fakatupu e au e mahekeheke kia mutolu ke he motu nakai ko e motu, mo e fakahogohogomanava a mutolu ke he motu goagoa.
20 Ka kua fakamalolo ni a Isaia, mo e pehe mai, Ne moua na au e lautolu nakai kumi mai kia au, kua fakakite au kia lautolu nakai huhu mai kia au.
21 Ka kua pehe mai a ia kia Isaraela, Kua fakaolo e au hoko tau lima ke he aho oti ke he motu faliuliu mo e taufetoko mai.