Roma 11:1-36
11 KO e hanai, kua pehe atu au, Kua tiaki kia he Atua hana ni a motu? Aua ia; ha ko au foki ko e tagata Isaraela, mai he fanau a Aperahamo, ko e magafaoa a Peniamina.
2 Nakai tiaki he Atua hana a motu ne fioia tuai e ia. Po ke nakai kia iloa e mutolu e mena kua talahau mai he Tohi ke he tala kia Elia? ka kua hokotaki e ia a Isaraela ke he Atua, kua pehe atu,
3 Ko e Iki na e, kua kelipopo e lautolu hāu a tau perofeta, ti kua ulu tuai e lautolu hāu a tau fata poa; ko au foki kua toe tokotaha ni, to kua kumi e lautolu au ke kelipopo.
4 Ka kua tala age ha ha kia e Atua kia ia? Kua fakatoka e au māku tokofitu e afe he tau tagata, ko lautolu kua nakai fakatokotui kia Paala.
5 Haia ni, kua pihia foki ke he vaha nai, ha i ai e falu kua toe kua lata mo e fifiliaga he fakaalofa noa.
6 Kaeke foki ko e fakaalofa noa, ti nakai tuai ko e tau gahua; ane mai ke pihia, po kua nakai tuai talahaua e fakaalofa noa ko e fakaalofa noa; kaeke foki ko e tau gahua, ti nakai tuai ko e fakaalofa noa; ane mai ke pihia, po kua nakai tuai talahaua e tau gahua ko e gahua.
7 Hanai, po ke fefe Kua nakai moua e Isaraela e mena ne kumikumi ai, ka kua moua e lautolu kua fifili; ka e fakamao a lautolu kua toe.
8 Tuga he tohi mai, Kua age he Atua kia lautolu e loto kua mohe, ko e tau mata kia nakai kitekite ai a lautolu, mo e tau teliga kia nakai fanogonogo ai a lautolu, kua hoko ni ke he vaha nai.
9 Kua pehe mai foki a Tavita, Kia uta ha lautolu a laulau mo hele, mo kupega, mo mena ke tupetupe ai, kia eke foki mo taui kia lautolu;
10 Kia fakapouligia ha lautolu a tau mata kia nakai kitia, mo e fakamaloku ha lautolu a tau tua nakai noa.
11 Hanai, kua pehe atu au, Kua tupetupe kia a lautolu ke veveli a lautolu? Aua ia; ka ko e ha lautolu a hala kua hoko ai e faka mouiaga ke he tau motu kehe, ke fakatupu ai ha lautolu a mahekeheke.
12 Kaeke kua eke ha lautolu a hala mo koloa he lalolagi, kaeke foki kua eke ha lautolu a nofogati mo koloa he tau motu kehe, ka e nakai kia au atu he pihia ke he fakakatoatoaga ha lautolu?
13 Ha ko e mena kua vagahau atu e au kia mutolu ko e tau tagata kehe, ha ko e mena ko au ko e aposetolo ke he tau tagata kehe, kua nava au ke he haku a feua;
14 Po ke maeke nakai ia au ke fakatupu ke he haku a faoa e mahekeheke, mo e fakamomoui falu ia lautolu.
15 Ha ko e mena kaeke kua moua he lalolagi e fakafeiloaga ha kua tiaki a lautolu, po ke fefe kia ha lautolu a liuaki mai? Nakai kia ko e moui ia mai ia lautolu kua mamate?
16 Kaeke foki kua tapu e mena uluaki, ti pihia foki e lakuaga katoa; ka tapu e vaka, ti pihia foki e tau la.
17 Kaeke kua pakipaki e falu a la, ka ko koe ko e olive vao, ne matai a koe ki loto ia lautolu, to igatia fakalataha mo lautolu ke he vaka mo e puke he olive,
18 Ua fakatokoluga a koe ke he tau la; kaeke foki ke fakatokoluga a koe, kia manatu ā nakai ko koe kua moui ai e vaka, ka ko e vaka kua moui ai a koe.
19 Haia to pehe mai a koe, Ne pakipaki e tau la, kia matai ai au.
20 Ko e moli, kua pakipaki a lautolu ha kua nakai tua, ka kua tumau a koe ha ko e tua; ua fakatokoluga a koe, ka kia matakutaku.
21 Ha ko e mena kaeke kua nakai toka he Atua e tau la ne tupu ai, a koe, neke nakai toka foki e ia a koe.
22 Haia, kitiala, ko e mahani totonu mo e ita he Atua; ko lautolu kua veveli, kua hoko ki ai e ita; ka e hoko kia koe e mahani totonu, kaeke ke tumau a koe ke he hana mahani totonu; ka nakai pihia ti hahala a koe.
23 Ko lautolu nai foki, kaeke ke nakai tumau ha lautolu a nakai tua, ti liu foki matai ai a lautolu; ha ko e mena maeke ke he Atua ke liu foki matai ai a lautolu.
24 Ha ko e mena kaeke kua hahala a koe mai he olive vao, ne tupu ai a koe, mo e matai a koe ke he olive mitaki, nakai tupu ai a koe, nakai kia maeke vave ke matai e tau Ia ne tupu ai ke he ha lautolu ni a olive?
25 Ha ko e mena, ko e tau matakainaga na e, kua loto au ke iloa ai e mutolu e mena galo nai, neke fakafiailoilo a mutolu, kua fakamao e fala Isaraela, ato hoko ke he fakakatoatoaaga he tau motu kehe;
26 Ti fakamomoui ai a Isaraela katoatoa, tuga he tohi mai, To haele mai i Siona e Fakamoui, to fakatoka kehe e ia e tau mahani matahavala ia Iakopo;
27 Ko e haku a maveheaga foki hanā mo lautolu, ka uta kehe e au ha lautolu e tau hala.
28 Ko e tau fi a lautolu ka fakalata ke he vagahau mitaki, ha ko mutolu; ka kua ofania a lautolu ke fakalata ke he fifiliaga, ha ko e tau tupuna.
29 Ha ko e mena nakai tokihala ni e Atua ke he hana tau mena kua foaki noa, mo e hana a ui.
30 Ha ko e mena tuga a mutolu foki, ne faliuliu ke he Atua i tuai, ka ko ainei, kua ofania a mutolu ha ko e ha lautolu a faliuliu;
31 Kua pihia foki a lautolu kua faliuliu a lautolu ke he vaha nai, kia ofania foki a lautolu ha ko e ha mutolu a ofania.
32 Ha kua puipui he Atua e tau tagata oti kana ke he nakai tua, kia ofania e ia e tau tagata oti kana.
33 Oi, oi! ko e hokulo he tanakiaga he iloilo mo e fioiaaga he Atua! Kua nakai maeke ni ia taha ke kumi hana tau fakafiliaga; kua nakai maeke foki ke iloa hana tau haeleaga.
34 Ha ko hai kia kua iloa e finagalo he Iki? po ko hai foki ne pulega fakalataha mo ia?
35 Po ko hai foki taha ne ta atu fakamua e mena kia ia, ka e taui mai ai a ia kia ia?
36 Ha ko e mena tupu mai ia ia, mo e eke e ia, mo e fakahoko atu foki māna e tau mena oti kana; kia ha ha ia ia ni e fakahekeaga tukulagi. Amene.