Roma 12:1-21
12 HANAI, ko e tau matakainaga na e, kua ole atu au kia mutolu ha ko e fakaalofa hofihofi noa he Atua, kia tuku atu e mutolu ha mutolu a tau tino ke he Atua, ko e poa moui, mo e tapu, ke talia mo e fiafia, ko e fekafekauaga haia kua lata kia mutolu ke eke.
2 Aua neke mahani foki a mutolu fakalataha mo e lalolagi nai, ka kia faliu a mutolu ke he liu foki fakafou he tau loto ha mutolu, kia kumikumi e mutolu po ke heigoa e finagalo he Atua, ko e mena mitaki, kia talia foki mo e fiafia, ti kua katoatoa.
3 Ha ko e mena tala atu e au kia mutolu oti, ha ko e fakaalofa noa kua foaki mai kia au, aua neke homo e manatu he taha ke he mena kua lata ke manatu ai, ka kia fakatekiteki e tau manatu, ke lata mo e tufaaga he tua ne tufatufa mai he Atua kia tautolu takitokotaha.
4 Ha ko e mena tuga ne tino taha ha ha i ai e tau fahi tino loga, ka e nakai ko e feua taha he tau fahi tino oti;
5 Kua pihia foki a tautolu ne tokologa, kua tino taha kia Keriso, ka e fakafehagaiaki e tau fahi tino.
6 Kua kehekehe foki e tau mena kua tufatufa mai kia tautolu he fakaalofa noa kua foaki mai kia tautolu; po ke perofeta, kia perofeta ai ke lata mo e tufaaga he tua;
7 Po ke tiakono, kia eke e gahua he tiakono; po ke akoako, kia fakaako atu ai a ia.
8 Po ke tomatoma, kia tomatoma ai a ia; ko ia kua foaki e tau mena, kia eke e ia mo e fakamokoi; ko ia kua pule, kia eke ai mo e fakamakutu; ko ia kua eke mena fakaalofa, kia eke ai mo e fakamakai.
9 Ua fakaalofa fakatupua; kia fakavihia e tau mena kelea, kia pipiki ke he tau mena mitaki.
10 Kia fakafeheleaki ke he feofanaki he tau matakainaga; kia takitokotaha mo e mua ke tuku atu e lilifu ke he falu;
11 Aua neke fakateaga ke he fakamakutu, kia malolo e loto, kia fekafekau ke he Iki.
12 Kia fiafia ke he amaamanaki, kia fakauka ke he matematekelea, kia fakamakamaka ke he liogi.
13 Kia tufatufa ha mutolu a tau mena ke he tau tagata tapu kua nonofogati, kia fakamalolo ke he fakaalofa ke he tau tagata kehe.
14 Kia fakamonuina atu kia lautolu kua favale mai kia mutolu, kia fakamonuina atu, aua foki neke kaialu.
15 Kia fiafia a mutolu fakalataha mo lautolu kua fiafia, kia tagi foki a mutolu fakalataha mo lautolu kua tagi.
16 Kia fakatatai ha mutolu a tau manatu; aua neke manatu ke he tau mena fakatokoluga, ka kia feoaki mo e tau tagata fakatokolalo; aua neke fakafiailoilo a mutolu.
17 Aua neke taui atu e kelea ke he kelea he taha; kia tauteute e tau mena gali ki mua he tau tagata oti kana.
18 Kaeke kua maeke ia mutolu, kia nonofo fakamitaki mo e tau tagata oti kana.
19 Ko e tau fakahelehele na e, aua neke taui atu e mutolu, ka kia fakatokatoka atu ke he ita; ha kua tohi mai, Kua pehe mai e Iki, Ha ha ia au ke taui atu, to taui atu e au ni.
20 Haia, kaeke kua hoge a ia kua fai fi kia koe, kia fagai e koe a ia; ka fia inu a ia kia fakainu e koe a ia; ha ko e mena ka eke pihia kua tanaki ai e tau malala kaka ki luga he ulu hana.
21 Aua neke mahala a koe ke he kelea, ka kia mahala e kelea ke he mitaki.