Roma 15:1-33
15 KO e mena lata kia tautolu kua malolo ke lagomatai ke he lolelole ha lautolu kua nakai fahia; ka e aua neke fakafiafia ha tautolu a tau loto.
2 Ka kia takitokotaha a tautolu mo e fakafiafia a ia ne katofia mo ia, kia mitaki ai a ia, to fakamafanatia ai.
3 Ha ko Keriso ni, nakai fakafiafia e ia hana finagalo; ka e tuga he tohi mai, Kua hohoko mai kia au e tau kupu kelea ha lautolu ne eke fakakelea kia koe.
4 Ha ko e tau mena oti ne tohi mai i tuai, ne tohi ia, ke fakaako ai a tautolu; kia moua ai e tautolu e amaamanaki ha ko e fakauka mo e fakamafanatia mai he tau Tohi.
5 Kia foaki atu kia mutolu he Atua hana e fakauka, mo e fakamafanaaga, ke fakalataha ha mutolu a tau loto ke lata mo e finagalo a Keriso Iesu;
6 Kia fakaheke atu a mutolu ke he Atua, ko e Matua he Iki ha tautolu ko Iesu Keriso, mo e loto taha, mo e kupu taha.
7 Ko e mena ia kia fetaliaki a mutolu ko e taha kia taha, tuga foki a Keriso ne talia e ia a tautolu, kia hoko ai e fakahekeaga ke he Atua.
8 Kua pehe atu au, kua eke a Iesu Keriso mo fekafekau he peritome ha ko e fakamoli he Atua, kia fakamoli ai e tau mena ne talahaua tuai ke he tau tupuna;
9 Kia fakaheke e tau motu kehe ke he Atua ha ko e fakaalofa, tuga he tohi mai, Ko e mena ia ke talahaua ai e au a koe ki mua he tau motu kehe, to lologo atu foki au ke he hau a higoa.
10 Ti pehe mai foki a ia, Kia fiafia a mutolu ko e tau motu kehe fakalataha mo e hana motu;
11 Mo e pehe foki, Kia fakaheke atu ke he Iki a mutolu ko e tau motu kehe oti, kia nava atu kia ia a mutolu ko e tau tagata oti kana.
12 Ti pehe mai foki a Isaia, To ha i ai e Vaka akau ko lese, ko ia foki ke tu mai ke pule ke he tau motu kehe; to amaamanaki kia ia e tau motu kehe.
13 Ko e Atua foki hana e amaamanaki, kia fakapuke e ia a mutolu ke he olioli oti, katoa mo e mafola, ha ko e tua; kia ha ha ia mutolu e amaamanaki kua lahi ue atu ke he mana he Agaga Tapu.
14 Haku a tau matakainaga na e kua iloa tonuhia e au ni, kua puke namo a mutolu ke he tau mahani mitaki, kua fakapuke foki a mutolu ke he maama katoatoa, kua maeke foki ia mutolu ke fetomaaki a mutolu.
15 Kua tohi atu e au e falu a mena kia mutolu, ko e tau matakainaga na e, mo e fakamalolo, ke fakamanatu atu kia mutolu, ha ko e fakaalofa noa kua foaki mai he Atua kia au;
16 Kia eke ai au mo fekafekau a Iesu Keriso ke he tau motu kehe, kia eke e au e feua he ekepoa ke he vagahau mitaki he Atua; kia talia mitaki ai e poa ko e tau motu kehe haia, kua fakatapu he Agaga Tapu.
17 Haia ni, ha ha ia au e mena ke hula ai ha ko Keriso Iesu ke he tau mena kua hagao atu ke he Atua.
18 Ha kua nakai fakamalolo e au ke vagahau atu ke he taha mena kua nakai gahua ai e Keriso kia au, ke fakatupu ai e omaoma he tau motu kehe ke he kupu mo e mahani,
19 Ke he malolo he tau fakamailoga, mo e tau mana ke he malolo he Agaga he Atua; ko ia kua fakamatala tolomaki atu ai e au e vagahau mitaki a Keriso, kua kamata i Ierusalema, mo e tau motu kua takai ai ato hoko ki Iluriko.
20 Ka kua pehe haku a lali atu, ke fakamatala atu e au e vagahau mitaki ke he tau mena nakai talahaua ai e higoa a Keriso; neke ati hake e au ki luga he fakaveaga he taha tagata.
21 Ka e tuga he tohi mai, To kitia e lautolu kua nakai talahau ki ai e tala kia ia; to iloa e lautolu kua nakai fanogonogo atu ki ai.
22 Ko e mena foki ia ne lekua ai lagaloga haku a fenoga kia mutolu.
23 Ha ko e hanai, kua nakai tuai fai mena ke nofo ai au ke he tau fahi nai, ti kua loga e tau tau kua manako ai au ke fina atu kia mutolu;
24 Ka fano haku fenoga ki Sepania, ti fina atu ai au kia mutolu; ha kua amaamanaki au ke ahi atu kia mutolu ke he haku a fenoga, ti fakafano mai foki e mutolu au, ka mafana fakatote fakamua au he fekitiaki a tautolu mo mutolu.
25 Ka kua fina atu nai au ki Ierusalema ke fekafekau atu ai ke he tau tagata tapu;
26 Ha kua loto a Maketonia mo Akaia ke taute ha mena fakaalofa ma e tau tagata tapu kua nonofogati ha ha i Ierusalema.
27 Kua loto tuai a lautolu ki ai; ha ha i ai foki ia lautolu e tau mena ha lautolu. Ha ko e mena kaeke kua fakalataha e tau motu kehe mo lautolu ke he tau mena kua lata mo e Agaga; kua lata kia lautolu ke uta e fakaalofa kia lautolu kua lata mo e tino.
28 Hanai, ka fakaoti au e fekau ia, mo e fakamau fakamailoga e fua nai kia lautolu, ti afe atu ai au kia mutolu ka fina atu au ki Sepania.
29 Kua iloa foki e au, ka fina atu au kia mutolu, ti fina atu ai au mo e katoatoa he monuina he vagahau mitaki a Keriso.
30 Ko e tau matakainaga na e, kua ole atu au kia mutolu, ha ko e Iki ha tautolu ko Iesu Keriso, mo e fakaalofa he Agaga, kia fakamakamaka fakalataha a mutolu mo au ke he tau liogi ke he Atua maku;
31 Kia laveaki e ia au mai ia lautolu i Iutaia kua faliuliu; kia talia mitaki foki he tau tagata tapu haku a fekau i Ierusalema;
32 Kia fina atu au kia mutolu mo e fiafia ke he finagalo he Atua, kia fakamafanatia foki a tautolu mo mutolu,
33 Kia ha ha i ai ia mutolu oti kana e Atua hana e monuina. Amene.