Roma 16:1-27
16 KUA fakailoa atu e au kia mutolu ha tautolu a mahakitaga, ko Fipe, ko e tiakono haia he ekalesia i Kenekerea;
2 Kia talia e mutolu a ia ke he Iki, tuga ne mena kua lata ke he tau tagata fakatapu, kia lagomatai foki a mutolu kia ia ke he mena ha mutolu kua manako ki ai a ia ha ko ia foki ko e lagomatai ke he tau tagata tokologa, katoa mo au nai.
3 Fakaalofa atu kia Pisila mo Akula, ko laua ne gahua fakalataha mo au ke he gahua a Keriso Iesu.
4 Ko laua ne tuku hifo ha laua a na ua ke hukui aki au, kia moui ai au; nakai ko au hokoau kua fakaaue atu kia laua, ka e katoa foki mo e tau ekalesia oti kana ke he tau motu kehe.
5 Fakaalofa foki ke he ekalesia ha ha he fale ha laua. Fakaalofa kia Epaineto, ko e haku a fakahele, ko ia ko e fua uluaki kia Keriso i Akaia.
6 Fakaalofa kia Maria, ko ia ne gahua fakalahi ma mautolu.
7 Fakaalofa kia Aneroniko mo Iunia, haku a faoa, ne fakalataha a mautolu mo au ke he fale puipui; ne talahaua mitaki a laua he tau aposetolo, ne mua a laua kia au he ha ha ia Keriso.
8 Fakaalofa atu kia Amepelia, kua fakahele au ke he Iki.
9 Fakaalofa kia Upano ne gahua fakalataha mo mautolu ke he gahua a Keriso; ko Sataku foki ko e haku a fakahele.
10 Fakaalofa kia Apele, ko ia ha ha ia Keriso, kua polamitaki. Fakaalofa ke he faoa a Arisopulo.
11 Fakaalofa kia Herotiona, ko e faoa haku. Fakaalofa ke he faoa a Nakiso, ko lautolu ha ha he Iki.
12 Fakaalofa kia Tufaina, mo Tufosa, ko e na fifine kua gahua ke he gahua he Iki. Fakaalofa kia Peresita kua fakahele, ko ia ne gahua fakalahi ke he gahua he Iki.
13 Fakaalofa au kia Rufo, kua fifili he Iki, mo e hana matua fifine, ko e haku a matua fifine foki ia.
14 Fakaalofa kia Asugerito, mo Fegona, mo Herema, mo Pateropa, mo Herenea, mo e tau matakainaga kua fakalataha mo lautolu.
15 Fakaalofa kia Filoloko, mo Iulia, ko Nerea foki mo e hana mahakitaga, mo Olumepa, mo e tau tagata tapu gotoa kua fakalataha mo lautolu.
16 Kia feofanaki a mutolu ke he figita tapu. Fakaalofa atu e tau ekalesia a Keriso kia mutolu.
17 Kua ole atu au kia mutolu, ko e tau matakainaga na e, ke kitekite kia lautolu kua fakatutupu e feveheveheaki, mo e tau mena ke tupetupe ai; ko e tau mena ia kua nakai lata mo e tau kupu kua ako ai e mutolu; kia kalo kehe foki a mutolu kia lautolu.
18 Ha ko lautolu ne pihia, kua nakai fekafekau a lautolu ke he Iki ha tautolu ko Iesu Keriso, ka ko e tau manava ha lautolu ni; to fakavai e lautolu e tau loto he tau tagata kua nakai manatu kelea, ke he ha lautolu a tau kupu mitaki mo e vagahau fakaheke.
19 Ha ko e mena tuogo atu ha mutolu a omaoma ke he tau tagata oti kana; ko e mena ia kua fiafia ai au ha ko mutolu; ka kua manako au ke iloilo a mutolu ke he tau mena mitaki, ka e goagoa ke he tau mena kelea.
20 Ka ko e Atua hana e monuina, to taholi vave e ia a Satani ki lalo he tau hui ha mutolu. Kia ha ha i ai ia mutolu e fakaalofa noa he Iki ha tautolu, ko Iesu Keriso. Amene.
21 Kua fakaalofa atu kia mutolu a Timoteo, ko ia kua gahua fakalataha mo au; ko Lukio foki, mo Iasona, mo Sosepatero, ko e haku a faoa a lautolu.
22 Ko au nai ko Teretio, kua tohi e tohi nai, kua fakaalofa atu au kia mutolu ha ha he Iki.
23 Kua fakaalofa atu kia mutolu a Kaio, ko ia kua talia au katoa mo e ekalesia oti ke he hana fale. Kua fakaalofa kia mutolu a Erato, ko e alagavaka he māga, katoa mo e matakainaga ko Kuato,
24 Kia ha ha i ai ia mutolu oti kana e fakaalofa noa he Iki ha tautolu ko Iesu Keriso. Amene.
25 Kia fakaheke kia ia kua maeke ke fakatumau a mutolu, ke lata mo e haku a vagahau mitaki, mo e fakamatalaaga he tala kia Iesu Keriso, ke lata mo e fakakiteaga he mena galo ne ufia tali mai he kamataaga;
26 Ka kua fakakite mai ke he vaha nai ke he tau tohi he tau perofeta, ke lata mo e poaki he Atua tukulagi, kua fakailoa ai ke he tau motu oti kana kia hoko ai e omaoma ke he tua;
27 Ko e Atua iloilo ne tokotaha, kia ha ha ia ia e fakahekeaga tukulagi ha ko Iesu Keriso. Amene.