Roma 6:1-23
6 HANAI, to talahau ha ha e tautolu? To nonofo mau kia a tautolu ke he hala, kia fakalahi mai ai e fakaalofa noa?
2 Aua ia. Ko tautolu ne mamate ke he hala to momoui mau fefe a tautolu ki ai?
3 Po kua nakai kia iloa e mutolu ko tautolu oti ne papatiso ai kia Keriso Iesu kua papatiso ai a tautolu ke he hana matulei?
4 Haia ni, kua tanumia fakalataha a tautolu mo ia ke he papatisoaga ke he hana matulei; kia o fano ai a tautolu ke he moui kua liu foki fakafou ai, tuga he liu fakatu mai a Keriso mai ia lautolu kua mamate ke he mana he Matua.
5 Ha ko e mena kaeke kua fakalataha a tautolu mo e fakatai he hana matulei, ti pihia foki a tautolu ke he hana liu foki tu mai.
6 Ha kua iloa e tautolu e mena nai, ne fakasatauro fakalataha mo ia ha tautolu a tagata tuai, kia fakaotioti ai e tino he hala, kia nakai tuai fakatupatupa a tautolu ke he hala.
7 Ha ko ia kua mate kua toka noa a ia mai he hala.
8 Kaeke foki he mamate a tautolu fakalataha mo Keriso, kua taofi e tautolu to momoui foki a tautolu fakalataha mo ia.
9 Kua iloa e tautolu kua liu foki tu mai a Keriso ia lautolu kua mamate, ti nakai tuai matulei a ia, ti nakai tuai pule e mate kia ia.
10 Ha ko e hana matulei, ne lagataha ne matulei a ia ke he hala; ka ko e hana moui kua moui ni a ia ke he Atua.
11 Kia pihia foki ha mutolu a taofi, kua mamate a mutolu ke he hala, ka kua momoui ni ke he Atua ha ko e Iki ha tautolu ko Keriso Iesu.
12 Hanei, aua neke kautu e hala ke he tau tino popo vave ha mutolu, kia omaoma a mutolu ki ai ke he hana tau manako lahi.
13 Aua foki neke tuku atu ha mutolu a tau fahi tino ke he hala ke eke mo tau kanavaakau he mahani hepehepe; ka kia tuku atu e mutolu a mutolu ke he Atua, tuga he momoui mai ia lautolu kua mamate; mo e tuku atu foki ha mutolu a tau fahi tino ke he Atua ke eke mo tau kanavaakau he tututonu.
14 Ha ko e mena to nakai pule e hala kia mutolu; ha kua nakai nonofo a mutolu ke he fakatufono, ka ko e fakaalofa noa.
15 Hanai po ke fefe? to hala kia a tautolu ha kua nakai nonofo a tautolu ke he fakatufono, ka ko e fakaalofa noa? Aua ia.
16 Nakai kia iloa e mutolu, ko ia kua tuku atu ki ai e mutolu a mutolu ko e tau fekafekau ke omaoma ki ai, ko e hana tau fekafekau a mutolu kua omaoma a mutolu ki ai, po ke hala ke hoko ai e mate, po ke omaoma ke hoko ai e tututonu?
17 Ka kia fakaaue ke he Atua ha ko e mena ne eke a mutolu mo tau fekafekau he hala, ka kua omaoma nai a mutolu mo e tau loto ke he kupu fakafifitaki ne tuku atu ai a mutolu.
18 Kua toka noa a mutolu mai he hala, ka kua fakatupatupa a mutolu ke he tututonu;
19 Ko e tau kupu he tagata kua vagahau atu ai au, ha ko e lolelole he tau tino ha mutolu; ha ko e mena tuga ne tuku atu e mutolu ha mutolu a tau fahi tino ke eke mo tau fekafekau ke mahani kelea mo e matahavala, ke matahavala ai; kia tuku atu pihia foki a einei ha mutolu a tau fahi tino ke eke mo tau fekafekau he tututonu ke mahani mitaki ai.
20 Ha ko e vaha ne fekafekau ai a mutolu ke he hala, ne toka noa ai a mutolu mai he tututonu.
21 Haia ni, ko heinoa kia e fua ne ha ha ia mutolu i tuai ke he tau mena kua ma ai a mutolu ke he vaha nai? Ha ko e fakahiku he tau mena ia ko e mate haia.
22 Ka ko e ainei, kua toka noa a mutolu mai he hala, mo e fakatupatupa a mutolu ke he Atua, ha ha ia mutolu e fua ke mahani mitaki ai, ko e hana fakahikuaga foki ko e moui tukulagi ia.
23 Ha ko e mate ko e palepale ia he hala; ka ko e moui tukulagi ko e mena foaki noa mai he Atua haia, ke he Iki ha tautolu ko Keriso lesu.