Roma 7:1-25
7 KO e tau matakainaga na e, kua nakai kia iloa e mutolu, (ha kua vagahau atu au kia lautolu kua iloa e fakatufono,) kua pule e fakatufono ke he tagata ke he tau aho oti kua moui ai a ia?
2 Ha ko e mena kua Iili he fakatufono e fifine fai tane ke he hana tane ke he vaha kua moui ai a ia; kaeke kua mate e tane, ti vevete ai a ia mai he fakatufono he tane.
3 Hanai foki to talahaua a ia ko e faivao, kaeke kua nofo a ia mo e tane kehe ka kua moui gaia hana tane; kaeke kua mate hana tane, ti toka noa ai a ia mai he fakatufono, ka nofo a ia mo e taha tane nakai faivao ai a ia.
4 Kua pihia foki a mutolu, haku a tau matakainaga na e, kua tamate a mutolu ke he tau mena he fakatufono, ke he tino a Keriso, kia nonofo ai a mutolu ke he taha, ko ia haia ne liu tu mai ia lautolu kua mamate kia fua mai ai a tautolu e tau fua ke he Atua.
5 Ha ko e mena ne gahua e tau manako kelea ha ko e fakatufono, ke he tau fahi tino ha tautolu ke he vaha ne omaoma ai a tautolu ke he tino, ke fua mai ai e tau fua ke mamate ai.
6 Ka ko e ainei kua vevete tuai a tautolu mai he fakatufono ne taofi ai a tautolu, ha kua mamate ai a tautolu, ti kua fekafekau ai a tautolu mo e moui fou ha he agaga, ka e nakai ko e moui tuai ha he tohi.
7 Ko e hanai, to tala atu ha ha e tautolu? Ko e hala kia e fakatufono? Aua ia. Ka ko e moli ni, aua e fakatufono, kua nakai iloa e au e hala; ha ko e mena ane mai nakai pehe mai e fakatufono, Ana neke manako lahi, po kua nakai iloa e au e manako lahi.
8 Ka kua moua he hala e lagatau ti fakatupu mai ke he poakiaga i loto ia au e tau manako lahi oti kana. Ha kua mate e hala ka nakai fai fakatufono:
9 Ne moui au i tuai ka e nakai ha i ai e fakatufono; ka kua hoko mai e poakiaga, ti moui ai e hala, ti kua mate ai au.
10 Kua iloa foki e au e poakiaga ne taute ke moui ai, ko ia haia ne hoko mai ai e mate.
11 Ha kua moua he hala e lagatau, ti fakavai ai e ia au ke he poakiaga, ko ia foki ne kelipopo ai e ia au.
12 Haia ni, kua tapu e fakatufono, ko e poakiaga foki kua tapu ia, to tonu, to mitaki;
13 Ti kua eke kia e mena mitaki ia mo mena ke mate ai au? Aua ia; ka ko e hala, kia iloa ai ko e hala ni, he fakatupu mai ai e mate kia au ke he mena mitaki, kia iloa mai ai ke he poakiaga, ko e hala, ko e hala ue atu ni haia.
14 Ha kua iloa e tautolu kua lata mo e Agaga e fakatufono, ka kua oma au ke he tino, kua fakafua atu au ke eke mo tagata he hala.
15 Ha kua nakai iloa e au e mena kua fa eke e au; ha ko e tau mena kua eke e au kua nakai loto au ki ai; ka ko e mena kua vihiatia e au ko e mena haia kua eke e au.
16 Kaeke foki kua eke e au e mena kua nakai loto au ki ai, kua kupu fakalataha au mo e fakatufono kua mitaki a ia.
17 Hanai, nakai tuai ko au kua eke e mena ia ka ko e hala, kua nofo i loto ia au.
18 Ha kua iloa e au nakai nofo ha mena mitaki ki loto ia au, ko e haku a tino haia; ha ko e mena ha ha ia au e loto atu, ka e nakai iloa e au ke eke e mena mitaki;
19 Ha kua nakai eke e au e mena mitaki kua loto au ki ai, ka ko e mena kelea kua nakai loto au ki ai, ko e mena haia kua eke e au.
20 Kaeke foki kua eke e au e mena kua nakai loto au ki ai, nakai tuai ko au kua eke e mena ia, ka ko e hala kua nofo i loto ia au.
21 Hanai, kua iloa e au e fakatufono ha ha ia au; ka loto au ke he mena mitaki ke eke, ti ha ha ia au e kelea.
22 Ha ko e mena fiafia au ke he fakatufono he Atua ke he tagata i loto.
23 Ka kua iloa e au e taha fakatufono ha ha he tino haku, kua tau a ia ke he fakatufono he haku a manamanatu, kua mahala foki au ke he fakatufono he hala ha ha he tino haku.
24 Oi te, ko e tagata malaia au! ko hai kia ke laveaki au mai he tino he mate nai?
25 Kua fakaaue atu au ke he Atua, ha ko Iesu Keriso ha tautolu a Iki. Hanai, ko au nai kua fekafekau atu au ke he fakatufono he Atua ke he haku a manamanatu, ka ko e fakatufono he hala ke he hoku tino.