Roma 8:1-39
8 TI kua nakai tuai fai fakahala ainei kia lautolu ha ha ia Keriso Iesu, ko lautolu nakai mahani fakalata ke he tino, ka e fakalata ke he Agaga;
2 Ha ko e fakatufono he Agaga he moui ha ia Keriso Iesu, ne toka noa mai e ia au mai he fakatufono he hala mo e mate.
3 Ha ko e mena ni kua nakai maeke ke he fakatufono he lolelole a ia ke he tino, kua eke he Atua he fakafano mai e ia hana Tama ni, kua tino tagata hala, ko e poa ha ko e hala, ne fakahala ai e ia e hala ke he tino;
4 Kia katoatoa ai ia tautolu e tututonu he fakatufono ia tautolu, ko tautolu kua nakai mahani fakalata ke he tino, ka e fakalata ke he Agaga.
5 Ha ko lautolu kua oma ke he tino kua loto a lautolu ke he tau mena he tino; ka ko lautolu kua oma ke he Agaga kua loto a lautolu ke he tau mena he Agaga.
6 Ha ko e loto ke he tau mena he tino ko e mate haia; ka ko e loto ke he tau mena he Agaga, ko e moui haia mo e mafola.
7 Ha ko e loto ke he tau mena he tino, ko e faitaua ia ke he Atua; ha kua nakai omaoma a ia ke he fakatufono he Atua, ti nakai maeke ai foki ia ia.
8 Ha ko lautolu kua omaoma ke he tino, nakai maeke ke fiafia ki ai e Atua.
9 Ka ko mutolu, kua nakai omaoma a mutolu ke he tino, ka e omaoma ke he Agaga, kaeke kua nofo e Agaga he Atua ki loto ia mutolu. Kaeke ke ha i ai taha kua nakai ha ha ia ia e Agaga a Keriso, nakai eke e tagata ia māna.
10 Kaeke kua ha i loto ia mutolu a Keriso, kua mate ai e tino ha ko e hala, ka kua moui e agaga ha ko e tututonu.
11 Kaeke kua nofo i loto ia mutolu e Agaga hana ne fakatu mai a Iesu mai ia lautolu kua mamate, to fakamoui mai foki ha mutolu a tau tino popo vave e ia ne fakatu mai a Keriso mai ia lautolu kua mamate, ke he hana Agaga kua nofo i loto ia mutolu.
12 Hanai, ko e tau matakainaga na e, ha ha ia tautolu ke totogi atu, nakai ke he tino, ke mahani a tautolu ke lata mo e tino;
13 Ha ko e mena kaeke ke mahani a mutolu ke lata mo e tino, ti mamate ai a mutolu; kaeke ke kelipopo e mutolu e tau mahani he tino ke he Agaga, ti momoui ai a mutolu.
14 Ha ko lautolu oti kua takitaki he Agaga he Atua, ko e tau tama he Atua a lautolu.
15 Ha kua nakai moua e mutolu e Agaga ke fakatupa ai ke liu foki matakutaku ai a mutolu; ka kua moua e mutolu e Agaga ke hiki tama, ko ia kua tauui atu ai a tautolu, Ava, ko e Matua na e.
16 Kua fakamoli mai e Agaga ia ni ke he tau agaga ha tautolu, ko e fanau he Atua a tautolu.
17 Kaeke ko e fanau a tautolu, ti ko e tau hakeaga foki, ko e tau hakeaga ni he Atua, ko e tau hakeaga fakalataha mo Keriso; kaeke kua mamahi a tautolu fakalataha mo ia kia fakamonuina foki a tautolu fakalataha mo ia.
18 Ha kua manatu au ko e mena noa e tau mamahi he vaha nai ke fakatai ke he monuina ke fakakite mai ia tautolu a mui.
19 Ha kua fakaneinei e tau mena ne eke ti fakatalitali ni ke he fakakite mai e tau tama he Atua.
20 Nukua mahala e tau mena ne eke ke he mena popo vave, nakai loto a ia ki ai, ka e pihia ha ko ia ne mahala ai,
21 Ne fakamahala mo e amaamanaki, ha ko e mena to toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.
22 Ha kua iloa e tautolu kua oi fakalataha mo e mamahi fanau fakalataha e tau mena oti ne eke kua hoko ni ke he vaha nai.
23 Ka e nakai kuenaia ia, ka ko tautolu foki ha ha i ai e mena uluaki he Agaga, kua oi foki a tautolu ki loto ia tautolu, kua fakatalitali atu ke eke mo tau tama hiki, ko e fakamouiaga haia he tau tino ha tautolu.
24 Ha ko e mena fakamomoui a tautolu ke he amaamanaki; ka ko e amaamanaki kua kitia, nakai ko e amaamanaki haia; ha kua amaamanaki agaia fefe e taha ke he mena kua kitia tuai?
25 Kaeke kua amaamanaki a tautolu ke he mena kua nakai kitia, kua fakatalitali a tautolu ki ai mo e fakauka.
26 Kua pihia foki e Agaga kua lagomatai mai kia tautolu ke he tau mena kua lolelole ai a tautolu; ha kua nakai iloa e tautolu e tau mena kua lata ke ole atu ai e tautolu; ka ko e Agaga ni, kua ole a ia ma tautolu ke he tau oi kua nakai maeke ke fakamatala atu.
27 Ka ko ia kua kumi e tau loto, kua fioia e ia po ke heigoa e finagalo he Agaga; ha kua ole a ia mo e tau tagata tapu kua lata mo e finagalo he Atua.
28 Kua iloa e tautolu kua gahua fakalataha e tau mena oti ke mitaki ai a lautolu kua fakaalofa ke he Atua, ko lautolu kua uiina he hana finagalo.
29 Ha ko lautolu ne fioia tuai e ia, ne kotofa tuai e ia a lautolu kia fakatatai a lautolu ke he Tama hana, kia tuga a ia, kia eke a ia mo tama uluaki ke he tau matakainaga tokologa;
30 Ka ko lautolu ne kotofa tuai e ia, ko lautolu ia ni ne uiina e ia; ko lautolu foki ne uiina e ia, ne talahaua tututonu e ia; ka ko lautolu ne talahaua tututonu e ia, ko lautolu ia ni ne fakamonuina e ia.
31 Ko e hanai, to talahaua ha ha a tautolu ke he tau mena nai? Kaeke ke kau e Atua mo tautolu, ko hai kia taha ke paleko mai kia tautolu?
32 Ko ia kua nakai toka hana ni a Tama, ka e tuku mai a ia ke hukui aki a tautolu oti kana, ka e nakai kia foaki noa mai e ia kia tautolu e tau mena oti kana fakalataha mo ia?
33 Ko hai kia taha ke hokotaki ha mena kia lautolu kua fifili he Atua? Ko e Atua kia kua talahau tututonu mai?
34 Ko hai kia taha ke fakahala mai? Ko Keriso kia, ko ia ne matulei, ka kua liu foki tu mai a ia, ko ia foki ha ha he fahi matau he Atua, ko ia foki kua ole ma tautolu?
35 Ko hai kia taha ke fakamavehe a tautolu mo e fakaalofa a Keriso? ko e matematekelea kia, po ke fakaatukehe, po ke favale, po ke hoge, po ke nakai fai felevehi, po ke tau mena uka, po ke pelu?
36 Tuga he tohi mai, Ha ko koe kua kelipopo ai a mautolu ke he aho oti, kua talahau a mautolu po ke tau mamoe ko e tamate ha ne fai.
37 Ka ko e tau kautu to atu a tautolu ke he tau mena oti nai, ha ko ia ne fakaalofa mai kia tautolu.
38 Ha kua iloa tonuhia e au nakai maeke ke he mate, po ke moui, po ke tau agelu, po ke tau iki, po ke tau toa, po ke tau mena ha i ai nai, po ke tau mena ne tatali,
39 Po ke tokoluga, po ke hokulo, po ke taha mena kua eke, nakai maeke ke he tau mena ia ke fakamavehe a tautolu mo e fakaalofa he Atua, ha ia Keriso Iesu ha tautolu a Iki.