Roma 9:1-33
9 KO e kupu moli kua vagahau atu ai au ki mua a Keriso, kua nakai pikopiko au, kua fakamoli foki kia au haku a loto manamanatu hifo ki mua he Agaga Tapu,
2 Kua momoko lahi na au, kua nakai noa foki haku a loto mo e mamahi;
3 Ha kua maeke e au ke fia anatema au ke toka kehe mo Keriso ke hukui aki haku a tau matakainaga, ko e haku a faoa ke he tino;
4 Ko e faoa a Isaraela a lautolu, ko e tau tama hiki a lautolu, ha i ai foki e lilifu, mo e tau maveheaga, mo e ekeaga he fakatufono, mo e tapuakiaga, mo e tau kupu ne talahaua.
5 Ha lautolu foki e tau tupuna, mai ia lautolu foki a Keriso ke he tino, ko ia kua pule ke he tau mena oti, ko e Atua ke fakaheke ki ai tukulagi. Amene.
6 Ka e nakai ko e mena teao e kupu he Atua; ha ko lautolu mai ia Isaraela, nakai ko e tau tagata Isaraela a lautolu oti kana;
7 Ti nakai ko e fanau a lautolu oti he tupu mai ia Aperahamo a lautolu, ka a pehe mai, To uiina hāu a fanau ia Isaako.
8 Ko e hana kakano, ko e fanau he tino, nakai ko e fanau he Atua a lautolu; ka ko e fanau ha i ai e kupu ne talahaua, kua talahaua a lautolu ko e fanau.
9 Ha ko e kupu nai ne talahaua, Ko e vaha pehenei ke he tau ka hoko mai, ke hau ai au, ti moua foki e Sara e tama tane.
10 Nakai kuenaia foki ia, ka kua fatu foki a Repeka ke he taha, ko Isaako haia, ha mautolu a matua;
11 Ka kua nakai la fanau mai e na tama, kua nakala eke foki e laua ha mena mitaki, po ke mena kelea, kia tumau ai e finagalo he Atua kua lata mo e fifiliaga, nakai ko e tau gahua, ka ko ia ni ne ui mai,
12 Ne tala age ai kia ia, To fekafekau e taokete ke he tehina.
13 Tuga he tohi mai, Kua fakaalofa au kia Iakopo, ka e vihiatia e au a Esau.
14 Hanai, to talahau ha ha e tautolu? Ha ha he Atua e mahani hepehepe kia? Aua ia.
15 Ha kua tala age a ia kia Mose, To fakaalofa au kia ia kua fia fakaalofa au ki ai, ti fakaalofa hofihofi au kia ia kua fia fakaalofa hofihofi ki ai.
16 Haia ni, nakai mai ia ia kua manako, ti nakai mai ia ia kua poi, ka e mai he Atua kua fakaalofa mai.
17 Ha kua pehe mai e Tohi kia Farao, Ha ko e mena ia ni ne fakatu ai e au a koe kia eke e au a koe mo fakakiteaga he haku a mana, kia talahaua foki haku a higoa ke he lalolagi oti.
18 Haia ni, kua fakaalofa a ia kia ia kua finagalo ki ai a ia; kua fakamao foki e ia a ia kua finagalo a ia ki ai.
19 Hanai, to pehe mai a koe kia au, Ko e ha he akonaki mau ai e ia? ha ko hai kia kua totoko ke he hana finagalo?
20 Tokai, ko koe ko e tagata, ko hai kia a koe kua totoko atu ke he Atua? To tala atu kia e mena kua eke kia ia ne eke ai, Ko e ha ne eke ai e koe au pihia?
21 Ko e tagata eke kapiniu kelekele kua nakai kia pule a ia ke he kelekele, ke eke ai ke he lakuaga taha e taha kapiniu ko e mena mitaki, ka ko e taha ko e mena fakateaga;
22 Po ke fefe kia kaeke kua fakauka e Atua, mo e fakamanavalahi ke he tau kapiniu he ita kua fakalata ke malaia ai he finagalo a ia ke fakakite mai ai hana ita, mo e fakailoa ai hana mana,
23 Ke fakailoa mai foki e lahi ue atu he hana lilifu ke he tau kapiniu he fakaalofa, ne taute tuai e ia ke hoko ke he monuina?
24 Ko tautolu foki ia kua ui mai ai a ia, nakai kuenaia ko e tau tagata Iutaia, ka e katoa foki mo e tau motu kehe.
25 Tuga foki he tala mai a ia ke he Tohi a Hosea, To talahaua e au ko e haku a motu a lautolu nakai ko e haku a motu tuai; to talahaua foki kua ofania a ia nakai ofania tuai.
26 Ko e mena foki ne pehe atu ai kia lautolu, Nakai ko e haku a motu a mutolu, to talahaua ai a lautolu ke he mena ia, ko e tau tama he Atua moui.
27 Kua fakatutu foki a Isaia kia Isaraela, Pete ni he tuga e oneone he tahi e tokologa he fanau a Isaraela, to fakamomoui falu kua toe;
28 Ha ko e mena fakaoti e ia e mena, mo e fakaku vave ke he tututonu, to fakaku he Iki e mena ke eke e ia ke he motu.
29 Tuga foki he tala mai tuai e Isaia, Ane mai kua nakai toka he Iki a Sapaota e fanau ma tautolu, po kua eke e tautolu tuga a Sotoma mo e fakalata a tautolu kia Komora.
30 Hanai, to talahau ha ha e tautolu? Kua moua he tau motu kehe e tututonu ko lautolu nakai kumi ke he tututonu, ko e tututonu haia ne moua ke he tua.
31 Ka ko Isaraela ne kumi ke he fakatufono he tututonu, nakai hohoko atu a lautolu ke he fakatufono he tututonu.
32 Ko e ha ne pihia ai? Ha kua nakai kumi ai ke he tua, ka e tokai ko e tau gahua he fakatufono; ha kua tupetupe a lautolu ke he maka ke tupetupe ai.
33 Tuga he tohi mai, Kitiala, kua tuku e au i Siona e maka ke tupetupe ai, mo e patuō ke tauveli ai; to nakai mā foki taha kua tua kia ia.