Sakaria 10:1-12
10 KIA ole atu ā mutolu kia Iehova ke to ai e uha ke he vaha he uha fakamui; kua eke e Iehova e tau uhila, to foaki mai foki e ia kia lautolu e tau uha lalahi, ko e tau motietie he fonua kia lautolu oti,
2 Ha kua vagahau e tau tupua ke he tau mena nakai aoga, mo lautolu kua eke e tau lagatau he tau taulaatua kua kitia e lautolu e pikopiko, mo e talahau ai e tau miti fakavai, mo e fakamafana teao e lautolu; ko e mena ia kua o kehe ai a lautolu tuga ne tau mamoe kua matematekelea he nakai fai leveki.
3 Ne tupu haku a ita ke he tau leveki mamoe; to taui atu foki e au ke he tau koti tane; ha kua ahi mai hana fuifui ko e magafaoa a Iuta; to eke foki e ia a lautolu ke tuga hana tau solofanua fulufuluola ke he tau.
4 Mai ia ia ni e maka he malokuaga; mai ia ia e fao, mai ia ia e kaufana ke tau ai, mai ia ia foki ke o atu ai e tau pule oti fakalataha.
5 To tuga ne tau toa a lautolu, kua taholi ai ke he pelapela he tau puhala ke he tau a lautolu ne fai fi kia lautolu; to tau foki a lautolu ha ko e mena ha ha ia lautolu a Iehova, ka to fakama ai a lautolu kua heke solofanua.
6 To fakamalolo e au e magafaoa a Iuta, mo e magafaoa a Iosefa to fakamoui ai e au; to fakanonofo ai foki e au a lautolu, ha kua fakaalofa hofihofi au ki ai; to eke a lautolu ke tuga he nakai tiaki e au a lautolu; ha ko au ko Iehova ko e Atua ha lautolu, to talia e au a lautolu.
7 To tuga ne toa e tau tagata Efaraimo, to fiafia foki ha lautolu a tau loto tuga a lautolu kua inu uaina; to kitia ai he fanau ha lautolu, mo e fiafia ai a lautolu, to olioli ai ni e tau loto ha lautolu kia Iehova.
8 To fakakatakatakē atu au kia lautolu, mo e fakapotopoto ai e au a lautolu; ha kua fakafua mai e au a lautolu; to fakatokologa foki a lautolu tuga he fakatokologa ai a lautolu ke he vaha fakamua;
9 To to foki e au a lautolu ke he tau motu; ka e manatu mai e lautolu au ke he tau mena mamao; to momoui foki a lautolu fakalataha mo e fanau ha lautolu mo e liliu mai ai a lautolu.
10 To liuaki mai e au a lautolu he motu ko Aikupito, mo e fakapotopoto e au a lautolu mai Asuria; ti ta mai e au a lautolu he motu ko Kiliata mo Lepanona, to nakai moua foki e lautolu ha mena ke nonofo ai a lautolu.
11 To fina age ai foki a ia ke he tahi mo e matematekelea; to ta foki e ia e tau peau he tahi; to fakapakupaku ai e tau mena hokulo oti he vailele; to fakatokolalo ai foki e mahani fakatokoluga a Asuria; ko e tokotoko foki a Aikupito to mole atu a ia.
12 To fakamalolo e au a lautolu kia Iehova; to o fano ai foki a lautolu ke he hana higoa, kua pihia mai a Iehova.