Sakaria 11:1-17
11 LEPANONA na e, kia hafagi la hau a tau pa gutuhala, ke huhunu ai he afi hau a tau arasi.
2 Kia tagi aue a a koe ko e perosi na e, ha kua veli e arasi, ha kua maona e tau akau ne mua ue atu; kia tagi fekapai ā ko e tau aluna a Vasana na e, ha kua veveli ai e tau akau he vao motua.
3 Ha ha i ai e leo he tagi kola he tau leveki mamoe, ha kua maona e fulufuluola ha lautolu; ha ha i ai e leo he tagi he tau punua leona, ha kua maona e fulufuluola a Ioritana.
4 Kua pehe mai e vagahau a Iehova haku a Atua, Kia leveki a e fuifui mamoe ko e tamate ha ne fai.
5 Ko lautolu ha lautolu e fuifui, kua tamate a lautolu, ka e nakai nonofo ai a lautolu mo e hala; ko lautolu foki ne fakafua atu a lautolu, kua takitaha a lautolu mo e pehe age, Kia fakaaue kia Iehova, ha kua maukoloa ai au; ko e tau leveki mamoe ha lautolu foki, nakai fakaalofa atu a lautolu kia lautolu.
6 Ha ko e mena nakai fakaalofa foki au kia lautolu kua nonofo ke he motu na, kua pihia mai a Iehova, kitiala, to tuku atu e au e tau tagata ko e taha ke he lima he taha, mo e lima he hana patuiki; to tuki malipilipi e lautolu e motu, ka e nakai laveaki e au a lautolu mai he tau lima ha lautolu.
7 Ti leveki ai e au e fuifui mamoe ko e tamate ha ne fai, ko e fuifui mamoe ne matematekelea lahi; ne uta foki e au ua e tokotoko māku; ti fakahigoa ai e au taha ko Fulufuluola; ka ko e taha ne fakahigoa ai e au ko e tau Pipi; ti leveki ai e au e fuifui mamoe.
8 Ne fakaoti ai e au e tau leveki mamoe tokotolu ke he mahina taha; ne mamahi haku loto kia lautolu, ne fakavihia he tau loto ha lautolu kia au.
9 Ti pehe age au, Nakai leveki e au a mutolu; ko ia ka mate kia mate ni a ia; ko ia ka fakaoti kia fakaoti ni a ia; ka ko lautolu kua toe takitaha mo e kai ai e tino he taha.
10 Ti toto e au haku a tokotoko, ko Fulufuluola haia, mo e papaki ai e au; kia fakahui e au haku a maveheaga ne eke ai e mautolu mo e tau motu oti;
11 Ti fakahui ai ke he aho ia, ti iloa mitaki he fuifui mamoe ne matematekelea, ko lautolu ne omaoma kia au, ko e kupu ni a Iehova haia.
12 Ti pehe age au kia lautolu, Kaeke kua mitaki kia mutolu, kia ta mai a haku a palepale; ka nakai mitaki, ti tokai, ti fafati mai ai e lautolu haku a palepale, ko e tolugofulu e tupe.
13 Ti pehe mai a Iehova kia au, Kia liti age a ke he tagata eke kapiniu kelekele e palepale homo atu ne fakafua ai e lautolu au! Ti toto e au e tau tupe ne tolugofulu mo e liti age e au ke he fale a Iehova ke he tagata eke kapiniu kelekele.
14 Ti papaki ai e au haku a tokotoko ne ua aki, ko e tau Pipi haia, kia vevete ai e au e fematakainagaaki a Iuta mo Isaraela.
15 Ne pehe mai foki a Iehova kia au, Kia uta foki a e koe e tau mena he leveki mamoe goagoa.
16 Ha ko e mena kitiala to fakatu ai e au ke he motu e leveki mamoe, to nakai ahi e ia a lautolu ne galo; ti nakai kumi e ia a lautolu ne hehe; ti nakai fakamaulu ai e ia a lautolu ne malipilipi; ti nakai fagai e ia a lautolu ne tutu; ka e kai ai e ia e tau tino ha lautolu ne gako, mo e hēhē kehe ai e ia ha lautolu a tau mahina hui.
17 Oi te fakaalofa ke he leveki mamoe nakai aoga, kua tiaki e fuifui mamoe! to ha i ai e pelu ke he hana lima katoa mo e hana mata matau; to mate ai ni hana lima, mo e hana mata matau to pouli ni a ia.