Sakaria 14:1-21
14 KITIALA, ko e hoko mai ne fai e aho a Iehova, ke tufatufa ai i loto ia koe hau a tau koloa ne moua he tau.
2 Ha ko e mena to fakapotopoto ai e au e tau motu oti ke tau mo Ierusalema; to eke ai ma lautolu e maga, to kaiha ai e tau fale mo e toho ai e tau fifine; to takitaki ai foki ke he paeaaga e veveheaga ne veveheua ai e maga.
3 Ti haele atu ai a Iehova ke tau mo e tau motu ia, tuga ne aho ne tau ai a ia ke he aho tau.
4 To tutu ai hana tau ve ke he aho ia ki luga he mouga ko Olive ne fehagai mo Ierusalema ke he ahi uta; to ihi ua ai foki ke he lotoga e mouga ko Olive ke he fahi uta mo e fahi lalo, ko e pahua lahi mahaki, to hiki atu taha fahi he mouga ke he fahi tokelau, mo e taha fahi hana ke he fahi toga.
5 Ti fehola ai a mutolu ke he pahua he haku a tau mouga; ha ko e mena hoko atu e pahua he tau mouga ki Atela; to fehola foki a mutolu tuga he fehola a mutolu he mafuike ke he vaha kia Usia ko e patuiki a Iuta; to haele mai ni a Iehova haku Atua mo lautolu oti kua tapu fakalataha mo koe.
6 To hoko ni ke he aho ia, ke nakai ha i ai e maama he tau mena uho, ka ko e pouli ni;
7 Ka e hoko mai e aho, ko e taha ni haia, kua iloa ni kia Iehova; nakai ko e aho, nakai ko e po; ha ko e mena ka hoko ke he magaaho afiafi to maama ai ni.
8 Ko e aho ia foki to fina atu ai e vai moui i Ierusalema; ko e taha maga ne veveheua aki to lele atu ke he tahi ke he fahi uta, ka ko e taha maga ne veveheua aki to lele atu ia ke he tahi ke he fahi lalo; ko e tau mafana mo e tau makalili to eke ai pihia.
9 To eke foki a Iehova mo Patuiki ke he lalolagi oti; ko e aho ia to nakai fakahoania a Iehova, mo e hana higoa ko e tokotaha ni haia.
10 To liliu e motu oti ke tuga ne kelekele tatai, ke kamata mai i Kepa ke hoko atu ki Rimoni ke he fahi toga a Ierusalema; to fakatokoluga aki foki a ia, mo e nofo ai a ia ke he hana ni a mena, ke kamata mai he gutuhala a Peniamina ke hoko atu ke he mena ha ha i ai e gutuhala fakamua, ke hoko ke he gutuhala he malokuaga; ke kamata mai foki he kolo a Hananieli ke hoko atu ke he tau holiaga vine he patuiki.
11 To nonofo ai a lautolu, to nakai ha i ai foki e mena ke fakamalaia ai; to nofo ni a Ierusalema mo e nakai haofia.
12 Ko e malaia hanai, ke ta aki e Iehova e tau motu oti ne tau mo Ierusalema; to tutue ni ha lautolu a tau tino ka kua tutu agaia a lautolu ke he tau hui ha lautolu, to tomo ai ha lautolu a tau mata ke he tau poko mata ha lautolu, mo e tau alelo ha lautolu to oti ai ni ke he tau gutu ha lautolu.
13 Ko e aho ia foki to ha i ai kia lautolu e fakaatukehe lahi mai ia Iehova, ti takitaha ha lautolu mo e toto ai e taha e lima he taha; to takitaha foki a lautolu mo e nikiti ki luga ha lautolu a tau lima, ko e taha ke he taha.
14 Ko Iuta foki to kau a laua mo Ierusalema; ti tatanaki ai e tau koloa he tau motu oti kua agaagai mai ai; ko e tau auro, mo e tau ario, mo e tau tapulu kua loga lahi ni.
15 To ha i ai foki pihia e malaia ke he tau solofanua, mo e tau falata, mo e tau kamela, mo e tau asini, katoa mo e tau manu oti ha ha i ai ke he tau heaga api ia, ke tatai mo e malaia na.
16 Ko lautolu oti ne toe he tau motu ne o mai ke tau mo Ierusalema, to o hake ni a lautolu ke he taha tau mo e taha tau ke hufeilo ke he Patuiki, ko Iehova Sapaota, ke eke ai foki e galue he tau fale api.
17 Ka ko lautolu he tau magafaoa he lalolagi kua nakai o hake ki Ierusalema ke hufeilo ke he Patuiki, ko Iehova Sapaota, to nakai to ai ha uha kia lautolu.
18 Ka ko e mena kaeke ke nakai o hake e magafaoa a Aikupito, mo e nakai o mai a lautolu, ti nakai kia ha i luga ha lautolu e malaia ne ta ai e Iehova e tau motu kua nakai o hake ke eke ai e galue he tau fale api?
19 Ko e hala hanā a Aikupito, mo e hala he tau motu oti, kua nakai o hake ke eke ai e galue he tau fale api.
20 Ko e aho ia to ha i ai ke he tau logo he tau solofanua, KUA TAPU KIA IEHOVA; ko e tau ulo foki ke he fale a Iehova, to fakataufata ia mo e tau kapiniu ki mua he fatapoa.
21 Ko e tau ulo oti foki i Ierusalema mo Iuta, to tapu ai ni kia Iehova Sapaota; ko lautolu oti kua tamate manu mo poa; to o age a lautolu mo e uta ai, mo e tunu mena ai; ti nakai tuai ha i ai ha tagata Kanana ke he fale a Iehova Sapaota ke he aho ia.