Sakaria 2:1-13
2 NE haga hake au, ti kitia e au, kitiala, ko e tagata mo e afo fafati mena ke he lima hana.
2 Ti pehe age au kia ia, Ko e fano a koe ki fe? Ti pehe mai a ia kia au, Ko e fano ne fai au, ke fafati a Ierusalema, ke kitia ai po ke heigoa hana laulahi, po ke heigoa foki hana loa.
3 Ti, kitiala, kua fina atu e agelu ne vagahau ai a maua; ko e taha agelu foki ne fina age ke feleveia ai a laua mo ia.
4 Kua pehe age a ia kia ia. Kia poi a, ti tala age e koe ke he fuata na kua pehe age, To kakai ai a Ierusalema ke tuga ne tau maga kua nakai puipui, ha ko e tau tagata tokologa mo e tau manu loga ha ha i ai.
5 Kua pehe mai a Iehova, Ko au foki to eke au mo kaupa afi ke takai aki a lautolu, to eke foki au mo lilifu i loto ia ia.
6 Oe! oe! kia fehola mai a mutolu ke he motu ke he fahi tokelau, kua pihia mai a Iehova; ha kua fakamavehevehe e au a mutolu tuga ne tau matamatagi ne fa he lagi, kua pihia mai a Iehova.
7 Oe! Siona na e, kia laveaki e koe a koe, ko koe kua nonofo fakalataha mo e tama fifine a Papelonia.
8 Ha kua pehe mai e vagahau a Iehova Sapaota, kua fakafano atu e ia au ke mui atu ke he lilifu ke he tau motu ne eke a mutolu mo tau mena ne fofo he tau; ha ko ia kua piki atu kia mutolu, kua piki atu ai a ia ke he alito mata he hana fofoga.
9 Ha ko e mena kitiala, to nikiti e au haku lima ki luga ha lautolu; ti eke a lautolu mo tau mena ne moua he tau kia lautolu ne fekafekau kia lautolu; ti iloa ai e mutolu, kua fakafano mai e Iehova Sapaota au.
10 Ko e tama fifine a Siona na e, kia lologo ā, mo e fiafia; ha ko e mena kitiala, to fina atu au, mo e nofo ai au i loto ia koe, kua pihia mai a Iehova.
11 To fakalataha atu e tau motu kehe loga kia Iehova ke he aho ia; to eke a lautolu ke he aho ia mo tau motu haku, to nofo foki au i loto ia koe; ti iloa ai e koe kua fakafano atu au kia koe e Iehova Sapaota.
12 To eke e Iehova a Iuta māna, ko e hana tufaaga ia ke he motu tapu; to fifili foki e ia a Ierusalema.
13 Kia fakamamate a e tau tagata oti ki mua a Iehova; ha kua matike a ia mai hana haeleaga tapu.