Sakaria 4:1-14
4 NE liu mai e agelu ne vagahau ai a maua, to fafagu e ia au, tuga e tagata ne fafagu ai he mohe.
2 Ti pehe mai a ia kia au, Ko e heigoa kia kua kitia e koe? Ti pehe age au, Kua kitia e au e tokaaga lamepa auro katoatoa, mo e hana tokaaga puke lolo i luga hana, mo e hana tau lamepa ne fitu i luga hana, mo e tau hala ne takifitu ke lele ai e puke lolo ke he tau lamepa ha ha i luga hana.
3 Mo e ua e olive ke he hana na fahi ko e taha ke he fahi matau he tokaaga puke lolo, mo e taha ke he hana fahi hema.
4 Ti huhu age au ke he agelu ne vagahau ai a maua, kua pehe age, Ko e iki na e, ko e heigoa kia e tau mena ia?
5 Ti tali mai e agelu ne vagahau ai a maua, kua pehe mai kia au, Nakai kia iloa e koe e kakano he tau mena na? Ti pehe age au, Ko e iki na e, nakai iloa e au.
6 Ti tali mai a ia mo e tala mai a ia kia au, kua pehe mai, Ko e kupu hanai a Iehova kia Serupapelu, kua pehe mai, Nakai ko e toa, nakai ko e malolo, ka ko e haku Agaga, kua pihia mai a Iehova Sapaota.
7 Ko e mouga lahi na e, ko hai kia a koe? to eke a koe mo kelekele tatai ki mua a Serupapelu; to ta mai foki e ia e maka he malokuaga tapa ki luga, mo e kalaga pehe Ko e fakaalofa noa hanai! kia ha ha ia ia e fakaalofa noa.
8 Kua hoko mai foki kia au e kupu a Iehova, kua pehe mai,
9 Ko e tau lima a Serupapelu ne fakave ai e fale nai, ko e tau lima hana foki ke fakaoti ai e gahua; ti iloa ai e koe kua fakafano mai au kia mutolu e Iehova Sapaota.
10 Ha ko hai kia kua fakavihia e aho he tau mena ikiiki? ko e mena fiafia a lautolu, ti kitia ai e lautolu e fua tautau ke he lima a Serupapelu; ko lautolu nai ne fitu, ko e tau fofoga a Iehova a lautolu, kua o tafeliuaki ai ke he lalolagi oti.
11 Ti huhu age au kia ia, kua pehe age, Ko e heigoa kia e tau olive ua na ke he fahi matau he tuaga lamepa, mo e hana fahi hema?
12 Ti huhu age au kia ia, ko e laga ua ia, kua pehe age, Ko heigoa kia e tau la olive ua, ne liligi mai ai e puke lolo auro, ke he tau hala puke lolo auro ne ua?
13 Ti tala mai a ia kia au, kua pehe mai, Nakai kia iloa e koe e kakano he tau mena na? Ti pehe age au, Ko e iki na e, nakai iloa e au.
14 Ti pehe mai a ia, Ko e tau tagata kua fakauku a laua na, kua tutu ai ki mua he Iki he lalolagi oti.