Sakaria 7:1-14
7 KO e tau ne fa aki he eke a Tariu mo patuiki, ne hoko mai ai e kupu a Iehova kia Sakaria ke he aho fa he hiva mahina, ko e Kiselu haia.
2 Ne fakafano atu ai he tau tagata Peteli a Saresa mo Rekemeleki, mo e hana tau tagata ke olelalo atu ai kia Iehova;
3 Kua pehe age ke he tau ekepoa ha ha he fale a Iehova Sapaota, katoa mo e tau perofeta, kua pehe age, To tagi kia au ke he lima mahina, mo e nofo kehe au, tuga he eke ai au ke he tau tau loga ia?
4 Ti hoko mai ai e kupu a Iehova Sapaota kia au, kua pehe mai,
5 Kia vagahau atu a koe ke he tau tagata oti he motu, katoa mo e tau ekepoa, kia pehe atu, Ne fakakanopogi a mutolu kia au kia, he fakakanopogi ai a mutolu mo e tagi ke he lima mahina mo e fitu mahina ke he tau tau fitugofulu ia?
6 Kua kai foki a mutolu, kua inu foki a mutolu, nakai kia ko mutolu ne kai, ko mutolu foki ne inu?
7 Nakai kia ko e tau kupu ia ne ui ai e Iehova ke he tau perofeta fakamua, he kakai ai a Ierusalema mo e monuina, ne kakai ai foki hana tau maga ne agaagai mai ki ai, katoa mo e fahi toga mo e fahi tokolalo.
8 Ne hoko mai foki e kupu a Iehova kia Sakaria, kua pehe mai,
9 Kua pehe e vagahau a Iehova Sapaota, kua pehe mai, Kia fakafili a e mutolu mo e fakafiliaga tonu, kia totonu atu foki mo e fakaalofa atu ko e taha ke he taha.
10 Aua neke favale atu a mutolu ke he tau fifine takape mo e tau tama ne mamate ha lautolu a tau matua, ko e tagata kehe foki mo ia kua matematekelea; aua foki neke manamanatu a mutolu ke he tau loto ha mutolu e kelea kua eke he taha ke he taha.
11 Ka e nakai mafai a lautolu ke fakateliga mai, ne haga tua mai foki a lautolu mo e matauka a lautolu; mo e fakatuli ai e lautolu ha lautolu a tau teliga neke logona ai e lautolu.
12 Ne eke foki e lautolu ha lautolu a tau loto ke tuga ne Samira, neke fanogonogo ai a lautolu ke he fakatufono mo e tau kupu ne fakafano mai ai e Iehova Sapaota he hana Agaga ke he tau perofeta fakamua; ko e mena ia ni ne ita lahi mai ai a Iehova Sapaota.
13 Hanai tuga ne ui mai e ia ka e nakai fanogonogo a lautolu kia ia, to ui atu pihia foki a lautolu kia ia, ka e nakai fanogonogo a ia ki ai, kua pihia mai a Iehova Sapaota.
14 Ka to fakamavehevehe atu e au a lautolu ke he tau motu oti nakai iloa e lautolu. Kua mole atu a lautolu ti eke ai e motu mo tau mena kua moumou, nakai faifano ai taha, ne eke e lautolu e motu fulufuluola mo tau mena kua moumou.