Sakaria 8:1-23
8 NE hoko mai foki e kupu a Iehova Sapaota kua pehe mai,
2 Kua pehe mai e vagahau a Iehova Sapaota, Ne fakamakutu au mo e makutu lahi ha ko Siona; ne fakamakutu foki au mo e ita lahi ha ko ia.
3 Kua pehe mai e vagahau a Iehova, Kua liu atu au ki Siona, to nofo foki au i loto a Ierusalema; to ui ai a Ierusalema, Ko e maga kua fakamoli; ko e mouga foki a Iehova Sapaota, to ui ai a ia, Ko e mouga tapu.
4 Kua pehe mai e vagahau a Iehova Sapaota, To nonofo foki e tau patu momotua ko e tau patu tane mo e tau patu fifine ke he tau male i Ierusalema; ko e tagata foki mo e hana tokotoko ke he hana lima he loga ha lautolu a tau tau.
5 To puke foki e tau male he maga ke he tau tama ikiiki ko e tau tama tane mo e tau tama fifine kua fefeua ai ke he hana tau male.
6 Kua pehe mai e vagahau a Iehova Sapaota, Kaeke ko e mena uka ke he manatu he tau tagata ne toe he motu nai ke he tau aho ia, ko e mena uka foki kia ke he haku manatu? Kua pihia mai a Iehova Sapaota.
7 Kua pehe mai e vagahau a Iehova Sapaota, Kitiala, to fakamoui e au haku motu mai he motu ne hake ai e la, mo e motu ne to ai e la.
8 To ta mai e au a lautolu ti nonofo ai a lautolu i loto a Ierusalema; to eke foki a lautolu mo motu haku, to eke foki au mo Atua ha lautolu ke he fakamoli mo e tututonu.
9 Kua pehe mai e vagahau a Iehova Sapaota, Kia fakamalolo ai e tau lima ha mutolu ko mutolu kua fanogonogo ai ke he vaha nai ke he tau kupu nai mai he tau fofoga he tau perofeta, ne ha i ai ke he vaha ne fakave ai e fale a Iehova Sapaota, ko e faituga, kia ati ai a ia;
10 Ha kua nakaila hoko ke he tau aho ia nakai fai taui e tau tagata, po ke taui e tau manu; ti nakai mafola a ia ne fina atu mo ia ne hau, ha ko ia ne fai fi mai; he fakaohooho e au e tau tagata oti ke felakutaki a lautolu.
11 Ka ko ainei, nakai eke au kia lautolu ne toe he motu nai ke tuga he vaha fakamua, kua pihia mai a Iehova Sapaota.
12 Ha ko e mena to ha i ai e tua fua he mafola; to fua mai e vine hana tau fua, to fua mai foki e kelekele hana ni a tau fua, ko e lagi foki to to hifo ai hana a hahau; to age foki e au e tau mena oti ia kia lautolu ne toe he motu nai ke eke ma lautolu.
13 Tuga he eke a mutolu mo tau tagata ke kaialu ki ai ke he tau motu kehe, ko koe ko e magafaoa a Iuta, mo koe ko e magafaoa a Isaraela, to fakamoui pihia e au a mutolu, to eke a mutolu mo tau tagata kua fakamonuina; ua matakutaku a mutolu; kia malolo ai ha mutolu a tau lima.
14 Ha kua vagahau mai pehe a Iehova Sapaota; Tuga he manatu e au ke fakamamahi a mutolu, he fakahogohogomanava mai ha mutolu a tau matua kia au, kua pihia mai a Iehova Sapaota, mo e nakai tokihala ai au.
15 Kua pihia he liu manatu ai e au ke he tau aho nai ke eke fakamitaki atu ki Ierusalema mo e magafaoa a Iuta; aua neke matakutaku a mutolu.
16 Ko e tau mena nai ke eke e mutolu, Kia vagahau ai a mutolu mo e tau kupu moli ko e taha ke he taha, kia fakafili foki e mutolu mo e fakamoli, mo e fakafiliaga ke mafola ai ke he tau gutuhala ha mutolu.
17 Aua neke manamanatu ai ke he tau loto ha mutolu ke he ha mutolu a mena kelea ke eke ko e taha ke he taha; ti ua fiafia foki a mutolu ke he omonuo pikopiko; ha ko e tau mena oti ia kua vihiatia ai au, kua pihia mai a Iehova.
18 Ne hoko mai foki kia au e kupu a Iehova Sapaota, kua pehe mai,
19 Kua pehe mai e vagahau a Iehova Sapaota, Ko e fakakanopogi ke he mahina ne fa aki, mo e fakakanopogi ke he mahina ne lima aki, mo e fakakanopogi ke he mahina ne fitu aki, mo e fakakanopogi ke he mahina ne hogofulu aki e tau, to eke ia mo fiafia, mo olioli foki, mo aho foki he galue mitaki ke he magafaoa a Iuta; ka kia fiafia a mutolu ke he kupu moli mo e mafola.
20 Kua pehe mai e vagahau a Iehova Sapaota, To o mai foki e tau motu mo e tau tagata he tau maga loga;
21 To o age foki e tau tagata he taha maga ke he taha, kua pehe age, O mai a kia o atu a tautolu ke olelalo atu kia Iehova, mo e kumi a Iehova Sapaota; to fano foki au.
22 To o mai foki e tau motu loga mo e tau motu malolo ke kumi a Iehova Sapaota i Ierusalema, ke olelalo atu foki kia Iehova.
23 Kua pehe mai e vagahau a Iehova Sapaota, Ko e tau aho ia to toto atu ai he tau tagata tokohogofulu he tau vagahau oti he tau motu kehe; to toto atu ai e lautolu e kala tapulu he tagata Iuta mo e pehe atu, To o a tautolu mo mutolu; ha kua logona e mautolu ha ha ia mutolu e Atua.